ໂຮມໄຊ ບ້ານແບບຢ່າງໃນການປູກຝັງ-ລ້ຽງສັດເປັນສິນຄ້າຂອງເມືອງສິງ

  ບ້ານໂຮມໄຊ ເມືອງສິງ ແຂວງຫຼວງນໍ້າທາ ສາມາດລຶບລ້າງຄວາມທຸກຍາກຂອງປະຊາຊົນພາຍໃນບ້ານໄດ້ແລ້ວ 95% ຂອງຈໍານວນຄອບຄົວທັງໝົດຍ້ອນອົງການປົກ ຄອງບ້ານຖືເອົາການຊຸກຍູ້ສົ່ງເສີມປະຊາຊົນປູກຝັງ-ລ້ຽງສັດເປັນສິນຄ້າເປັນອາຊີບຕົ້ນຕໍເພາະເປັນທ່າແຮງສໍາຄັນທີ່ປະຊາຊົນເຄີຍມີມູນເຊື້ອໃນດ້ານນີ້ມາແຕ່ດົນນານແລ້ວ.

  ໃນລະຫວ່າງວັນທີ 15-16 ກໍລະກົດ 2020 ທ່ານ ຄຳເຈນ ວົງໂພສີ ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນໍ້າທາເພື່ອຕິດຕາມຊຸກຍູ້ການສ້າງຂະບວນການດ້ານຕ່າງໆເພື່ອເປັນຜົນງານຕ້ອນຮັບກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິບັດວັດລາວ, ໃນນັ້ນໄດ້ໄປຢ້ຽມຢາມ ແລະຊຸກຍູ້ຂະບວນການຜະລິດເປັນສິນຄ້າຢູ່ບ້ານໂຮມໄຊຊຶ່ງເປັນບ້ານແບບຢ່າງໃນການປູກຝັງ-ລ້ຽງສັດເປັນສິນຄ້າຂອງເມືອງສີງທີ່ຂຶ້ນກັບກຸ່ມບ້ານຂວາງ, ມີທີ່ຕັ້ງຫ່າງຈາກເທສະບານເມືອງສິງ 6,5 ກິໂລແມັດ, ບ້ານດັ່ງກ່າວສ້າງຕັ້ງມາແຕ່ປີ 2003 ໂດຍຍ້າຍມາຈາກບ້ານຈາເຂີນ, ກຸ່ມຈຽງແຂງ, ປະຈຸບັນມີ 150 ຫຼັງຄາເຮືອນ 186 ຄອບຄົວ, ພົນລະເມືອງທັງໝົດ 819 ຄົນ, ຍິງ 419 ຄົນ,ອາຊີບຕົ້ນຕໍຂອງປະຊາຊົນແມ່ນປູກຝັງ ແລະລ້ຽງສັດ.

ໃນໂອກາດນີ້ຍັງໄດ້ຮັບຟັງການລາຍງານຈາກຕາງໜ້າຄະນະພັກ ແລະອົງການປົກຄອງບ້ານດັ່ງກ່າວກ່ຽວກັບສະພາບການຊີ້ນໍາໆພັດທະນາເສດຖະກິດ-ສັງຄົມຂອງບ້ານໃນແຕ່ລະດ້ານທີ່ຍາດມາໄດ້ໃນນີ້ສະເພາະດ້ານເສດຖະກິດຄະນະພັກ ແລະອົງການປົກຄອງບ້ານໄດ້ຊີ້ນໍາໆພາປະຊາຊົນເຮັດນາ, ເຮັດສວນ, ລ້ຽງສັດ, ຄ້າຂາຍ ແລະບໍລິການອື່ນໆ ເພື່ອສ້າງລາຍຮັບໃຫ້ຄອບຄົວ, ໃນນີ້ພົ້ນເດັ່ນແມ່ນການປູກຝັງ-ລ້ຽງສັດ, ທົ່ວບ້ານມີນາເຟືອງ 15 ເຮັກຕາ, ຜະລິດເຂົ້າເປືອກໄດ້ເກືອບ 20 ໂຕນຕໍ່ປີ, ປູກຢາງພາລາ 33 ເຮັກຕາ ສາມາດຜະລິດຢາງໄດ້ 35 ໂຕນຕໍ່ປີ, ອ້ອຍ 360 ເຮັກຕາ ສາມາດຈໍາໜ່າຍອອກສູ່ ສປ ຈີນ ໄດ້ 28,800 ໂຕນຕໍ່ປີ, ມີງົວ 952 ໂຕ, ຄວາຍ 367 ໂຕ, ໝູ 203 ໂຕ, ສັດປີກ 210 ໂຕ, ໜອງປາ 5 ໜອງ, ສ້າງກອງທຶນລວມຂອງບ້ານໄດ້ 130 ລ້ານກີບ ແລະສ້າງຄອບຄົວຕົວແບບດ້ານການປູກ-ການລ້ຽງໄດ້ 7 ຄອບຄົວ.

  ປະຈຸບັນປະຊາຊົນບ້ານໂຮມໄຊມີເຮືອນຖາວອນ 75 ຫຼັງ, ເຮືອນເຄີ່ງຖາວອນ 47 ຫຼັງ ແລະເຮືອນຊົ່ວຄາວ 28 ຫຼັງ, ປະຊາຊົນໄດ້ຊົມໃຊ້ໄຟຟ້າຖາວອນ 150 ຄົວ ເຮືອນ ແລະໃຊ້ລະບົບນໍ້າລິນ 150 ຄົວເຮືອນ, ສ່ວນເສັ້ນທາງໄປມາພາຍໃນບ້ານແມ່ນມີຄວາມສະດວກສະບາຍ, ສະເພາະປີ 2019 ຜ່ານມາບ້ານໂຮມໄຊສາມາດສ້າງລາຍຮັບໄດ້ 15 ຕື້ກີບ, ສະເລ່ຍໃສ່ຫົວຄົນໄດ້ 18,9 ລ້ານກີບ ຫຼື 2.162 ໂດລາສະຫະລັດຕໍ່ຄົນ, ມອບພາສີ, ອາກອນ ແລະ ຄ່າທໍານຽມຕ່າງໆເຂົ້າງົບປະມານຂອງລັດໄດ້ 13,5 ລ້ານກີບ, ມາຮອດປະຈຸບັນສາມາດລຶບລ້າງຄອບຄົວທຸກຍາກພາຍໃນບ້ານໄດ້ແລ້ວ 95% ຂອງຈໍານວນຄອບຄົວທັງໝົດ, ຂະນະທີ່ເດັກນ້ອຍໃນເກນອາຍຸໄດ້ເຂົ້າຮຽນປົກກະຕິໝົດແລ້ວ ແລະຄູສອນໄດ້ຮັບການເອົາໃຈໃສ່ເບິ່ງແຍງຈາກຂັ້ນເທີງ ແລະປະຊາຊົນພາຍໃນບ້ານ.

 ຢ່າງໃດກໍ່ຕາມຄຽງຄູ່ກັບຜົນສໍາເລັດໃນການຊີ້ນໍາໆພາປະຊາຊົນສ້າງເສດຖະກິດຂອງບ້ານກໍຄືເສດຖະກິດຂອງແຕ່ລະຄອບຄົວຍັງມີຫຼາຍຢ່າງທີ່ເປັນຂໍ້ຫຍຸ້ງຍາກທີ່ຄະນະ ພັກ ແລະອົງການປົກຄອງບ້ານໂຮມໄຊຕ້ອງສືບຕໍ່ແກ້ໄຂເປັນຕົ້ນ: ແບບແຜນການນໍາພາທີ່ຕິດພັນກັບຮາກຖານ, ຕິດພັນກັບປະຊາຊົນ, ຄວາມຮັບຜິດຊອບຕໍ່ໜ້າທີ່ວຽກ ງານທີ່ໄດ້ຮັບມອບໝາຍຂອງສະມາຊິກພັກບ້ານບ້ານຄົນບໍ່ທັນສູງ, ລະດັບຄວາມຮູ້ ແລະການເຊື່ອມຊຶມບັນດາມະຕິ, ຄໍາສັ່ງ ແລະບັນດາລະບຽບການຂອງສະມາຊິກພັກ ແລະປະຊາຊົນຍັງບໍ່ທັນສູງ ແລະອື່ນໆ ພ້ອມນີ້ຕາງໜ້າຄະນະພັກແລະອົງການປົກຄອງບ້ານດັ່ງກ່າວໄດ້ສະເໝີມາຍັງຂັ້ນເທີງຊ່ວຍສ້າງໂຮງຮຽນປະຖົມຫຼັງໃໝ່ໃຫ້ຍ້ອນຈໍານວນນັກຮຽນເພີ່ມຂຶ້ນທຸກປີເຮັດໃຫ້ຫ້ອງຮຽນບໍ່ພຽງພໍ, ພ້ອມນີ້ຍັງໄດ້ສະເໜີຂໍຄວາມຊ່ວຍເຫຼືອດ້ານແນວພັນສັດ ແລະຢາວັກແຊັງປ້ອງກັນພະຍາດສັດເພື່ອໃຫ້ບ້ານມີແນວພັນສັດທີ່ດີ ແລະໄດ້ຮັບການປ້ອງກັນພະຍາດທີ່ອາດຈະເກີດຂຶ້ນກັບສັດລ້ຽງໃຫ້ຫຼາຍຂຶ້ນກວ່າເກົ່າ.

  ໃນໂອກາດນີ້ ທ່ານ ຄຳເຈນ ວົງໂພສີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດໃນການພັດທະນາເສດຖະກິດ-ສັງຄົມຂອງບ້ານໂຮມໄຊເມືອງສິງແຂວງຫຼວງນໍ້າທາທີ່ຍາດມາໄດ້ຕະຫຼອດໄລຍະຜ່ານມາ,ພ້ອມນີ້ທ່ານໄດ້ໃຫ້ທິດຊີ້ນໍາຫຼາຍດ້ານເພື່ອເຮັດໃຫ້ການພັດທະນາເສດຖະກິດ-ສັງຄົມຂອງບ້ານກໍຄືການປັບປຸງຊີວິດການເປັນຢູ່ຂອງປະຊາຊົນພາຍໃນບ້ານໃຫ້ນັບມື້ດີຂຶ້ນເປັນຕົ້ນ: ການຍົກສູງຄວາມສາມັກຄີເປັນປຶກແຜ່ນພາຍໃນບ້ານໃຫ້ສູງຂຶ້ນກວ່າເກົ່າ, ການຊຸກຍູ້ຂະບວນການຜະລິດເປັນສິນຄ້າກໍຄືການປູກຝັງ ແລະລ້ຽງສັດທີ່ເປັນທ່າແຮງຕົ້ນຕໍຂອງບ້ານໃຫ້ນັບມື້ເປັນຂະບວນກວ້າງຂວາງ ແລະອື່ນໆ.

แชร์