ອຸດົມໄຊ ສຳເລັດທົດສອບສີມືແຮງງານສາຂາອາຊີບປຸງແຕ່ງອານຫານ

 ພິທີປິດການທົດສອບສີມືແຮງງານສາຂາອາຊີບປຸງແຕ່ງອາຫານລະດັບ 3 ຜູ້ຊຳນານງານໄດ້ຈັດຂຶ້ນໃນວັນ ທີ 9 ກໍລະກົດ 2020 ທີ່ສູນພັດທະນາສີມືແຮງງານແຂວງອຸດົມໄຊໂດຍການເປັນປະທານຂອງ ທ່ານ ສຸລິສັກ ສຸພັນທອງ ຮອງຫົວໜ້າກົມພັດທະນາສີມືແຮງງານກະຊວງແຮງງານ ແລະສະຫວັດດີການສັງຄົມ, ມີທ່ານ ຄຳໝັ້ນ ຟອງມະນີ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ທ່ານ ພູວົງ ອິນທະວົງ ຮອງອໍານວຍການສູນພັດທະນາສີມືແຮງງານ, ຄະນະກຳມະ ການ,ແຂກເຊີນຕະຫຼອດຮອດຜູ້ເຂົ້າທົດສອບສີມືແຮງງານທີ່ມາຈາກບັນດາຮ້ານອາຫານ, ເຮືອນພັກ,ໂຮງແຮມ ແລະຮ້ານຂາຍອາຫານສຸກແຄມທາງພາຍໃນເທສະບານແຂວງອຸດົມໄຊເຂົ້າຮ່ວມ.

  ການຈັດກິດຈະກຳທົດສອບສີມືແຮງງານໃນຄັ້ງນີ້ແມ່ນເລີ່ມມາແຕ່ວັນທີ 7 ກໍລະກົດເປັນຕົ້ນມາ ແລະສຳເລັດໃນວັນທີ 9 ກໍລະກົດ 2020 ຊຶ່ງໃຊ້ເວລາການທົດສອບທັງໝົດ 3 ວັນ ໃນນັ້ນຜູ້ເຂົ້າທົດສອບຈຳນວນ 35 ທ່ານ, ຍິງ 30 ທ່ານໄດ້ຮຽນຮູ້ທັງພາກທິດສະດີ ແລະພາກປະຕິບັດຕົວຈິງໂດຍສະເພາະແມ່ນການປຸງແຕ່ງອາຫານລາວເຊັ່ນລາບ, ແກງ, ຊີ້ນຄວາຍ ແລະໄດ້ລົງເລິກທຸກຂັ້ນຕອນເປັນຕົ້ນແມ່ນການຫ້າງຫາກະກຽມວັດຖຸດິບ, ເຄື່ອງມື, ອຸປະກອນການປຸງແຕ່ງ, ສ່ວນປະກອບຕະຫຼອດຮອດການປຸງແຕ່ງ ແລະການບໍລິການຕ່າງໆ.

  ການຈັດການທົດສອບດັ່ງກ່າວກໍເພື່ອເສີມສ້າງຄວາມເຂັ້ມແຂງ, ຄວາມສາມາດໃຫ້ຜູ້ປະກອບການທາງດ້ານຮ້ານອາຫານ ແລະການໂຮງແຮມ, ທັງເປັນການຢັ້ງຢືນ ແລະຮັບປະກັນໃຫ້ພະນັກງານດ້ານການປຸງແຕ່ງອາຫານຢູ່ບັນດາຮ້ານອາຫານ, ເຮືອນພັກ, ໂຮງແຮມ ແລະຮ້ານຂາຍອາຫານສຸກຕາມແຄມທາງພາຍໃນເທດສະບານແຂວງອຸດົມໄຊທັງເປັນການເພີ່ມຄວາມຮູ້ ແລະ ທັກສະໃຫ້ແກ່ຜູ້ອອກແຮງງານໃນການປຸງແຕ່ງອາຫານ,ພັດທະນາຍົກລະດັບສີມືແຮງງານລາວເວົ້າລວມ, ເວົ້າສະເພາະກໍຄືແຮງງານພາຍໃນແຂວງອຸດົມໄຊໃຫ້ມີມາດຕະຖານ, ສາມາດຕອບສະໜອງເຂົ້າໃນວຽກງານດ້ານການບໍລິການ ແລະ ການທ່ອງທ່ຽວຂອງແຂວງ ແລະ ເຮັດໃຫ້ວຽກ ງານການພັດທະນາສີມືແຮງງານຢູ່ແຂວງອຸດົມໄຊເປັນລະບົບ ແລະຂະຫຍາຍຕົວເທື່ອລະກ້າວ.

  ຜ່ານການຈັດຕັ້ງປະຕິບັດຕົວຈິງເຫັນວ່າມີຜູ້ທີ່ຜ່ານການທົດສອບຈໍານວນ 33 ທ່ານ ທີ່ໄດ້ຮັບໃບຢັ້ງຢືນຈາກສູນພັດທະນາສີມືແຮງງານແຂວງອຸດົມໄຊ ແລະການເປັນຜູ້ຊຳນານງານດ້ານການປຸງແຕ່ງອາຫານໃຫ້ກຽດມອບໃບຢັ້ງຢືນດັ່ງກ່າວໂດຍແມ່ນທ່ານ ສຸລິສັກ ສຸພັນທອງ ຮອງຫົວໜ້າກົມພັດທະນາສີມືແຮງງານກະຊວງແຮງງານ ແລະສະຫວັດດີການສັງຄົມ. ນອກນັ້ນຍັງໄດ້ມອບໃບຍ້ອງຍໍໃຫ້ກັບຄະນະກຳມະການທີ່ເຂົ້າຮ່ວມ ແລະເປັນເຈົ້າການໃນການຕັດສິນຜົນການທົດສອບໃນຄັ້ງນີ້. 

____________

ຂຽນໂດຍ: ຄານມະນີ ຮຽນດໍຈັນ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

 

แชร์