ສກຂ ສາລະວັນ ຈັດກິດຈະກຳສະຫຼອງວັນກີລາ-ກາຍະກຳແຫ່ງຊາດ

  ພະແນກສຶກສາທິການ ແລະກີລາແຂວງສາລະວັນ ( ສກຂ ສາລະວັນ) ຈັດກິດຈະກຳເຕັ້ນແອໂຣບິກເພື່ອສຸຂະພາບເພື່ອສະເຫຼີມສະຫຼອງວັນກີລາ-ກາຍະກຳແຫ່ງຊາດ ຄົບຮອບ 54 ປີ, ວັນໂອແລມປິກແຫ່ງຊາດຄົບຮອບ 41 ປີ ແລະ ວັນໂອແລມປິກສາກົນຄົບຮອບ 125 ປີ ໄດ້ຈັດຂຶ້ນໃນວັນທີ 14  ກໍລະກົດ ຜ່ານມານີ້ໂດຍເຂົ້າຮ່ວມ ເປັນກຽດຂອງທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ, ທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະກີລາແຂວງ, ບັນດາຄະນະນຳຂອງແຂວງ, ຂອງເມືອງ, ພະແນກແນກການກອງບັນຊາການທະຫານ-ຕຳຫຼວດ, ອົງການຈັດຕັ້ງພັກ-ລັດ, ກົມກອງ,ຫ້ອງການລັດວິສາຫະກິດ ແລະປະຊາຊົນບັນດາເຜົ່າໃນເທດສະບານເຂົ້າຮ່ວມຢ່າງເປັນຂະບວນການຟົດຟື້ນ.

  ທ່ານ ວັດທະນາ ໜັ້ນວິໄລ ຮອງຫົວໜ້າພະແນກສຶກສາທິການ ແລະກີລາແຂວງກໍ່ໃຫ້ກຽດຂຶ້ນຜ່ານປະຫວັດຄວາມເປັນມາຂອງ 3 ວັນ ປະຫວັດສາດຂອງວຽກງານກີລາກາຍະກຳໃຫ້ຮູ້ວ່າ: ການສະເຫຼີມສະຫຼອງ 3 ວັນປະຫວັດສາດທີ່ສໍາຄັນຂອງກີລາ-ກາຍະກຳນີ້ກໍ່ແມ່ນເພື່ອເປັນການປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງວຽກງານກີລາ-ກາຍະກຳຂອງຊາດກໍ່ຄືຂອງແຂວງໃຫ້ມີການພັດທະນາດີຂຶ້ນຢ່າງບໍ່ຢຸດຢັ້ງທັງເປັນການສ້າງກິດຈະກຳເຜີຍແຜ່ນະໂຍບາຍວຽກງານກີລາ-ກາ ຍະກຳ ແລະເຕົ້າໂຮມຄວາມສາມັກຄີໃຫ້ເປັນປຶກແຜ່ນແໜ້ນໜາເຮັດໃຫ້ວຽກງານກີລາກາຍເປັນຂອງປວງຊົນຫັນເອົາວຽກງານກີລາລົງສູ່ປະຊາຊົນບັນດາເຜົ່າ ແລະ ສົ່ງ ເສີມໃຫ້ຊາວໜຸ່ມ-ເຍົາວະຊົນກໍ່ຄືທົ່ວສັງຄົມຫັນມາຫິ້ນກີລາເພື່ອສຸຂະພາບເພື່ອຮ່າງກາຍຂອງຄົນເຮົາທີ່ແຂງແຮງ, ສວຍງາມມີຈິດໃຈເບີກບານມ່ວນຊື່ນສະໝອງໄດ້ຮັບການພັດທະນາມີຄວາມຊຳນິຊຳນານມີປະສົບການທາງດ້ານເຕັກນິກມີມິດຕະພາບ ແລະການນໍາໃຊ້ເວລາຫວ່າງໃຫ້ເກີດປະໂຫຍດ ແລະ ມີຄຸນຄ່າ, ບໍ່ມົ້ວສຸມກັບສິ່ງເສບ ຕິດ.

 ເພື່ອສືບຕໍ່ໃນການພັດທະນາກີລາ-ກາຍະກຳຢູ່ພາຍໃນແຂວງໃຫ້ມີການຂະຫຍາຍຕົວຢ່າງຕໍ່ເນື່ອງ ແລະມີຜົນສຳເລັດໃນການເຂົ້າຮ່ວມແຂ່ງຂັນໃນລະດັບຊາດດີຂຶ້ນເລື້ອຍຕ້ອງສ້າງຕັ້ງ ແລະປັບປຸງອົງການບໍລິຫານຄຸ້ມຄອງການກີລາ,ສະຫະພັນ ແລະສະໂມສອນການກີລາປະເພດຕ່າງໆ ໃຫ້ມີຄວາມເຂັ້ມແຂງ,ກໍ່ສ້າງພື້ນຖານໂຄງລ່າງການກີລາໃນລະດັບແຂວງ, ເມືອງ, ສຳນັກງານ, ໂຮງຮຽນໃຫ້ພຽງພໍ ແລະ ຖືກມາດຕະຖານ, ສະໜອງອຸປະກອນການຫຼິ້ນກີລາໃຫ້ໂຮງຮຽນ ແລະຊຸມຊົນໂດຍມີສ່ວນຮ່ວມຈາກລາຍພາກສ່ວນ, ກໍ່ສ້າງບຸກຄະລາກອນໃຫ້ພຽງພໍ ແລະ ມີຄຸນນະພາບກີລາບາງປະເພດເຊັ່ນ: ບານເຕະ, ບານສົ່ງ, ເປຕັງ, ມວຍ ແລະ ແລ່ນ-ລານຕ້ອງກ້າວໄປສູ່ ການສ້າງເປັນນັກກິລາອາຊີບ, ຊຸກຍູ້ສົ່ງເສີມຂະບວນການອອກກຳລັງກາຍ ແລະvການຫຼິ້ນກີລາໃນທົ່ວສັງຄົມໃຫ້ກວ້າງຂວາງ ແລະຟົດຟື້ນ.

  ຈາກນັ້ນຂະບວນການເຕັ້ນແອໂຣບິກເພື່ອສຸຂະພາບກໍ່ໄດ້ເລີ່ມຕົ້ນຂຶ້ນທີ່ເດີ່ນຕະຫຼາດ AB ໂຊກໄຊ ສາລະວັນຢ່າງມີບັນຍາກາດຟົດຟື້ນ.

 

แชร์