ຄໍາມ່ວນ ມີບ້ານວັດທະນະທໍາກວມ 91% ຂອງບ້ານທົ່ວແຂວງ

  ຕະຫຼອດໄຊຍະຜ່ານມາພະແນກຖະແຫຼງຂ່າວວັດທະນະທໍາ ແລະທ່ອງທ່ຽວແຂວງຄໍາມ່ວນໄດ້ເອົາໃຈໃສ່ໃນການສ້າງບ້ານ ແລະ ຄອບຄົວວັດທະນະທໍາ, ຊຶ່ງມາຮອດປະຈຸບັນທົ່ວແຂວງມີບ້ານວັດທະນະທໍາທັງໝົດ 523 ບ້ານ ກວມເອົາ 91% ແລະສາມາດສ້າງຄອບ ຄົວວັດທະນະທໍາ 73.558 ພັນຄອບຄົວກວມເອົາ 90% ຂອງ ຄອບຄົວທັງໝົດໃນທົ່ວແຂວງ.

  ອີງຕາມບົດສະຫຼຸບກອງປະຊຸມໃຫຍ່ຄັ້ງທີ IV ຂອງຄະນະພັກ ຮາກຖານພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວ ແຂວງຄໍາມ່ວນ ໃຫ້ຮູ້ວ່າ: ວຽກ ງານການສ້າງຄົນ, ຄອບຄົວ, ບ້ານ, ກຸ່ມບ້ານ, ກົມກອງວັດທະນະທໍາ ແມ່ນອີງໃສ່ 5 ມາດຖານເງື່ອນໄຂຂອງຄອບຄົວວັດທະນະທໍາ ເຊັ່ນ:ຕ້ອງມີເຮືອນຢູ່ເປັນຂອງຕົນເອງແຕ່ເຄິ່ງຖາວອນຂຶ້ນໄປ, ມີອາຊີບໝັ້ນທ່ຽງຖືກຕ້ອງຕາມກົດໝາຍ ແລະກຸ້ມກິນຕ້ອງເປັນຄອບຄົວສາມັກຄີຖືກຕ້ອງປອງດອງກັນສະເໝີພາບ ແລະບໍ່ສ້າງຄວາມຫຍຸ້ງຍາກໃຫ້ແກ່ອໍານາດການປົກຄອງ,ຕ້ອງເອົາໃຈໃສ່ລ້ຽງລູກໃຫ້ຖືກຫຼັກອະນາໄມອົບຮົມສັ່ງສອນລູກເປັນຄົນມີຄວາມກະຕັນຍູຕໍ່ຜູ້ມີພະຄຸນ ແລະ ສົ່ງລູກໃຫ້ໄດ້ສຶກສາຮໍ່າຮຽນ; ຕ້ອງເປັນຄອບຄົວທີ່ດໍາລົງຊີວິດປອດ ໃສຂາວສະອາດບໍ່ເຊື່ອຖືງົມງວາຍ, ຮັກສາວັດທະນະທໍາຮີດຄອງປະເພນີອັນດີງາມຂອງຊາດ ແລະນັບຖືລະບຽບກົດໝາຍ; ຕ້ອງເປັນຄອບຄົວທີ່ມີຄວາມສາມັກຄີຊ່ວຍເຫຼືອ ເພື່ອແຜ່ເຊິ່ງກັນ ແລະກັນພາຍໃນບ້ານປະກອບສ່ວນສາທາລະນະ ປະໂຫຍດຂອງບ້ານເມືອງ.

  ຜ່ານການຈັດຕັ້ງປະຕິບັດສ້າງ ຄອບຄົວ ແລະບ້ານວັດທະນະທໍາໃນ 5 ປີຜ່ານມານີ້ທົ່ວແຂວງສາມາດສ້າງບ້ານວັດທະນະທໍາໄດ້ທັງ ໝົດ 207 ບ້ານ ແລະສ້າງຄອບຄົວວັດທະນະທໍາໄດ້ 37.900 ຄອບຄົວ, ຊຶ່ງມາຮອດປະຈຸບັນທົ່ວແຂວງ ມີບ້ານວັດທະນະທໍາທັງໝົດ 523 ບ້ານ ກວມເອົາ 91% ແລະສາມາດສ້າງຄອບຄົວວັດທະນະທໍາ 73.558 ພັນຄອບຄົວກວມເອົາ 90% ຂອງຄອບຄົວທັງໝົດໃນ ທົ່ວແຂວງ.

---------

ໜັງສືພິມເສດຖະກິດ-ສັງຄົມ

แชร์