ກຳປູເຈຍໃກ້ບັນລຸເປົ້າໝາຍສົ່ງອອກເຂົ້າ 1 ລ້ານໂຕນ

 ທ່ານ ຮຸນເຊນ ນາຍົກລັດຖະມົນຕີຂອງກຳປູເຈຍກ່າວໃນວັນທີ 22 ກໍລະກົດທີ່ຜ່ານມາວ່າເປົ້າໝາຍຂອງປະເທດທີ່ຈະສົ່ງອອກເຂົ້າໃຫ້ໄດ້ຢ່າງໜ້ອຍ 1 ລ້ານໂຕນ ອາດສຳເລັດໄດ້ພາຍໃນປີໜ້າຫຼືປີ 2022.

   ຕາມຂ່າວຕ່າງປະເທດລາຍງານວ່າຂະນະທີ່ທ່ານ ຮຸນເຊນ ເດີນທາງໄປຢ້ຽມຢາມແຂວງຕາແກ້ວເພື່ອຮຽນຮູ້ຂະບວນການທາງກະສິກຳຂອງປະເທດຜູ້ນໍາກຳປູເຈຍກ່າວວ່າເຖິງແມ່ນວ່າເປົ້າໝາຍການສົ່ງອອກເຂົ້າຈະຍັງບໍ່ສາມາດບັນລຸໄດ້ໃນປີ 2020 ນີ້ແຕ່ການສົ່ງອອກເຂົ້າໃນໄລຍະທີ່ຜ່ານມາສະແດງເຖິງສັກກະຍະພາບຂອງກຳປູເຈຍ, ຈົນເຖິງປະຈຸບັນນີ້ກຳປູເຈຍສົ່ງອອກເຂົ້າໄປແລ້ວປະມານ 400.000 ໂຕນ ດັ່ງນັ້ນເຮົາສາມາດຄາດວ່າເຮົາຈະບັນລຸເປົ້າໝາຍໄດ້ພາຍໃນປີ 2021 ຫຼື 2022, ໃນໄລຍະ 6 ເດືອນຕົ້ນປີ 2020 ກຳປູເຈຍສົ່ງອອກເຂົ້າໄປຕະຫຼາດຕ່າງປະເທດລວມທັງໝົດ 397.660 ໂຕນ ເພີ່ມຂຶ້ນ 41% ເມື່ອທຽບກັບໄລຍະເວລາດຽວກັນຂອງປີກ່ອນ ແລະສະເພາະໃນເດືອນມິຖຸນາປີນີ້ສົ່ງອອກເຂົ້າໄປທັງໝົດ 41.563 ໂຕນ ເພີ່ມຂຶ້ນ 10.197 ໂຕນຫຼື 32,5% ເມື່ອທຽບກັບປີກ່ອນ.

   ເຂົ້າຂອງກຳປູເຈຍສົ່ງອອກໄປ 56 ປະເທດທົ່ວໂລກໂດຍປະລິມານສົ່ງອອກເພີ່ມຂຶ້ນໃນທຸກໆປະເທດເມື່ອທຽບກັບປີ 2019 ເຊັ່ນ: ສະຫະພາບເອີຣົບເພີ່ມຂຶ້ນ 45,19%, ສປ ຈີນ ເພີ່ມຂຶ້ນ 25,20%, ປະເທດໃນກຸ່ມອາຊຽນເພີ່ມຂຶ້ນ 47,69% ເປັນຕົ້ນ.

 

 

แชร์