ນໍ້າຖ້ວມໜັກໃນອິນເດຍເສຍຊີວິດ 50 ຄົນ

   ເຈົ້າໜ້າທີ່ລັດຖະບານອິນເດຍຖະແຫຼງໃນວັນທີ 15 ກໍລະກົດທີ່ຜ່ານມາວ່າມີຜູ້ເສຍຊີວິດແລ້ວຢ່າງໜ້ອຍ 50 ຄົນ ແລະອີກຫຼາຍກວ່າ 2 ລ້ານຄົນ ໄດ້ຮັບຜົນກະທົບຈາກນໍ້າຖ້ວມໜັກໃນລັດອັສສຳທາງຕາເວັນອອກສຽງເໜືອຂອງປະເທດ.

  ຕາມຂ່າວຕ່າງປະເທດລາຍງານວ່າ ໃນລະດູຝົນມັກຈະເກີດຝົນຕົກໜັກເປັນປົກກະຕິໃນອິນເດຍ ແຕ່ສຳລັບປີນີ້ລະດູຝົນເກີດຂຶ້ນໃນຂະນະທີ່ອິນເດຍກຳລັງຕໍ່ສູ້ກັບການແຜ່ລະບາດຂອງເຊື້ອໂຄວິດ- 19 ທີ່ມີຜູ້ຕິດເຊື້ອ ແລະ ເສຍຊີວິດສູງຂຶ້ນເລື້ອຍໆ ໂດຍມີຜູ້ຕິດເຊື້ອໂຄວິດເກືອບ 1 ລ້ານຄົນ ແລະ ເສຍຊີວິດ 24.309 ຄົນ, ເຈົ້າໜ້າທີ່ລະບຸວ່າ ພື້ນທີ່ສວນອຸທິຍານ ແຫ່ງຊາດກາຊີຣັງຄາໃນລັດອັສສຳ ຊຶ່ງເປັນມໍລະດົກໂລກກໍຖືກນໍ້າຖ້ວມ ແລະມີສັດປ່າຢ່າງໜ້ອຍ 51 ໂຕຕາຍ ເຈົ້າໜ້າທີ່ສາມາດຊ່ວຍຊີວິດໄດ້ 170 ໂຕ, ເຈົ້າໜ້າທີ່ເຂົ້າໄປຊ່ວຍເຫຼືອຜູ້ປະສົບໄພພ້ອມທັງຕັ້ງສູນພັກຊົ່ວຄາວ 480 ແຫ່ງ ເພື່ອຮອງຮັບຜູ້ປະສົບໄພຫຼາຍກວ່າ 60 ພັນຄົນ ຊຶ່ງຖະໜົນ ແລະ ອາ ຄານບ້ານເຮືອນໃນຫຼາຍພື້ນທີ່ຂອງລັດຈົມຢູ່ໃຕ້ນໍ້າ ແລະມີຜູ້ເສຍຊີວິດແລ້ວຢ່າງໜ້ອຍ 50 ຄົນ ແລະອີກຫຼາຍກວ່າ 2 ລ້ານຄົນ ໄດ້ຮັບຜົນກະທົບຈາກນໍ້າຖ້ວມໜັກ.

  ລັດອັສສຳມັກໄດ້ຮັບຄວາມເດືອດຮ້ອນຈາກຝົນຕົກໜັກເປັນປະຈຳທຸກປີສົ່ງຜົນເຮັດໃຫ້ເກີດນໍ້າຖ້ວມ ແລະດິນເຈື່ອນໂດຍໄລຍະເວລາດຽວກັນຂອງປີ 2019 ໄດ້ຮັບຄວາມເສຍຫາຍຢ່າງໜັກ ແລະມີຜູ້ເສຍຊີວິດເກືອບ 100 ຄົນ.

____________

ໜັງສືພິມເສດຖະກິດ-ສັງຄົມ

แชร์