ຫຼວງພະບາງ ຈັດກິດຈະກໍາຂີ່ລົດຖີບ ສົ່ງເສີມການທ່ອງທ່ຽວ

  ກິດຈະກໍາດັ່ງກ່າວແມ່ນໄດ້ຈັດຂຶ້ນໃນວັນທີ 18 ກໍລະກົດ 2020 ຜ່ານມານີ້ ໂດຍການສະໜັບສະໜູນຈາກພະແນກສຶກສາທິການແລະກີລາແຂວງຫຼວງພະບາງ ແລະສະຫະພັນລົດຖີບແຂວງຫຼວງ ພະບາງ ເພື່ອສ້າງບັນຍາກາດໃຫ້ ການທ່ອງທ່ຽວແບບລາວທ່ຽວ ລາວໄດ້ມີຄວາມຄຶກຄື້ນມ່ວນຊື່ນ ທັງເປັນການຖີບລົດເພື່ອສຸຂະພາບ ແລະເປັນການສ້າງຂະບວນການຕ້ອນຮັບ 4 ວັນປະຫວັດສາດທີ່ມີຄວາມໝາຍຄວາມສໍາຄັນ.

  ໃນພິທີທ່ານ ວົງສະຫວັນ ເທບພະຈັນ ຮອງເຈົ້າແຂວງໆຫຼວງພະບາງປະທານເປີດງານກ່າວວ່າ: ການຈັດງານກິດຈະກໍາຂີ່ລົດຖີບມວນຊົນເພື່ອສຸຂະພາບອ້ອມຂ້າງ ເທສະບານນະຄອນຫຼວງພະບາງ ເພື່ອສະເຫຼີມສະຫຼອງວັນກີລາ-ກາຍະກໍາແຫ່ງຊາດລາວ ຄົບຮອບ 54 ປີ ແລະວັນຄ້າຍວັນເກີດຂອງປະທານສຸພານຸວົງ ຄົບຮອບ 111 ປີ ແລະເປັນການສ້າງຂະບວນຂໍ່ານັບ ຮັບຕ້ອນກອງປະຊຸມໃຫຍ່ຂອງອົງ ຄະນະພັກແຂວງຄັ້ງທີ VIII ທີ່ຈະຈັດຂຶ້ນໃນທ້າຍປີນີ້ໄປພ້ອມໆກັບ ການສະໜັບສະໜູນ ແລະສົ່ງເສີມການທ່ອງທ່ຽວພາຍໃນປະເທດ “ລາວທ່ຽວລາວ” ໃນຮູບແບບປົກກະຕິແບບໃໝ່, ອີກດ້ານໜຶ່ງວຽກ ງານກີລາ-ກາຍະກໍາເປັນວຽກໜຶ່ງ ທີ່ມີຄວາມໝາຍສໍາຄັນຕໍ່ການດໍາລົງຊີວິດຂອງຄົນໃນສັງຄົມເພາະມັນຊ່ວຍໃຫ້ຄົນເຮົາມີສຸຂະພາບແຂງແຮງ, ມີພະລາໄມສົມບູນ,ສ້າງໃຫ້ຄົນເຮົາມີມັນສະໝອງທີ່ດີ,ມີຄວາມຮູ້, ຄວາມສະຫຼາດ, ຄວາມສາມາດໃນການປະຕິບັດໜ້າທີ່ວຽກງານເພື່ອປະກອບສ່ວນໃນການປົກປັກຮັກສາ ແລະສ້າງສາພັດທະນາປະເທດຊາດພ້ອມນີ້ ທ່ານຮອງເຈົ້າແຂວງຍັງໄດ້ຮຽກຮ້ອງໃຫ້ທຸກພາກສ່ວນໃນສັງຄົມຊ່ວຍໃຫ້ການສະໜັບສະໜູນປະກອບສ່ວນທາງດ້ານທຶນຮອນວັດຖຸປັດໄຈເຂົ້າໃນວຽກງານກີລາ-ກາຍະກໍາໃຫ້ມີຄວາມເຕີບໃຫຍ່ເຂັ້ມ ແຂງຂະຫຍາຍຕົວເປັນກ້າວໆ.

 ຈາກນັ້ນທ່ານປະທານໄດ້ຮ່ວມ ກັນຕັດແຖບຜ້າເພື່ອເປີດງານກິດຈະກໍາຂີ່ລົດຖີບອ້ອມເທສະບານ ນະຄອນຫຼວງພະບາງ ຊຶ່ງມີຊາວນະຄອນຫຼວງພະບາງ ເຂົ້າຮ່ວມຫຼາຍ ພັນຄົນ ແລະເປັນຂະບວນຟົດຟື້ນມ່ວນຊື່ນພໍສົມຄວນ.

-------------

ໂດຍ: ສີສຸວັນ

แชร์