ໄຟຟ້າຫຼວງພະບາງຫຼຸບທຶນເດືອນລະ 4,2 ຕື້ກີບ

 ລັດວິສາຫະກິດໄຟຟ້າລາວສາຂາ ແຂວງຫຼວງພະບາງ ປະຕິບັດການເກັບຮັບລາຍຮັບໃນ 6 ເດືອນຕົ້ນປີ 2020 ນີ້ໄດ້ທັງໝົດເກືອບ 93 ຕື້ກີບ, ທຽບໃສ່ 6 ເດືອນຕົ້ນປີ 2019 ຫຼຸດລົງ 7,47%, ຄະນະທີ່ລາຍຈ່າຍ 6 ເດືອນຕົ້ນປີນີ້ເມື່ອທຽບໃສ່ 6 ເດືອນຕົ້ນປີ 2019 ແມ່ນຫຼຸດລົງ 3,48%.
ທ່ານ ບຸນທັນ ພັນໂດລັກ ຫົວໜ້າລັດວິສາຫະກິດໄຟຟ້າລາວສາຂາແຂວງຫຼວງພະບາງໃຫ້ຮູ້ວ່າງບໍ່ດົນນີ້ວ່າ: ໃນໄລຍະ 6 ເດືອນຕົ້ນປີ 2020ນີ້ທາງໄຟຟ້າສາຂາແຂວງຫຼວງພະບາງໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານການບໍລິການໄຟຟ້າໃຫ້ສັງຄົມໄດ້ຊົມໃຊ້ຢ່າງເປັນປົກກະຕິໃນການເກັບລາຍຮັບ, ຄຸ້ມຄອງລາຍຈ່າຍເພື່ອໃຫ້ບັນລຸຕາເປົ້າໝາຍທີ່ວາງໄວ້ແຕ່ການເກັບລາຍຮັບຂອງຕົ້ນປີນີ້ປະຕິບັດໄດ້ທັງໝົດ 92.965 ລ້ານກີບ ເມື່ອທຽບໃສ່ປີຜ່ານມາແມ່ນຫຼຸດລົງ 7.47% ແລະ ດ້ານລາຍຈ່າຍປະ ຕິບັດໄດ້ທັງໝົດ 94.294 ລ້ານກີບ ທຽບໃສ່ 6 ເດືອນຕົ້ນປີ 2019 ຫຼຸດລົງ 3.48%. ດຸ່ນດ່ຽງຂາດທຶນທັງໝົດ 1.598 ລ້ານກີບ ທຽບໃສ່ 6 ເດືອນຕົ້ນປີ 2019 ຫຼຸດລົງ 164.35%. ສາຍເຫດຍ້ອນການແຜ່ລະບາດຂອງພະຍາດ COVID-19 ເຮັດໃຫ້ການຊົມໃຊ້ໄຟຟ້າຂອງລູກຄ້າຫຼາຍໃຫຍ່ຫຼຸດລົງພາໃຫ້ລາຍຮັບຈາກການຈຳໜ່າຍພະລັງງານໃຫ້ລູກຄ້າກໍ່ຫຼຸດລົງສະເລ່ຍ 4.222 ລ້ານກີບ ຕໍ່ເດືອນ.
  ທ່ານກ່າວຕື່ມວ່າເຖິງຢ່າງກໍຕາມໃນ 6 ເດືອນທ້າຍປີນີ້ຕ້ອງໄດ້ສືບຕໍ່ປະຕິບັດແຜນການທີ່ໄດ້ກໍານົດໄວ້ໂດຍສະເພາະຈະສຸມໃສ່ຜັນຂະຫຍາຍມະຕິກອງປະຊຸມ 6 ເດືອນຕົ້ນປີ 2020, ປະຕິບັດມາດຕາການເປັນຕົ້ນແມ່ນການຫຼຸດຜ່ອນພະລັງງານຕົກເຮັ່ຍ, ການແກ້ໄຂໄຟຕົກໄຟມອດ, ການຂຸດຄົ້ນແຫຼ່ງລາຍຮັບ ແລະ ສ້າງທີ່ມາງານໃຫ້ເຄື່ອນໄຫວເຕັມຮູບແບບ ແລະພະຍາຍາມຫຼຸດລາຍຈ່າຍລົງໃຫ້ຢູ່ໃນລະດັບ 10-20%.

แชร์