ສຶກສາເມືອງອຸທຸມພອນ ຈັດກິດຈະກຳສະຫຼອງວັນກີລາ-ກາຍະກຳແຫ່ງຊາດ

 ເພື່ອເປັນການສະເຫຼີມສະຫຼອງວັນກີລາ-ກາຍະກຳແຫ່ງຊາດຄົບຮອບ 54 ປີ ໃຫ້ມີບັນຍາກາດຄຶກຄື້ນ ແລະມີຄວາມໝາຍຄວາມສຳຄັນ,ດັ່ງນັ້ນໃນວັນທີ 13 ກໍລະກົດ 2020 ທີ່ຜ່ານມາຫ້ອງການສຶກສາທິການ-ກີລາເມືອງອຸທຸມພອນ ແຂວງສະຫວັນນະເຂດຈຶ່ງໄດ້ສົມທົບກັບຄະນະພັກອຳນາດການປົກຄອງເມືອງ, ກົມກອງຫ້ອງການ ແລະບັນດາໂຮງຮຽນພາຍໃນເມືອງຈັດກິດຈະກຳເຕັ້ນແອໂລບິກຂຶ້ນທີ່ເດີ່ນກີລາຂອງເມືອງດັ່ງກ່າວ.

   ໂອກາດນີ້ທ່ານ ໂພໄຊ ອິນທະວົງສາ ຮອງເຈົ້າເມືອງໆອຸທຸມພອນໄດ້ໃຫ້ກຽດຂຶ້ນຜ່ານປະຫວັດຄວາມເປັນມາຂອງວັນສ້າງຕັ້ງກີລາລາວ ແລະຜົນງານການເຄື່ອນໄຫວການເຂົ້າຮ່ວມແຂ່ງຂັນກີລາປະເພດຕ່າງໆພາຍໃນເມືອງໃນໄລຍະຜ່ານມາ, ກອງປະຊຸມຜູ້ນໍາກີລາທົ່ວປະເທດຄັ້ງທີ III ໄດ້ມີມະຕິຕົກລົງຮັບຮອງເອົາວັນທີ 13 ກໍລະ ກົດ ປີ 1966 ເປັນວັນສ້າງຕັ້ງກີລາລາວ,ຍ້ອນຫຼັງຄືນປະຫວັດສາດຂອງຊາດລາວນັບພັນໆປີ, ນັບແຕ່ມື້ກໍາເນີດຊາດລາວ “ອ້າຍດາວ” ພາຍຫຼັງໄດ້ປ່ຽນມາເປັນ “ອ້າຍລາວ” ນັ້ນປະຫວັດສາດໄດ້ຈາລຶກໄວ້ວ່າຊາດລາວແມ່ນຊາດທີ່ຍິ່ງໃຫຍ່ “ອ້າຍດາວ” ຫຼື “ດາວ” ແປວ່າຍິ່ງໃຫຍ່, ຊົນຊາດອ້າຍດາວນັ້ນຖືວ່າຕົນເອງໄດ້ກໍາເນີດມາຈາກ ດວງດາວ ຫຼືເກີດມາຈາກສະຫວັນຊັ້ນຟ້າ “ຍິ່ງໃຫຍ່, ສົດໃສ ແລະສີວິໄລ”, ຊາດລາວໃນຍຸກອາ ນາຈັກໜອງແສນທີ່ມີພໍ່ຊຸມບູລົມປະຖົມກະສັດຂອງຊົນຊາດອ້າຍລາວນັ້ນໄດ້ປົກຄອງໄຟຟ້າ ແລະແຜ່ນດິນທີ່ກ້ວາງໃຫຍ່ໄພສານຈາກເໜືອສຸດນັບແຕ່ພູອັນໄຕໄລ່ລົງເຖິງຝັ່ງທະເລ, ຊື່ສຽງລຽງນາມຂອງຊາດລາວໄດ້ລືຊາດັງກ້ອງໄປທົ່ວໂລກາໃນຖານະທີ່ເປັນເຜົ່າຊົນຜູ້ຮັກຫອມສັນຕິສຸກບໍ່ຮຸກຮານຜູ້ໃດ ແລະດໍາລົງຊີວິດຢູ່ຢ່າງຜາສຸກພາຍໃຕສັງຄົມ-ວັດທະນະທໍາອັນຜ່ອງໃສ, ແຕ່ກໍ່ຍັງບໍ່ລະເວັ້ນຕໍ່ການຖືກຮຸກ ຮານ, ຈົນອົບພະຍົກຫຼົບໄພໜີໄປຕັ້ງຖິ່ນຖານໃໝ່ຈວບຈົນເຖິງປະຖົມກະສັດຜູ້ທ້ອນໂຮມແຜ່ນດິນລາວຄື: ເຈົ້າຟ້າງຸ່ມມະຫາລາຊາ, ຈຶ່ງໄດ້ທ້ອນໂຮມແຜ່ນດິນລາວຝາກໄວ້ໃຫ້ອະນຸຊົນຄົນລຸ້ນຫຼັງສຶບທອດຕໍ່ເທົ້າເຖິງເວລານີ້, ການທີ່ຊາດລາວກໍາເນີດ ແລະຄົງຕົວຢູ່ໄດ້ຕາບເທົ້າເຖິງປະຈຸບັນນີ້ແມ່ນຍ້ອນຄວາມສະຫຼຽວສະຫຼາດ, ໄຫວພິກ, ສະຕິປັນຍາ,ການຕໍ່ສູ້ ແລະການປົກຄອງອັນຍອດຢ້ຽມຂອງເຫຼົ່າບັນພະບູລູດຜູ້ເກັ່ງກ້າສາມາດ, ບັນດາວິລະບູລຸດ, ນັກຮົບຜູ້ກ້າກັ່ນ, ນັກປົກຄອງຜູ້ດີເດັ່ນ ແລະນັກກອບກູ້ເອກະລາດຜູ້ລືນາມເຊັ່ນ: ເຈົ້າໄຊເສດຖາທິລາດ, ເຈົ້າອານຸວົງ, ລວມທັງວິລະບູລຸດ ແລະວິລະສັດຕີຜູ້ກ້າຫານຫຼາຍໆທ່ານໃນຫຼາຍຍົກຫຼາຍສະໄໝ.

  ຈາກນັ້ນບັນດາແຂກ ແລະມວນຊົນທີ່ເຂົ້າຮ່ວມກໍ່ໄດ້ຮ່ວມກິດຈະກໍາເຕັ້ນແອໂລບິກດ້ວຍບັນຍາກາດເບີກບານມ່ວນຊື່ນ ແລະຄຶກຄື້ນກວ່າທຸກໆປີ, ທັງນີ້ກໍ່ເພື່ອເປັນການ ໂຄສະນາ, ປຸກລະດົມ, ປູກຈິດສໍານຶກໃຫ້ແກ່ປວງຊົນໄດ້ຮັບຮູ້ຄວາມໝາຍຄວາມສຳຄັນຂອງວັນກີລາ-ກາຍະກຳແຫ່ງຊາດວັນທີ 13 ກໍ ລະກົດ ປີ 1966.

______________

ໜັງສືພິມເສດຖະກິດ-ສັງຄົມ

แชร์