ຄຶກຄັກງານຕະຫຼາດນັດຈຳໜ່າຍສິນຄ້າໂອດັອບທີ່ຈຳປາສັກ

  ວັນທີ 15 ກໍລະກົດຜ່ານມາທີ່ສະໜາມກີລາຫຼັກ 2 ນະຄອນປາກເຊ ແຂວງຈໍາປາສັກ ພະແນກອຸດສາຫະກໍາ ແລະ ການຄ້າຮ່ວມກັບສະພາການຄ້າ-ອຸດສາຫະກໍາ ແລະສະມາຄົມນັກທຸລະກິດໜຸ່ມແຂວງຈັດງານຕະຫຼາດນັດວາງສະແດງ ແລະຈໍາໜ່າຍສິນຄ້າປະເພດອຸດສາຫະກໍາ, ຫັດຖະກໍາ ແລະກະສີກໍາຂຶ້ນ, ໂດຍການໃຫ້ກຽດເຂົ້າຮ່ວມຂອງທ່ານ ມະໄລທອງ ກົມມະສິດ ຮອງເຈົ້າແຂວງໆ ຈໍາປາສັກ, ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະການຄ້າ, ພ້ອມນີ້ກໍມີບັນດາທ່ານການນໍາຂັ້ນແຂວງ, ນະຄອນ ແລະເມືອງເຂົ້າຮ່ວມ.
  ທ່ານ ບຸນຍະເດດ ທອງສະຫວັນ ກ່າວວ່າ: ຈຸດປະສົງຂອງການຈັດງານຕະຫຼາດນັດຄັ້ງນີ້ກໍ່ເພື່ອເປັນການສົ່ງເສີມຜະລິດຕະພັນພາຍໃນເປັນຕົ້ນສິນຄ້າປະເພດອຸດສາ ຫະກໍາ, ຫັດຖະກໍາ ແລະກະສີກໍາຂອງຫົວໜ່ວຍຜະລິດ, ຜູ້ປະກອບການທີ່ມີຢູ່ແລ້ວໃຫ້ມີການຂະຫຍາຍຕົວຢ່າງກວ້າງຂວາງຂື້ນ, ເປັນຕົ້ນສິນຄ້າທີ່ໄດ້ຮັບກາໝາຍໜື່ງເມືອງໜື່ງຜະລິດຕະພັນ (ODOP) ຂອງແຂວງໃຫ້ຈໍລະຈອນຊື້-ຂາຍແກ້ຜູ້ຊົມໃຊ້ ແລະ ຕອບສະໜອງຄວາມຮຽກຮອງຕ້ອງການຂອງສັງຄົມ, ເພາະຖ້າສິນຄ້າທີ່ຜະ ລິດໄດ້ຮັບການຈໍາ ໜ່າຍ ຫຼືຕະຫຼາດຮອງຮັບຢ່າງກວ້າງຂວາງເທົ່າໃດກໍ່ຍີ່ງເປັນປັດໄຈສໍາຄັນໃຫ້ແກ່ການແກ້ໄຂຄວາມທຸກຍາກຂອງປະຊາຊົນກໍ່ຄືເຮັດໃຫ້ເສດຖະກິດການຄ້າຂອງແຂວງມີການຂະຫຍາຍຕົວກ້າວຂຶ້ນຕາມແນວທາງນະໂຍບາຍທີ່ພັກວາງອອກ.


  ງານຕະຫຼາດນັດວາງສະແດງ ແລະຈໍາໜ່າຍສິນຄ້າຄັ້ງນີ້ແມ່ນຈະດຳເນີນເປັນເວລາ 5 ວັນຄື:
  ວັນທີ 15-19 ກໍລະກົດ 2020 ມີຮ້ານຄ້າວາງສະແດງ-ຈໍາໜ່າຍທີ່ມາຈາກ 9 ເມືອງ 1 ນະຄອນ, ມີຫົວໜ່ວຍທຸລະກິດຜູ້ປະກອບການທັງໝົດ 50 ກວ່າຮ້ານ, ອັນທີ່ພົ້ນເດັ່ນມີສີນຄ້າຜ້າໄໝບ້ານສະຜ່ານ, ເມືອງຊະນະສົມບູນ, ເຄື່ອງຫັດຖະກໍາແກະສະຫລັກໄມ້ ເມືອງປະທຸມພອມ, ກາເຟ, ຊາ, ພຶດຜັກ ແລະໝານໄມ້, ຖົ່ວລຽນໃຫຍ່, ເຫຼົ້າໄຫ ເມືອງບາຈຽງຈະເລີນສຸກ.

____________

ຂ່າວ: ໂພທິຣາຊ, ໜັງສືພິມເສດຖະກິດ-ສັງຄົມ

แชร์