ຕາດນົກເຄົ້າ ສະຖານທີ່ທ່ອງທ່ຽວ ທີ່ຫຼາຍຄົນອາດຍັງບໍ່ຮູ້

  ເຊກອງ ຖືເປັນແຂວງທີ່ໜ້າທ່ຽວທີ່ສຸດອີກແຂວງໜຶ່ງຂອງລາວປະຈຸບັນມີຫຼາຍກິດຈະກໍາການທ່ອງທ່ຽວແຕ່ທີ່ໂດດເດັ່ນແມ່ນນໍ້າຕົກຕາດຫຼາຍແຫ່ງທີ່ງົດງາມແລ້ວ ແຕ່ຄວາມສະດວກທີ່ທ່ານສາມາດ ເລືອກໄປໄດ້ເຊັ່ນ: ພູຫຼວງ, ຕາດ ແຝກ, ນໍ້າຕົກຕາດໝອກຈັນ ແລະ ອື່ນໆ ນອກນັ້ນທີ່ເຊກອງຍັງມີຕາດ ນົກເຄົ້າທີ່ສວຍງາມທີ່ກໍາລັງໄດ້ຮັບຄວາມນິຍົມ ຊຶ່ງຕັ້ງບ້ານໜອງບົງ ເມືອງລະມາມ ແຂວງເຊກອງ ຫ່າງຈາກເທສະບານເມືອງໄປ 14 ກິໂລແມັດ ແລະຫ່າງຈາກເສັ້ນທາງ ເລກທີ 16B ປະມານ 2 ກິໂລ ແມັດ.

    ຕາດນົກເຄົ້າ ໄດ້ເລີ່ມເປີດບໍລິການແຕ່ປີ 2008 ເປັນຕົ້ນມາແຕ່ກໍຍັງຮັກສາຄວາມເປັນທຳມະຊາດ ທີ່ອຸດົມສົມບູນໄວ້ໄດ້ໂດຍບໍ່ມີການດັດແປງແຕ່ຢ່າງໃດ, ເນື່ອງຈາກ ວ່າເປັນນໍ້າຕົກຕາດທີ່ທໍາມະຊາດສ້າງຂຶ້ນ, ອ້ອມຮອບໄປດ້ວຍປ່າ ໄມ້ນາໆພັນ ຈຶ່ງເຮັດໃຫ້ມີຄວາມ ຊຸ່ມເຢັນພ້ອມທັງມີນໍ້າໄຫຼຕະຫຼອດ ປີແບບບໍ່ເຫືອດແຫ້ງ, ສິ່ງດັ່ງກ່າວ ຖືໄດ້ວ່າເປັນຄວາມມະຫັດສະຈັນ ທາງທຳມະຊາດອີກຢ່າງໜຶ່ງທີ່ດຶງ ດູດນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ໄປທ່ຽວຊົມ ຊຶ່ງ ຕາດດັ່ງກ່າວກໍາເນີດເກີດຂຶ້ນຢູ່ຕາມລໍາຫ້ວຍວີແຕ່ຈະສັງເກດເຫັນວ່າ ໄລຍະທີ່ມີນັກທ່ອງທ່ຽວເຂົ້າໄປ ທ່ຽວຊົມຫຼາຍທີ່ສຸດແມ່ນໄລຍະລະດູແລ້ງເພາະໄລຍະດັ່ງກ່າວນໍ້າຈະ ໃສສາມາດແນມເຫັນສັດນໍ້ານາໆ ຊະນິດ ແລະກະແສນໍ້າກໍຈະບໍ່ໄຫຼ ແຮງເໝາະແກ່ການລົງໄປຫຼິ້ນນໍ້າ ເພື່ອຜ່ອນຄາຍຄວາມອິດເມື່ອຍ.

 ຕາມການບອກເລົ່າປາກຕໍ່ປາກ ກັນມາວ່າ: ໃນເມື່ອກ່ອນແມ່ນຊາວບ້ານໄດ້ພາກັນມາຫາກິນແລ້ວກໍໄດ້ພົບເຫັນໝູ່ນົກເຄົ້າມາເຮັດຮັງ ໃສ່ຢູ່ຕົ້ນໄມ້ໃຫຍ່ເທິງຕາດຕົ້ນໜຶ່ງຢ່າງຜິດປົກກະຕິ, ດັ່ງນັ້ນຊາວບ້ານ ຈຶ່ງໄດ້ເອີ້ນຊື່ຕາດນີ້ວ່າ: ຕາດນົກເຄົ້າຈົນມາຮອດປະຈຸບັນນີ້.

---------

ໂດຍ: ວົງມະນີ

แชร์