ຍົກລະດັບການນຳໃຊ້ພາສາອັງກິດໃຫ້ແກ່ຜູ້ປະກອບການທ່ອງທ່ຽວຖໍ້າກອງລໍ-ນາຕານ

 ວັນທີ 15 ກໍລະກົດ 2020 ສະຖາບັນສື່ມວນຊົນ, ວັດທະນະທຳ ແລະທ່ອງທ່ຽວກະຊວງ ຖວທ ໄດ້ຈັດຊຸດຝຶກອົບຮົມໃນຫົວຂໍ້ “ທັກສະການນຳໃຊ້ພາສາອັງກິດສຳລັບ ການບໍລິການທີ່ມີປະສິດທິພາບ” ໃຫ້ແກ່ພະນັກງານນຳທ່ຽວ, ພະນັກງານໂຮງແຮມ, ເຮືອນພັກ ແລະ ຮ້ານອາຫານທີ່ນອນໃນເຂດບໍລິການທ່ອງທ່ຽວຖໍ້າກອງລໍ-ນາຕານໂດຍເປັນກຽດເຂົ້າຮ່ວມຂອງທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳແລທ່ອງທ່ຽວແຂວງຄຳມ່ວນ,ມີບັນດາຄູຝຶກຈາກສະຖາບັນພ້ອມດ້ວຍນັກສຳມະນາກອນເຂົ້າຮ່ວມ.

  ໃນໂອກາດກ່າວເປີດຊຸດຝຶກອົບຮົມທ່ານໄຊສົມບູນສຸວັນດາລາກໍ່ ໄດ້ຍົກໃຫ້ເຫັນຄວາມໝາຍ, ຄວາມ ສຳຄັນ ແລະຜົນປະໂຫຍດຂອງວຽກງານການບໍລິການທີ່ມີຕໍ່ການພັດທະນາເສດຖະກິດ-ສັງຄົມໂດຍ ສະເພາະແມ່ນການບໍລິການທີ່ດີຂອງພະນັກງານນຳທ່ຽວ, ຜູ້ປະກອບການທຸລະກິດ, ເຮືອນພັກ  ແລະ ຮ້ານອາຫານຊຶ່ງມີຄວາມຈຳເປັນຈະຕ້ອງໄດ້ຮັບການພັດທະນາຄວາມຮູ້, ທັກສະໃນການນຳໃຊ້ພາສາສຳລັບການບໍລິການທີ່ມີປະສິດທິພາບເປັນຕົ້ນແມ່ນບໍລິການບັນດານັກທ່ອງທ່ຽວຕ່າງປະເທດທີ່ມາທ່ຽວຖໍ້າກອງລໍ-ນາຕານຊຶ່ງເປັນສະຖານທີ່ທ່ອງທ່ຽວທີ່ມີຊື່ສຽງຂອງແຂວງຄຳມ່ວນ, ພ້ອມດຽວກັນທ່ານຍັງໄດ້ຮຽກຮ້ອງໃຫ້ນັກສຳມະນາກອນຈົ່ງເປັນເຈົ້າການເອົາ ໃຈໃສ່ຈັດຕັ້ງປະຕິບັດເຮັດໃຫ້ການຝຶກອົບຮົມໃນຄັ້ງນີ້ດຳເນີນ ໄປດ້ວຍດີ, ມີປະສິດທິພາບ ແລະ ສຳເລັດຕາມລະດັບຄາດໝາຍເພື່ອນຳເອົາບົດຮຽນ ແລະຄວາມຮູ້ດັ່ງກ່າວໄປໝູນໃຊ້ເຂົ້າໃນກິດຈະກຳຕ່າງໆໃຫ້ໄດ້ຮັບໝາກຜົນ.

--------

ໜັງສືພິມເສດຖະກິດ-ສັງຄົມ

• 17/07/2020