ສາລະວັນ ຫາລືວຽກງານທ່ອງທ່ຽວ ພາຍໃນແຂວງ

 ກອງປະຊຸມປຶກສາຫາລືກ່ຽວກັບວຽກງານທ່ອງທ່ຽວ, ໂຮງແຮມ, ເຮືອນພັກ, ຮ້ານອາຫານ ແລະຮ້ານບັນເທີງພາຍໃນ ແຂວງສາລະວັນ ຈັດຂຶ້ນວັນທີ 10 ກໍລະກົດ 2020 ທີ່ໂຮງແຮມໂພນໄຊໂດຍການເຂົ້າຮ່ວມຂອງທ່ານ ມະໄລວອນ ສີປະເສີດ ຮັກສາການຫົວໜ້າພະແນກ ຖວທ ແຂວງສາລະວັນ, ທ່ານ ນາງ ອິນແປງ ຊາມຸນຕີ ປະທານສະພາການຄ້າ ແລະອຸດສາຫະກຳແຂວງສາລະວັນມີຫົວໜ້າຫ້ອງການ, ຮອງຫ້ອງການ ຖວທ 3 ເມືອງຄື: ເມືອງຕຸ້ມລານ, ຕະໂອ້ຍ ແລະ ເມືອງສະໝ້ວຍ, ພ້ອມດ້ວຍນັກທຸລະກິດຜູ້ປະກອບການດ້ານການທ່ອງທ່ຽວພາຍໃນແຂວງເຂົ້າຮ່ວມ.

  ທ່ານ ທອງອຸ້ຍ ຄຳແກ້ວ ປະທານສະມາຄົມທຸລະກິດທ່ອງທ່ຽວ ແຂວງສາລະວັນ ໃດ້ລາຍງານໃຫ້ ຮູ້ວ່າ: ສະມະມາຄົມທຸລະກິດທ່ອງ ທ່ຽວພາຍໃນແຂວງສາລະວັນມີ ທັງໝົດ 94 ຫົວໜ່ວຍ ໃນນັ້ນທຸລະກິດໂຮງແຮມມີ 7 ຫົວໜ່ວຍ, ທູລະກິດເຮືອນພັກມີ  42 ຫົວໜ່ວຍ ແລະທຸລະກິດຮ້ານອາຫານມີ 45 ຫົວໜ່ວຍ, ມີໂຄງປະ ກອບການຈັດຕັ້ງທີ່ເປັນລະບົບ, ມີການແບ່ງວຽກ, ແບ່ງຄວາມຮັບຜິດຊອບກັນຢ່າງ ລະອຽດ, ມີການປະຊຸມປຶກສາຫາລືກັນໃນທຸກໆການເຄື່ອນໄຫວຕາມພາລະບົດບາດຂອງຕົນ ໂດຍອີງ ໃສ່ດຳລັດສະບັບເລກທີ 238/ນຍ ແລະກົດລະບຽບຂອງສະມາຄົມທ່ອງທ່ຽວເປັນບ່ອນອີງໃນການ ຈັດຕັ້ງປະຕິບັດ, ໄດ້ຮັບການ ຮັບ ຮອງການປັບປຸງບຸກຄະລາກອນຂອງແຂວງສະບັບເລກທີ 228/ ຈຂ.ສວ ລົງວັນທີ 8 ເມສາ 2020 ພ້ອມນັ້ນກໍ່ໃດ້ເຊັນບົດບັນທຶກຄວາມເຂົ້າໃຈຮ່ວມມືດ້ານການທ່ອງທ່ຽວກັບຈັງຫວັດອຸບົນຣາຊະທານີຣາຊະອານາຈັກໄທ, ໄດ້ສຳເລັດການ ປຶກສາຫາລືຕົກລົງວາງແຜນສຳຫຼວດເສັ້ນທາງການທ່ອງທ່ຽວກັບຈັງຫວັດອຸບົນຣາຊະທານີຣາຊະອານາຈັກໄທແຕ່ຈຸດປາກຕະພານແຂວງສາລະວັນຫາຊາຍແດນປະເທດຫວຽດນາມ. 

  ສຳລັບທິດທາງ 6 ເດືອນຕໍ່ໜ້າແມ່ນຈະສ້າງຖານຂໍ້ມູນດ້ານການທ່ອງທ່ຽວຮ່ວມກັບພະແນກ ຖວທ ແຂວງໃຫ້ມີຂໍ້ມູນລະອຽດຈະແຈ້ງຂຶ້ນຕື່ມ, ສືບຕໍ່ປຸກລະດົມບັນດາຫົວໜ່ວຍທຸລະກິດຜູ້ປະກອບການໃຫ້ເຂົ້າມາເປັນສາມາຊິກຂອງສະມາຄົມໃຫ້ຫຼາຍຂຶ້ນ ແລະດ້ານອຶ່ນໆ, ຈາກນັ້ນກອງປະຊຸມກໍ່ໄດ້ຮ່ວມກັນປະກອບຄຳເຫັນເພື່ອແກ້ໄຂດ້ານອອ່ນເສີມຂະຫຍາຍດ້ານດີໃນການຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າໄຫ້ມີຜົນສຳເລັດສູງ.

   ໂອກາດດຽວກັນນີ້ທ່ານ ນາງ ອິນແປງ ຊາມຸນຕີ ປະທານສະພາການຄ້າ ແລະອຸດສາຫະກຳໄດ້ກ່າວວ່າ: ຈຸດປະສົງຂອງກອງປະຊຸມຄັ້ງນີ້ແມ່ນເພື່ອກະກຽມຄວາມພ້ອມໃນການຕ້ອນຮັບນັກທ່ອງທ່ຽວພາຍຫຼັງທີ່ເປີດປະເທດ, ຈັດຕັ້ງຄະນະກຳມະການເພື່ອເຂົ້າຮ່ວມການສຳຫຼວດແຫຼ່ງທ່ອງທ່ຽວພາຍໃນແຂວງສາລະວັນເພື່ອເຂົ້າຮ່ວມໂຄງການທ່ຽວໜຶ່ງວັນ 3 ປະເທດຄື: ລາວ, ໄທ ແລະຫວຽດນາມ ທັງເພື່ອເປັນການຮັບຟັງຄຳເຫັນຈາກຜູ້ປະກອບການດ້ານການທ່ອງທ່ຽວຕ່າງໆ ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະບັນຫາອື່ນໆ.

ໃນຕອນທ້າຍຂອງກອງປະຊຸມຜູ້ເຂົ້າຮ່ວມຍັງໃດ້ຮັບຟັງຄຳໂອ້ລົມຈາກທ່ານຮັກສາການຫົວໜ້າພະແນກ ຖວທ ແຂວງສາລະວັນຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນໄລຍະຜ່ານມາພ້ອມນັ້ນທ່ານຍັງໄດ້ຍົກໃຫ້ເຫັນເຖິງຄວາມສຳຄັນຂອງວຽກງານທ່ອງທ່ຽວ ແລະ ຮຽກຮ້ອງໃຫ້ຜູ້ປະກອບການຈົ່ງເອົາໃຈໃສ່ໃນການພັດທະນາການທ່ອງທ່ຽວໃຫ້ຖືກຕ້ອງຕາມລະບຽບກົດໝາຍ, ເອົາໃຈໃສ່ໃນການຄຸ້ມຄອງ,ການໂຄສະນາ,ຮັກສາຄວາມສະອາດ, ບໍລິການດ້ວຍຄວາມຈິງໃຈວ່ອງໄວ, ສະຫົງບ, ປອດໄຟຄຽງຄູ່ກັນນັ້ນກໍ່ຕ້ອງເປັນເຈົ້າການຮ່ວມກັນໃນການເຜົ້າລະວັງການແຜ່ລະບາດຂອງພະຍາດໂຄວິດ-19 ຢ່າງເຄັ່ງຄັດ.

___________

ໂດຍ: ສິດຕາ ເພັດວົງສາ

 

แชร์