ຊາໂສມກາດອກຮັກ ເມືອງລະມາມ ກາຍເປັນສິນຄ້າໂອດັອບ

ພິທີມອບ-ຮັບໃບອະນຸຍາດນໍາໃຊ້ກາໝາຍໜຶ່ງເມືອງໜຶ່ງຜະລິດຕະພັນ (ODOP) ແຫ່ງຊາດໃຫ້ແກ່ເຈົ້າຂອງໂຮງງານຜະລິດຊາໂສມກາດອກຮັກເມືອງລະມາມແຂວງເຊກອງ ໄດ້ຈັດຂຶ້ນໃນວັນທີ 22 ກໍລະກົດ 2020 ທີ່ພະແນກອຸດສາຫະກໍາ ແລະການຄ້າແຂວງໂດຍມີທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ; ພ້ອມນີ້ກໍມີຫົວ ໜ້າພະແນກອຸດສາຫະກໍາ ແລະການຄ້າແຂວງ-ເມືອງ, ກຸ່ມຜະລິດ ແລະວິຊາການກ່ຽວຂ້ອງເຂົ້າຮ່ວມ.


  ໃນພິທີທ່ານ ຄໍາມ້າວ ສິງສະຫວັດ ຫົວໜ້າຫ້ອງການອຸດສາຫະກໍາ ແລະການຄ້າເມືອງລະມາມໄດ້ລາຍງານຫຍໍ້ກ່ຽວກັບການເຄື່ອນໄຫວຊຸກຍູ້ສົ່ງເສີມສິນຄ້າໂອດັອບຢູ່ເມືອງລະມາມຊຶ່ງການຄັດເລືອກສິນຄ້າໂອດັອບແມ່ນປະຕິບັດຕາມບົດແນະນໍາເລກທີ 3559/ສພຄ, ລົງວັນທີ່ 25 ພະຈິກ 2012 ກ່ຽວກັບເງື່ອນໄຂ ແລະຂັ້ນຕອນໃນການຄັດເລືອກສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດໂດຍຜ່ານການລົງເຄື່ອນໄຫວຕົວຈິງຢູ່ເມືອງລະມາມເຫັນວ່າຜະລິດຕະພັນສິນຄ້າທີ່ພົ້ນເດັ່ນ ແລະມີເງື່ອນ ໄຂທີ່ຈະກາຍເປັນສິນຄ້າໂອດັອບໄດ້ນັ້ນມີໜຶ່ງຜະລິດຕະພັນຄື: ຜະລິດຕະພັນຊາໂສມກາດອກຮັກຂອງທ່ານ ນາງ ສີສຸພັນ ບຸດດາວຽງ ຢູ່ບ້ານໃໝ່ຫົວເມືອງ.


  ຫຼັງຈາກນັ້ນ ທ່ານ ຄໍາໄຊ ໃສໄພແກ້ວ ວິຊາການໜ່ວຍງານສົ່ງເສີມຫັດຖະກໍາ, ຫ້ອງການອຸດສາຫະກໍາ ແລະການຄ້າເມືອງລະມາມໄດ້ລາຍງານປະຫວັດຄວາມເປັນມາ ແລະການນໍາໃຊ້ກາໝາຍໂອດັອບແຫ່ງຊາດວ່າ: ຊາໂສມເປັນຊາບໍາລຸງຮ່າງກາຍທີ່ຜະລິດຈາກໂສມທໍາມະຊາດຂອງເມືອງດາກຈຶງໂດຍມີສ່ວນປະສົມຂອງນໍ້າເຜິ້ງທໍາ ມະຊາດທີ່ມີພາຍໃນທ້ອງຖິ່ນແຂວງເຊກອງຊຶ່ງຜ່ານຂະບວນການຜະລິດຕາມຂັ້ນຕອນ ແລະ ຖືກຫຼັກອະນາໄມກາຍມາເປັນຜະລິດຕະພັນສໍາເລັດຮູບບັນຈຸຊອງຂະໜາດນ້ອຍ 2 ກຣາມ ໂດຍໃນ 1 ກັບມີ 30 ຊອງຂາຍໃນລາຄາ 80 ພັນກີບ, ຜະລິດຕະພັນຊາໂສມກາດອກຮັກໄດ້ມີການຈໍາໜ່າຍອອກສູ່ຕະຫຼາດທັງພາຍໃນ ແລະຕ່າງປະ ເທດເຊັ່ນ: ຂາຍສົ່ງໄປນະຄອນຫຼວງວຽງຈັນ ແລະຂາຍສົ່ງໃຫ້ນັກທຸລະກິດຊາວຈີນຈໍານວນໜຶ່ງ.


  ຂະນະທີ່ທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງໄດ້ກ່າວວ່າ: ແຂວງເຊກອງມີ 8 ຜະລິດຕະພັນທີ່ໄດ້ຮັບກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ ຫຼືໂອດັອບແລ້ວ 8 ຜະລິດຕະພັນຄື: ຜະລິດຕະພັນເຫຼົ້າໝາກຈັນ,ຜະລິດຕະພັນເຫຼົ້າໝາກກ້ວຍ,ຜະລິດຕະພັນເຫຼົ້າໝາກຂາມປ້ອມ, ຜະລິດຕະພັນເຫຼົ້າໝາກນັອດ, ຜະລິດຕະພັນຕໍ່າແຜ່ນແພ, ຜະລິດຕະພັນກາເຟສົດດາກຈຶງ, ຜະລິດຕະພັນກາເຟສົດທ່າແຕງ ແລະໄດ້ຮັບກາໝາຍສິນຄ້າໂອດັອບລ້າສຸດໃນຕອນແລງວັນທີ 22 ກໍລະ ກົດນີ້ເປັນຜະລິດຕະພັນທີ 8 ຄື: ຜະລິດຕະພັນຊາໂສມກາດອກຮັກຂອງທ່ານ ນາງ ສີສຸພັນ ບຸດດາວຽງ.


  ໃຫ້ກຽດມອບໃບຢັ້ງຢືນນໍາໃຊ້ກາໝາຍໂອດັອບຄັ້ງນີ້ແມ່ນທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ ແລະຮັບໂດຍທ່ານນາງ ສີສຸພັນ ບຸດດາວຽງ ເຈົ້າຂອງໂຮງງານຜະລິດຕະພັນຊາໂສມກາດອກຮັກ.

______________

ຂຽນໂດຍ: ສັນຍາ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์