ມື້ດຽວເລີກຮື້ກຸ່ມແກ້ງ ພ້ອມຢືດຢາບ້າໄດ້ 18 ພັນກວ່າເມັດ

  ວັນທີ 17 ກໍລະກົດ 2020 ມື້ດຽວເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດຫ້ອງຕໍາຫຼວດ ປກສ ແຂວງໄຊຍະບູລີ ສາມາດເລີກຮື້ກຸ່ມແກ້ງຄ້າ- ຂາຍຢາເສບຕິດໄດ້ 6 ຄົນ ພ້ອມຢຶດວັດຖຸຂອງກາງຢາບ້າ 18.000 ກວ່າເມັດ ມາດໍາເນີນຄະດີຕາມກົດໝາຍ.


   ໃນເວລາ 14:00 ໂມງຂອງວັນທີ 17 ກໍລະກົດຜ່ານມາເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດຫ້ອງຕໍາຫຼວດ ປກສ ແຂວງໄຊຍະບູລີ ໄດ້ລົງເຄື່ອນໄຫວເລີກຮື້ແກ້ໄຂເປົ້າໝາຍຄ້າ-ຂາຍຢາເສບຕິດ ຢູ່ເສັ້ນທາງເຂດ ບ້ານນາແລ້ງຫຼວງ ເມືອງໄຊຍະບູລີ ສາມາດກັກຕົວທ້າວ ເຢຍ ວ່າງ ອາຍຸ 27 ປີ ປະຊາຊົນບ້ານຫ້ວຍທອງ ເມືອງວຽງຄໍາ ແຂວງຫຼວງພະບາງ ພ້ອມດ້ວຍວັດຖຸຂອງກາງຢາບ້າ 1 ມັດ ເທົ່າກັບ 2.000 ເມັດ, ລົດຈັກ 1 ຄັນຍີ່ຫໍ້ຮອນດາສີແດງ-ຂາວໝາຍເລກທະ ບຽນ ຈບ 1958 ຫຼວງພະບາງ;


  ຕໍ່ມາ ເວລາ 15:00 ໂມງຂອງມື້ດຽວກັນເຈົ້າໜ້າທີ່ໄດ້ດໍາເນີນການສືບສວນ-ສອບສວນເອົາຄໍາໃຫ້ການຂອງຜູ້ຖືກຫາສາມາດຂະຫຍາຍຜົນຫາກຸ່ມແກ້ງພັກພວກທີ່ຮ່ວມຂະບວນການດຽວກັນຢູ່ເຂດບ້ານ ສີມຸ່ງຄຸນ ໄດ້ 4 ຄົນຄື: ທ້າວ ເຢ້ອາຍຸ 26 ປີ ແລະ ທ້າວ ຈັນດີ ອາຍຸ 29 ປີ ທັງສອງຄົນເປັນປະຊາຊົນບ້ານປາກທ່ຽວ ເມືອງໄຊຍະບູລີ, ທ້າວ ຈາ ອາຍຸ 25 ປີ ປະຊາຊົນບ້ານຜາຄອຍ, ເມືອງປາກທາ ແຂວງບໍ່ແກ້ວ ແລະ ທ້າວ ເຈັງ ອາຍຸ 30 ປີ ປະຊາຊົນບ້ານທົ່ງກາບ ເມືອງຊຽງຮ່ອນ ແຂວງໄຊຍະບູລີ ຢຶດໄດ້ຂອງກາງຢາບ້າ 1 ມັດ ເທົ່າກັບ 2.000 ເມັດ ລົດເກັງ 1 ຄັນ ຍີ່ຫໍ້ KIA ສີປອນ-ເງິນ ໝາຍເລກທະບຽບ ກນ 0245 ກໍາແພງນະຄອນ; ແລະໃນເວລາ 17:00 ໂມງ ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງໄຊຍະບູລີ ກໍ່ໄດ້ສຶບຕໍ່ກັກຕົວເປົ້າໝາຍຄ້າ-ຂາຍຢາເສບຕິດຢູ່ຫ້ອງເຊົ່າ ເຂດບ້ານສີມຸ່ງຄຸນ ເມືອງໄຊຍະບູລີ ສາມາດກັກຕົວທ້າວ ທອງແກ້ວ ວ້າ ອາຍຸ 30 ປີ ປະຊາຊົນບ້ານປາງມອນ ເມືອງຄອບ ແຂວງໄຊຍະບູລີ ຜ່ານການກວດຄົ້ນເຄຫະສະຖານຫ້ອງເຊົ່າພົບເຫັນຂອງກາງ 14.200 ເມັດ ລົດຈັກ 1 ຄັນ ຍີ່ຫໍ້ຮອນດາເວບ 100 ໝາຍເລກທະບຽນ ຈຍ 6149 ໄຊຍະບູລີ.


  ຈາກນັ້ນ, ເຈົ້າໜ້າທີ່ຈຶ່ງໄດ້ນໍາເອົາຜູ້ຖືກຫາທັງ 6 ຄົນ ມາດໍາເນີນການສືບສວນ-ສອບສວນເພື່ອຂະຫຍາຍຜົນຫາກຸ່ມແກ້ງພັກພວກດຽວກັນມາລົງໂທດຕາມກົດ ໝາຍ.

------------------

ຂຽນໂດຍ: ສາຄອນ ໄຊສົມຮັກສາ  

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์