ສພຂ ເຊກອງ ໄຂກອງປະຊຸມສະໄໝສາມັນເທື່ອທີ 9

  ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນ (ສພຂ) ແຂວງເຊກອງ ຊຸດທີ I ໄດ້ໄຂຂຶ້ນຢ່າງເປັນທາງການໃນວັນທີ 16 ກໍລະກົດ 2020 ຢູ່ສະໂມສອນສະພາປະຊາຊົນແຂວງໂດຍການເປັນປະທານຂອງທ່ານ ພອນເພັດ ຄິວລະວົງ ຮອງເລຂາພັກແຂວງ, ປະທານສະພາປະຊາຊົນແຂວງ ແລະເຂົ້າຮ່ວມມີທ່ານ ຄໍາເຜີຍ ບຸດດາວຽງເຈົ້າແຂວງໆ ເຊກອງ, ມີຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າ-ຮອງພະແນກ, ສສຊ, ສສຂ, ນັກປະຕິວັດອາວຸໂສ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ ແລະນັກທຸລະກິດຜູ້ປະກອບການເຂົ້າຮ່ວມ.

  ໃນວາລະກອງປະຊຸມ ທ່ານ ພອນເພັດ ຄິວລະວົງ ຮອງເລຂາພັກແຂວງ, ປະທານສະພາປະຊາຊົນແຂວງໄດ້ກ່າວໄຂກອງປະຊຸມຢ່າງເປັນທາງການວ່າ: ຕະຫຼອດໄລຍະການດໍາເນີນກອງປະຊຸມຄັ້ງນີ້ຈະໄດ້ສຸມໃສ່ພິຈາລະນາບາງບັນຫາທີ່ສໍາຄັນຈໍານວນໜຶ່ງເຊັ່ນ: ຄົ້ນຄວ້າ, ພິຈາລະນາ ແລະຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ 6 ເດືອນ ຕົ້ນປີ ແລະທິດທາງວຽກງານຈຸດສຸມ 6 ເດືອນທ້າຍປີ 2020 ແລະແຜນສະເໜີດັດແກ້ງງົບປະມານ 6 ເດືອນ ທ້າຍປີ 2020; ຮັບຟັງບົດລາຍງານການຈັດຕັ້ງປະຕິບັດ 6 ເດືອນຕົ້ນປີ,ຄາດຄະເນແຜນ ການ 6 ເດືອນທ້າຍປີ 2020 ແລະແຜນການເຄື່ອນໄຫວວຽກງານຮອດກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງຊຸດທີ II; ພິຈາລະນາ, ຮັບຮອງເອົາບົດລາຍງານຜົນການຕິດຕາມກວດກາຂອງຄະນະປະຈໍາສະພາປະຊາຊົນແຂວງ ກ່ຽວກັບການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະກົດໝາຍໃນຂົງເຂດວັດທະນະທໍາ-ສັງຄົມ, ບັນດາເຜົ່າ ແລະສາສະໜາ. ນອກຈາກນີ້ກອງປະຊຸມຈະໄດ້ຮັບຟັງການຕອບຄໍາຊັກຖາມ ແລະຊີ້ແຈງອະທິບາຍກັບທີ່ຂອງບັນດາພະແນກ ການກ່ຽວຂ້ອງກ່ຽວກັບນະໂຍບາຍ, ວິທີການ, ມາດຕະການເພື່ອຊຸກຍູ້ການຜະລິດສະບຽງອາຫານ, ການສົ່ງເສີມການຜະລິດພາຍໃນເພື່ອທົດແທນການນໍາເຂົ້າສິນຄ້າ ແລະເພື່ອການສົ່ງອອກ; ການຄຸ້ມຄອງລາຄາສິນຄ້າ; ການຄຸ້ມຄອງການເຂົ້າ-ອອກເມືອງຕື່ມອີກ.

  ໂອກາດນີ້ ທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງຍັງໄດ້ຮຽກຮ້ອງມາຍັງບັນດາສະມາຊິກສະພາປະຊົນແຂວງໃນຖານະເປັນຕົວແທນແຫ່ງສິດ ແລະຜົນປະໂຫຍດອັນຊອບທໍາຂອງປະຊາຊົນບັນດາເຜົ່າຊາວແຂວງເຊກອງຈົ່ງໄດ້ໃຊ້ສິດເຊີດຊູຄວາມຮັບຜິດຊອບ ແລະເອົາໃຈໃສ່ຄົ້ນຄວ້າ, ປະກອບຄຳຄິດຄຳເຫັນຢ່າງກົງໄປກົງມາເພື່ອເຮັດໃຫ້ບັນດາເນື້ອໃນທີ່ນຳມາພິຈາລະນາໃນກອງປະຊຸມຄັ້ງນີ້ບັນລຸຜົນສຳເລັດຕາມຄາດໝາຍ ແລະສາມາດນຳໄປຈັດຕັ້ງປະຕິບັດຢ່າງມີປະສິດທິຜົນ.

  ພິເສດໃນໄລຍະດຳເນີນກອງປະຊຸມຄະນະເລຂາທິການສະພາປະຊາຊົນແຂວງໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນເພື່ອຮັບເອົາຄໍາຄິດຄໍາເຫັນ ແລະ ຄໍາສະເໜີໂດຍກົງຈາກປະຊາຊົນທີ່ຈະສົ່ງໄປຍັງກອງປະຊຸມຄັ້ງນີ້ຊຶ່ງບັນດາທ່ານສາມາດສົ່ງຄໍາຄິດຄໍາເຫັນ ແລະຄໍາສະເໜີໄປຍັງກອງປະຊຸມໄດ້ຕາມໝາຍເລກໂທລະສັບບໍ່ໄດ້ເສຍຄ່າ 038 165 ກອງປະຊຸມຄັ້ງນີ້ຈະດໍາເນີນ ໄປຈົນຮອດວັນທີ 17 ກໍລະກົດ 2020 ຈຶ່ງຈະສໍາເລັດ.

______________

ຂຽນໂດຍ: ພຸດທະສອນ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์