ໂຮຈີມິນຈະເກັບເງິນຄ່າຂັບລົດເຂົ້າເມືອງ

  ທາງການນະຄອນໂຮຈີມິນ ຂອງ ສສ ຫວຽດນາມ ຈະເລີ່ມເກັບຄ່າທຳນຽມກັບຜູ້ທີ່ຂັບລົດ ເຂົ້າມາໃນເຂດໃຈກາງເມືອງນັບຕັ້ງແຕ່ປີ 2021 ຫຼັງຈາກສະມາຊິກສະພາມີມະຕິທີ່ຈະສົ່ງເສີມລະບົບຂົນສົ່ງສາທາລະນະ ແລະຄວບຄຸມຈຳນວນລົດສ່ວນຕົວໃນເມືອງ ທີ່ເປັນສູນກາງທາງເສດຖະກິດຂອງປະເທດ.

  ຕາມຂ່າວຕ່າງປະເທດລາຍ ງານວ່າຄົນຂັບລົດຕ້ອງຈ່າຍຄ່າທຳນຽມເມື່ອພວກເຂົາເຂົ້າມາໃນເຂດໃຈກາງເມືອງນັບຕັ້ງແຕ່ປີ 2021 ເຖິງປີ 2025 ນອກຈາກ ນີ້ໜ່ວຍງານທີ່ກ່ຽວຂ້ອງຈະຄອຍສຳຫຼວດການປ່ອຍອາຍພິດລົດ ແລະເກັບຄ່າທຳນຽມມົນລະພິດ ສິ່ງແວດລ້ອມລະຫວ່າງປີ 2021-2030, ສະພາປະຊາຊົນນະຄອນ ໂຮຈີມິນລະບຸວ່າ ແຜນການຄັ້ງນີ້ ມີຄວາມສຳຄັນຕໍ່ການພັດທະນາ ເສດຖະກິດ ແລະສັງຄົມຂອງເມືອງ ລວມທັງຄວາມເປັນຢູ່ຂອງຊາວ ເມືອງ ພ້ອມທັງເນັ້ນໜັກວ່າການ ປັບປຸງລະບົບຂົນສົ່ງສາທາລະນະ ແລະການຈຳກັດຈຳນວນລົດສ່ວນຕົວຕ້ອງດຳເນີນໄປພ້ອມໆກັນ ໂດຍ ລັດຖະບານຈະເປັນຜູ້ຮັບຜິດຊອບການກໍ່ສ້າງໂຄງສ້າງພື້ນຖານ ແລະຈັດການລະບົບຂົນສົ່ງສາທາລະນະຂອງເມືອງ, ກະຊວງຄົມມະນາຄົມລະບຸວ່າລະຫວ່າງປີ 2021-2025 ນະຄອນໂຮຈີມິນເນັ້ນທີ່ປັບປຸງບໍລິການລົດໂດຍສານ ແລະ ການຈັດການກັບຈຳນວນລົດສ່ວນຕົວໃນເຂດໃຈກາງເມືອງ ແລະລະຫວ່າງປີ 2026-2030 ນັ້ນທີ່ ການພັດທະນາລະບົບຂົນສົ່ງມວນຊົນ ແລະຫຼຸດຈຳນວນລົດສ່ວນບຸກ ຄົນຢ່າງຕໍ່ເນື່ອງ.

  ແຜນການທັງໝົດຂອງນະຄອນໂຮຈີມິນໃນຄັ້ງນີ້ຕ້ອງໃຊ້ງົບປະມານ 16,9 ລ້ານໂດລາສະຫະລັດ ໂດຍພາກລັດຈະສະໜັບສະໜູນງົບປະມານ 2 ລ້ານໂດລາ ສ່ວນ ທີ່ເຫຼືອມາຈາກຂະແໜງເອກະຊົນ ແລະຄວາມຊ່ວຍເຫຼືອເພື່ອການພັດທະນາຢ່າງເປັນທາງການ.

-------

ໜັງສືພິມເສດຖະກິດ-ສັງຄົມ

แชร์