ເມືອງໂພນທອງ ຫາລືການສ້າງບ້ານວັດທະນະທໍາ

  ເມື່ອບໍ່ດົນຜ່ານມານີ້ຫ້ອງ ການຖະແຫຼງຂ່າວວັດທະນະທຳ ແລະທ່ອງທ່ຽວເມືອງໂພນທອງ ໄດ້ຈັດກອງປະຊຸມຄົ້ນຄວ້າປຶກສາຫາລືຄະນະກຳມະການສ້າງບ້ານວັດທະ ນະທຳຂັ້ນເມືອງຂຶ້ນທີ່ຫ້ອງປະຊຸມຂົງເຂດວັດທະນະທຳ-ສັງຄົມ ໂດຍມີທ່ານ ບຸນຈັນ ປານຟອງເພັດ ເຈົ້າເມືອງໂພນທອງ, ພ້ອມດ້ວຍຄະນະກຳມະການສ້າງບ້ານວັດທະທຳຂັ້ນເມືອງ ແລະພະນັກງານຫ້ອງການກ່ຽວຂ້ອງເຂົ້າຮ່ວມ.

  ທ່ານ ສຸກສະຫວັນ ແກ້ວມະນີ ຫົວໜ້າຫ້ອງການຖະແຫຼງຂ່າວວັດທະນະທຳ ແລະທ່ອງທ່ຽວເມືອງ ໂພນທອງລາຍງານວ່າ: ການສ້າງ ຄອບຄົວ ແລະບ້ານວັດທະນະທຳ ຢູ່ເມືອງໂພນທອງ ແຂວງຫຼວງພະບາງ ຄະນະກຳມະການຂັ້ນເມືອງ ໄດ້ລົງຊຸກຍູ້, ສົ່ງເສີມປະຊາຊົນ ແຕ່ລະບ້ານໃຫ້ກາຍເປັນຄອບຄົວ ແລະບ້ານວັດທະນະທຳຕາມມາດຖານເງື່ອນໄຂທີ່ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວວາງອອກ, ຄຽງຄູ່ກັບການຊຸກຍູ້ວຽກງານສີລະປະວັນນະຄະດີ, ນຳພາປະຊາຊົນປົກປັກຮັກສາມູນເຊື້ອ ບ້ານວັດທະນະທຳໃຫ້ຍືນຍົງຕະຫອດໄປ, ຊຶ່ງນັບແຕ່ປີ 2009 ເປັນຕົ້ນມາຫ້ອງການຖະແຫຼງຂ່າວວັດທະນະທຳ  ແລະທ່ອງທ່ຽວເມືອງ ໄດ້ຈັດຕັ້ງປະຕິບັດແຜນຍຸດທະສາດ ການສ້າງຄົນ, ຄອບຄົວ ແລະບ້ານ ວັດທະນະທຳ ໂດຍເລັງໃສ່ບ້ານທີີ່ມີເງື່ອນໄຂສະດວກມາຮອດປະຈຸບັນສາມາດສ້າງບ້ານວັດທະນະທຳໄດ້ 11 ບ້ານ, 1.489 ຄອບ ຄົວ, ພົນລະເມືອງ 8.290 ຄົນ, ຍິງ 4.086 ຄົນ.

   ຕອນທ້າຍກອງປະຊຸມທ່ານ ເຈົ້າເມືອງໂພນທອງ ໄດ້ຍ້ອງຍໍ ຊົມເຊີຍຫ້ອງການຖະແຫຼງຂ່າວ ວັດທະນະທຳ ແລະທ່ອງທ່ຽວເມືອງ ທີ່ເປັນເຈົ້າການຊີ້ນຳ-ນຳພາໃນການສ້າງຄອບຄົວ ແລະບ້ານວັດທະນະທຳທັງໄດ້ຊຸກຍູ້ໃຫ້ປະຊາຊົນລາວບັນດາເຜົ່າໃນການປົກປັກຮັກ ສາຮີດຄອງປະເພນີ ແລະວັດທະນະທຳອັນດີງາມຂອງຊາດກໍ່ຄືຂອງ ເຜົ່າໄວໃຫ້ຍືນຍົງຢູ່ຄູ່ກັບຄົນລາວ ຕະຫຼອດໄປ, ພ້ອມນັ້ນຍັງຍົກໃຫ້ເຫັນຄວາມໝາຍຂອງຄຳວ່າ: ບ້ານວັດທະນະທຳແມ່ນການສ້າງຄວາມເຂັ້ມແຂງໄປສູ້ຄວາມກ້າວໜ້າເທື່ອລະກ້າວດັ່ງນັ້ນທຸກພາກສ່ວນຕ້ອງ ມີສ່ວນຮ່ວມໃນການສ້າງຄົນຄອບຄົວ ແລະບ້ານວັດທະນະທຳໃຫ້ ກວ້າງຂວາງທັງຮັບປະກັນທາງດ້ານປະລິມານ ແລະຄຸນນະພາບ.

--------

ໜັງສືພິມເສດຖະກິດ-ສັງຄົມ

แชร์