ສກຈຮ ຈໍາປາສັກ ສືບຕໍ່ຂະຫຍາຍຕົວໃນລະດັບດີ ເຖີງຈະໄດ້ຮັບຜົນກະທົບຈາກໂຄວິດ-19

 ເຖິງແມ່ນວ່າການແຜ່ລະບາດຂອງພະຍາດໂຄວິດ-19 ຈະສົ່ງຜົນເຮັດໃຫ້ທຸລະກິດຫຼາຍຂະແໜງການໃນບ້ານເຮົາໄດ້ຮັບຜົນກະທົບລວມທັງລະບົບທຸລະກິດທະນາຄານກໍ່ໄດ້ຮັບຜົນກະທົບໄປຕາມໆກັນຈົນເຮັດໃຫ້ທຸລະກິດໃນ 3-4 ເດືອນຜ່ານມາງຽບເຫງົາພໍສົມຄວນ; ໃນຂະນະທີ່ຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ເຜີຍວ່າໄດ້ຮັບຜົນກະທົບເຊັ່ນດຽວກັນແຕ່ສະຖາບັນໄດ້ມີການປັບປຸງໜ້າວຽກຫຼາຍດ້ານເພື່ອເຮັດໃຫ້ກິດຈະການສາມາດຜ່ານຜ່າວິກິດ ແລະໃຫ້ສາມາດສືບຕໍ່ຂະຫຍາຍຕົວໃນລະດັບດີພໍສົມຄວນ.


 ທ່ານ ໜູເຄືອບ ສິດທິເດດ ຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ຈໍາກັດ (ສກຈຮ) ໄດ້ເປີດເຜີຍຕໍ່ນັກຂ່າວໜັງສືພິມເສດຖະກິດ-ສັງ ຄົມເມື່ອບໍ່ດົນມານີ້ໃຫ້ຮູ້ວ່າ: ສະຖາບັນການເງິນຂອງພວກເຮົາໄດ້ມີການປັບປຸງລະບົບການບໍລິຫານ ແລະດໍາເນີນງານຢ່າງຕໍ່ເນື່ອງ ແລະເປັນປະຈໍາ, ໂດຍພວກເຮົາໄດ້ວາງຍຸດທະສາດເນັ້ນໜັກການເຕີບໂຕທີ່ແຕກຕ່າງວາງແນວທາງການເຕີບໂຕທີ່ຄຽງຄູ່ກັບການຂະຫຍາຍຕົວຂອງລູກຄ້າ, ຖືເອົາຄວາມຕ້ອງການຂອງລູກຄ້າເປັນຈຸດສໍາຄັນໃນການວາງແຜນອອກແບບຜະລິດຕະພັນເງິນກູ້, ເງິນຝາກ ແລະ ການບໍລິການທາງການເງິນຈຸລະພາກ, ໂດຍສະເພາະພວກເຮົາໄດ້ນໍາເອົາ 7 ຫຼັກການໃນການ ປົກປ້ອງລູກຄ້າທີ່ກໍານົດໂດຍໂຄງການສະມາດແຄມເປນມາຜັນຂະຫຍາຍເຂົ້າໃນການດໍາເນີນທຸລະກິດ ແລະ ການບໍລິການການເງິນຈຸລະພາກຄືໜຶ່ງ: ການອອກແບບ ແລະ ນໍາສະເໜີຜະລິດຕະພັນ ທີ່ເໝາະສົມ,
   ສອງ: ການປ້ອງກັນການມີໜີ້ສິນລົ້ນຕົວ, ສາມ: ມີຄວາມໂປ່ງໃສໃນການບໍລິການ, ສີ່: ມີການກໍານົດລາຄາ, ອັດຕາດອກເບ້ຍທີ່ເປັນທໍາ, ຫ້າ: ການປະຕິບັດຕໍ່ລູກ ຄ້າດ້ວຍຄວາມເຄົາລົບ ແລະ ຍຸຕິທໍາ, ຫົກ: ປົກປ້ອງຄວາມເປັນສ່ວນຕົວຂອງຂໍ້ມູນລູກຄ້າ ແລະ ເຈັດ: ມີກົນໄກສົ່ງຜ່ານຄໍາຕໍານິຕິຊົມຢ່າງເປັນລະບົບ, ດັ່ງນັ້ນຈຶ່ງສາ ມາດເວົ້າໄດ້ວ່າລູກຄ້າຄືໝາກຫົວໃຈໃນການໃຫ້ບໍລິການຂອງພວກເຮົາ.


  ທ່ານຜູ້ອໍານວຍການກ່າວຕື່ມວ່າ: ສໍາລັບການແຜ່ລະບາດຂອງພະຍາດໂຄວິດ-19 ເມື່ອຕົ້ນປີ 2020 ແລະຍັງມີການແຜ່ລະບາດໃນປະເທດໃກ້ຄຽງ ແລະບ້ານເຮົາກໍ່ຍັງໄດ້ມີການເຝົ້າລະວັງຢ່າງຈິງຈັງຕໍ່ພະຍາດດັ່ງກ່າວ, ຊຶ່ງມັນໄດ້ສົ່ງຜົນກະທົບບໍ່ໜ້ອຍຕໍ່ການພັດທະນາເສດຖະກິດຂອງປະເທດ, ບັນດາທຸລະກິດໃນທຸກຂະແໜງແມ່ນໄດ້ຮັບຜົນກະທົບບໍ່ໜ້ອຍ,ສະຖານະທາງດ້ານການເງິນຂອງຫຼາຍບໍລິສັດແມ່ນມີລັກສະນະທີ່ບໍ່ຄອງຕົວ, ຊຶ່ງສໍາລັບທຸລະກິດທາງດ້ານການເງິນ, ການທະນາຄານກໍ່ໄດ້ຮັບຜົນກະທົບໄປຕາມໆກັນ, ແຕ່ຍ້ອນພວກເຮົາໄດ້ໃຫ້ບໍລິການຜະລິດຕະພັນທີ່ບໍ່ມີຄວາມເສຍ ແລະມີການບໍລິຫານຈັດການທີ່ຮັດກຸມ, ມີການປັບປຸງລະບົບການບໍລິຫານຈັດ ການທີ່ດີເພື່ອໃຫ້ສາມາດສຶບຕໍ່ກິດຈະການຜ່ານຜ່າການລະບາດໂຄວິດ-19 ຢ່າງມີປະສິດທິພາບຄື: ພວກເຮົາໄດ້ມີນະໂຍບາຍແກ້ໄຂທີ່ສອດຄ່ອງກັບຂໍ່ຕົກລົງຂອງທະນາ ຄານ ແຫ່ງ ສປປ ລາວ ກ່ຽວກັບນະໂຍບາຍການເລື່ອນຊໍາລະ ແລະ ປັບໂຄງສ້າງໜີ້ໃຫ້ລູກຄ້າທີ່ຖືກຜົນກະທົບຈາກການລະບາດຂອງພະຍາດໂຄວິດ-19 ບໍ່ວ່າ ຈະເປັນທາງກົງ ຫຼືທາງອ້ອມເຊັ່ນ: ລູກຄູ້າເງິນກູ້ຜະລິດຕະພັນແມ່ຍິງແມ່ນສາມາດຂໍເລື່ອນຊໍາລະເງິນກູ້ (ທັງຕົ້ນທຶນ ແລະດອກເບ້ຍ) ໄດ້ຕິດຕໍ່ກັນທັງໝົດ 4 ງວດ, ລູກຄ້າທີ່ໃຊ້ເງິນເດືອນຄໍ້າປະກັນການກູ້ຢຶມສາມາດເລື່ອນການຊໍາລະ (ທັງຕົ້ນທຶນ ແລະດອກເບ້ນ) ໄດ້ຕິດຕໍ່ກັນສູງສຸດ 2 ຄັ້ງ ແລະປັບປຸງໂຄງສ້າງເງິນກູ້ໃໝ່ໃຫ້ລູກຄ້າທີ່ເປັນໜີ້ທວງຍາກມີລະດັບຄວາມສ່ຽງປານກາງລົງມາໂດຍໃຫ້ອະນຸມັດເງິນກູ້ຕາມເງື່ອນໄຂການຊໍາລະ ແລະຄວາມຈໍາເປັນຂອງຜູ້ກ່ຽວພ້ອມການບໍລິການ ແລະ ນະໂຍບາຍອື່ນທີ່ເປັນທາງເລືອກທີ່ດີໃຫ້ກັບລູກຄ້າ,ດັ່ງນັ້ນຈຶ່ງເຮັດໃຫ້ ສກຈຮ ຈໍາປາສັກ ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະ ເຮັດໃຫ້ຜົນການດໍາເນີນທຸລະ ກິດໃນ 6 ເດືອນຕົ້ນປີ 2020 ສາມາດມີຜົນກໍາໄລແລ້ວປະມານ 7,7 ຕື້ກີບ ແລະຄາດວ່າໝົດປີນີ້ສະຖາບັນຈະມີຜົນກໍາໄລເພີ່ມຂຶ້ນຈາກປີ 2019.

______________

ຂຽນໂດຍ: ໂພທິຣາຊ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์