ກອງຄຸ້ມຄອງພາສີ VI ເກັບລາຍຮັບ 6 ເດືອນຕົ້ນປີໄດ້ 86,5% ຂອງແຜນການ

  ໃນກອງປະຊຸມສະຫຼຸບວຽກງານລາຍຮັບ 6 ເດືອນຕົ້ນປີ 2020 ຂອງກອງຄຸ້ມຄອງພາສີ VI (ສະຫວັນນະເຂດ-ຄຳມ່ວນ) ໄດ້ຈັດຂຶ້ນໃນອາທິດຜ່ານມາທີ່ຫ້ອງການດັ່ງກ່າວ, ພາຍໃຕ້ການເປັນປະທານຂອງທ່ານ ພົມມະຈັກ ສີພັນດອນ ຫົວໜ້າກອງ, ພ້ອມຄະນະ,ນອກນັ້ນກໍ່ມີບັນດາຄະນະດ່ານພາສີຊາຍແດນແຫ່ງຕ່າງໆ ຈຳນວນ 14 ດ່ານ (ດ່ານສາກົນ 4 ແຫ່ງ, ດ່ານປະຈຳທ້ອງຖິ່ນ 2 ແຫ່ງ ແລະດ່ານປະເພນີ 8 ແຫ່ງ) ເຂົ້າຮ່ວມ.

  ໂອກາດດັ່ງກ່າວ ທ່ານ ສົມຈິດ ລາຊະວົງ ຮອງຫົວໜ້າກອງຄຸ້ມຄອງພາສີ VI ກໍ່ໍໄດ້ຜ່ານບົດສະຫຼຸບການຈັດຕັ້ງປະຕິບັດແຜນລາຍຮັບ 6 ເດືອນຕົ້ນປີ, ພ້ອມທັງຜ່ານທິດທາງແຜນການ 6 ເດືອນທ້າຍປີ, ໄດ້ຍົກໃຫ້ເຫັນວ່າ: ສຳລັບ 6 ເດືອນຕົ້ນປີແຜນຕົວເລກລາຍຮັບຈຳນວນ 650 ຕື້ກີບ ໃນນັ້ນແຂວງສະຫວັນນະເຂດ 425 ຕື້ກີບ, ແຂວງຄຳມ່ວນ 225 ຕື້ກີບ, ຈາກການຈັດຕັ້ງປະຕິບັດຕົວຈິງໃນ 6 ເດືອນຜ່ານມາສາມາດຈັດຕັ້ງປະຕິບັດໄດ້ 562,46 ຕື້ກີບ ເທົ່າກັບ 86,53% ຂອງແຜນ ການໃນນີ້ແຂວງສະຫວັນນະເຂດປະຕິບັດໄດ້ 365,681 ຕື້ກີບ ເທົ່າກັບ 86%, ແຂວງຄຳມ່ວນ ປະຕິບັດໄດ້ 196,77 ຕື້ກີບ ເທົ່າກັບ 87,47%, ລາຍຮັບຕົ້ນຕໍແມ່ນໄດ້ຈາກ: ນໍ້າມັນເຊື້ອໄຟ 146,2 ຕື້ກວ່າກີບ, ພາຫະນະ (ເປັນຄັນ) 63,9 ຕື້ກີບ, ແກ້ໄຂລົດນຳເຂົ້າບໍ່ຖືກຕ້ອງ 29 ຕື້ກວ່າກີບ, ສິນຄ້າເພື່ອສົ່ງອອກຕໍ່ 116 ຕື້ກວ່າກີບ, ປັບໄໝ-ຂ່າຍເຄື່ອງຮິບ 5,6 ຕື້ກີບ, ຄ່າທຳນຽມຕ່າງໆ 142,4 ຕື້ກີບ ແລະລາຍຮັບອື່ນໆ 87,9 ຕື້ກີບ.

 ທ່ານ ສົມຈິດ ລາຊະວົງຍັງ ໃຫ້ຮູ້ຕື່ມວ່າ: ການເກັບລາຍຮັບໃນ 6 ເດືອນ ຜ່ານມາ, ຖ້າທຽບໃສ່ໃນໄລຍະດຽວຂອງປີກ່ອນກໍ່ເຫັນວ່າມີທ່ອ່ຽງເພີ່ມຂຶ້ນ, ແຕ່ປັດໄຈທີ່ເຮັດໃຫ້ລາຍຮັບບໍ່ໄດ້ຕາມແຜນກໍ່ຍ້ອນວ່າ: ຕົວເລກແຜນລາຍຮັບເຫັນວ່າເປັນຕົວເລກຂ້ອນຂ້າງສູງເມື່ອທຽບໃສ່ປີຜ່ານມາ, ສິນຄ້າເຄື່ອງຂອງບາງໝວດກໍ່ມີທ່າອ່ຽງເພີ່ມຂຶ້ນ, ແຕ່ບາງໝວດກໍ່ມີທ່າອ່ຽງຫຼຸດລົງ,ໂດຍສະເພາະນໍ້າມັນເຊື້ອໄຟມີທ່າອ່ຽງຫຼຸດລົງ 28%, ປະເພດພາຫະນະ (ເປັນຄັນ) ມີທ່າອ່ຽງຫຼຸດລົງ 11%, ແຕ່ສິນຄ້ານຳເຂົ້າ-ສົ່ງອອກຕໍ່ເພີ່ມຂຶ້ນ15% ແລະຄ່າທຳນຽມຕ່າງໆກໍ່ມີອັດຕາເພີ່ມຂຶ້ນ 72%.

  ສະເພາະ 6 ເດືອນທ້າຍປີຈະພ້ອມກັນສູ້ຊົນເກັບລາຍຮັບໃຫ້ໄດ້ 540,35 ຕື້ກີບ, ເທົ່າກັບ 83,13%, ຄາດຄະເນລາຍຮັບໝົດປີ 1.102 ຕື້ກວ່າກີບ ຫຼືເທົ່າກັບ 84,83% ຂອງແຜນການປີ, ໃນນັ້ນແຂວງສະຫວັນນະເຂດໃຫ້ໄດ້ 727,9 ຕື້ກວ່າກີບ, ແຂວງຄຳມ່ວນ ໃຫ້ໄດ້ 374,9 ຕື້ກວ່າກີບ.

  ໃນກອງປະຊຸມຄັ້ງນີ້ບັນດາຫົວໜ້າດ່ານຕ່າງໆກໍ່ໄດ້ຜັດປ່ຽນກັນຂຶ້ນປະກອບຄຳຄິດຄຳເຫັນເພື່ອສະເໜີໃຫ້ເຫັນເຖິງສະພາບຂໍ້ສະດວກ ແລະຂໍ້ຫຍຸ້ງຍາກໃນການຈັດຕັ້ງປະຕິບັດເພື່ອພ້ອມກັນຫາວິທີແກ້ໄຂ.

แชร์