ຄຳມ່ວນ ປະຊຸມອົງການປົກຄອງແຂວງ

 ກອງປະຊຸມອົງການປົກຄອງ ແຂວງຄຳມ່ວນ ໄດ້ໄຂຂຶ້ນໃນລະຫວ່າງວັນທີ 20-21 ກໍລະກົດ 2020 ທີ່ເຮືອນຮັບແຂກເລກ 1 ໂດຍການເປັນປະທານຂອງທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ, ມີບັນດາທ່ານຄະນະການນຳຂອງແຂວງ, ອົງການໄອຍະການ, ສະພາປະຊາຊົນແຂວງ, ບັນດາທ່ານເຈົ້າເມືອງ, ພະແນກການອ້ອມຂ້າງ, ຜູ້ອຳນວຍການລັດວິສາຫະກິດອ້ອມຂ້າງແຂວງ ແລະຂະແໜງການຕ່າງໆທີ່ກ່ຽວຂ້ອງເຂົ້າຮ່ວມ.
  ໃນວາລະດຳເນີນກອງປະຊຸມບັນດາພະແນກການ, ຂະແໜງການຕ່າງໆ ໄດ້ລາຍງານການເຄື່ອນໄຫວວຽກງານແຕ່ລະຂົງເຂດໃນໄລຍະຜ່ານມາໂດຍສະເພາະແມ່ນຂໍ້ຄົງຄ້າງ ແລະມາດຕະການແກ້ໄຂໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2020 ພ້ອມທັງຮັບຟັງການລາຍງານ ແລະ ປະກອບຄຳເຫັນຕໍ່ວຽກງານຈຸດສຸມຂອງແຂວງ, ປຶກສາຫາລືບັນຫາສຳຄັນທີ່ພົວພັນກັບການຄຸ້ມຄອງລັດ-ຄຸ້ມຄອງສັງຄົມຂອງອົງການປົກຄອງແຂວງກໍ່ຄືອຳນາດການປົກຄອງ
  ທ້ອງຖິ່ນໃນໄລຍະຜ່ານມາ ແລະທິດທາງແຜນການໃນຕໍ່ໜ້າເພື່ອຜັນຂະຫຍາຍເນື້ອໃນຈິດໃຈມະຕິກອງປະຊຸມຄົບຄະນະບໍລິຫານງານພັກແຂວງຄັ້ງທີ 16 ສະໄໝທີ IX ເວົ້າສະເພາະໃນຂົງເຂດວຽກງານເສດຖະກິດ, ຂົງເຂດວັດທະນະທຳ-ສັງຄົມ, ກອງປະຊຸມຍັງໄດ້ພ້ອມກັນພິຈາລະນາ ແລະປະກອບຄຳເຫັນຢ່າງກົງໄປກົງມາ, ກະ ທັດຮັດ ແລະມີຈຸດສຸມລົງເລິກເຖິງບັນຫາທີ່ຍັງປະຕິບັດບໍ່ທັນໄດ້ດີ ແລະ ວຽກງານການແກ້ໄຂໄພແຫ້ງແລ້ງ, ການຕ້ານພະຍາດຕາມລະດູການ, ການແກ້ໄຂຄວາມທຸກ ຍາກຂອງປະຊາຊົນພ້ອມທັງສະເໜີທິດທາງ-ມາດຕະການຕົວຈິງເພື່ອປັບປຸງແກ້ໄຂ ແລະຍົກປະສິດທິພາບ-ປະສິດທິຜົນໃນການຄຸ້ມຄອງ-ບໍລິຫານໃຫ້ສູງຂຶ້ນ.
  ໂອກາດດັ່ງກ່າວ ທ່ານ ໂອໄດ ສຸດາພອນ ໄດ້ມີຄຳເຫັນ, ຮຽກຮ້ອງໃຫ້ສືບຕໍ່ເອົາໃຈໃສ່ວຽກງານຮັກສາສະຖຽນລະພາບທາງດ້ານການເມືອງ, ຄວາມສະຫງົບ ແລະເປັນລະບຽບຮຽບຮ້ອຍໃນສັງຄົມເພື່ອສ້າງສະພາບແວດລ້ອມ ແລະເງື່ອນໄຂໃຫ້ແກ່ການພັດທະນາຢ່າງຕໍ່ເນື່ອງ, ສືບຕໍ່ແກ້ໄຂບັນຫາເສດຖະກິດເພື່ອໃຫ້ມີທິດຫັນປ່ຽນທີ່ໜັກແໜ້ນສູ້ຊົນໃຫ້ບັນລຸຄາດໝາຍຂອງແຜນພັດທະນາເສດຖະກິດ-ສັງຄົມ ປີ 2020 ທີ່ສະພາໄດ້ຮັບຮອງ, ສືບຕໍ່ພັດທະນາທາງດ້ານສັງຄົມໂດຍເອົາໃຈໃສ່ປັບປຸງຄຸນນະ ພາບການສຶກສາ ແລະ ສາທາລະນະສຸກໃນເຂດຊົນນະບົດຫ່າງໄກສອກຫຼີກ, ປັບປຸງກົນໄກປະສານງານ ແລະ ປະສານສົມທົບລະຫວ່າງຂະແໜງການຂັ້ນແຂວງ ແລະ ຂັ້ນເມືອງໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ສືບຕໍ່ບຸກບືນໃນການຊີ້ນຳ, ຕິດຕາມ, ຊຸກຍູ້ ແລະ ກວດກາການຈັດຕັ້ງປະຕິບັດບັນດາວຽກ ງານຈຸດສຸມພາຍໃຕ້ຄວາມຮັບຜິດຊອບຂອງຕົນໃຫ້ມີປະສິດທິຜົນ.

____________

ຂຽນໂດຍ: ກອງຄຳ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์