ເມືອງໄຊຈໍາພອນ ມີບ້ານວັດທະນະທໍາ 14 ບ້ານ

 ຕະຫຼອດໃນໄລຍະຜ່ານມາ, ຫ້ອງການຖະແຫຼງຂ່າວວັດທະນະທໍາ ແລະທ່ອງທ່ຽວເມືອງໄຊຈໍາພອນ ແຂວງບໍລິຄໍາໄຊ ໄດ້ເອົາໃຈໃສ່ໃນການສ້າງບ້ານ ແລະຄອບຄົວວັດທະນະທໍາ ໂດຍອີງໃສ່ 5 ມາດຖານເງື່ອນໄຂຂອງຄອບຄົວວັດທະນະທໍາ, ຊຶ່ງມາຮອດປະຈຸບັນ ທົ່ວເມືອງມີບ້ານວັດທະນະທໍາທັງ ໝົດ 14ບ້ານ ແລະຄອບຄົວວັດທະນະທໍາ 1.272 ຄອບຄົວ ເທົ່າ ກັບ 64,24%.

   ອີງຕາມຂໍ້ມູນຈາກຫ້ອງການຖະແຫຼງຂ່າວວັດທະນະທໍາ ແລະ ທ່ອງທ່ຽວເມືອງໄຊຈໍາພອນ ໃຫ້ຮູ້ ວ່າ: ໃນທົ່ວເມືອງໄຊຈໍາພອນ ມີທັງໝົດ 17 ບ້ານ, 1.707 ຄອບ ຄົວ,ມີພົນລະເມືອງ 10.814 ຍິງ 5.140 ລວມມີ 8 ຊົນເຜົ່າ, ຊຶ່ງໃນໄລຍະຜ່ານມາຫ້ອງການ ຖວທ ເມືອງໄຊຈໍາພອນ ໄດ້ເອົາໃຈໃສ່ຊຸກຍູ້ວຽກງານວັດທະນະທໍາ ຢ່າງເປັນປົກກະຕິໂດຍສະເພາະການສ້າງຄອບຄົວບ້ານວັດທະນະທຳທັງໄດ້ກຳນົດເປົ້າໝາຍບ້ານ ເພື່ອສ້າງເປັນບ້ານວັດທະນະທຳໃໝ່, ບ້ານແບບຢ່າງທາງດ້ານວັດທະນະທຳ, ຊຶ່ງອີງໃສ່ 5 ມາດຖານ ເງື່ອນໄຂຂອງຄອບຄົວວັດທະນະທໍາເຊັ່ນ:ຕ້ອງມີເຮືອນຢູ່ເປັນຂອງ ຕົນເອງແຕ່ເຄິ່ງຖາວອນຂຶ້ນໄປ,ມີອາຊີບໝັ້ນທ່ຽງຖືກຕ້ອງຕາມກົດໝາຍ ແລະກຸ້ມກິນ; ຕ້ອງເປັນຄອບຄົວສາມັກຄີຖືກຕ້ອງປອງດອງກັນສະເໝີພາບ ແລະບໍ່ສ້າງ ຄວາມຫຍຸ້ງຍາກໃຫ້ແກ່ອໍານາດການປົກຄອງ, ຕ້ອງເອົາໃຈໃສ່ ລ້ຽງລູກໃຫ້ຖືກຫຼັກອະນາໄມອົບ ຮົມສັ່ງສອນລູກເປັນຄົນມີຄວາມກະຕັນຍູຕໍ່ຜູ້ມີພະຄຸນ ແລະສົ່ງລູກ ໃຫ້ໄດ້ສຶກສາຮໍ່າຮຽນ; ຕ້ອງເປັນຄອບຄົວທີ່ດໍາລົງຊີວິດປອດໃສຂາວສະອາດບໍ່ເຊື່ອຖືງົມງວາຍ, ຮັກສາວັດທະນະທໍາຮີດຄອງປະເພນີອັນດີງາມຂອງຊາດ ແລະນັບ ຖືລະບຽບກົດໝາຍ; ຕ້ອງເປັນ ຄອບຄົວທີ່ມີຄວາມສາມັກຄີຊ່ວຍ ເຫຼືອເພື່ອແຜ່ເຊິ່ງກັນ ແລະກັນພາຍໃນບ້ານປະກອບສ່ວນສາທາລະນະປະໂຫຍດຂອງບ້ານເມືອງ.

   ຜ່ານການຈັດຕັ້ງປະຕິບັດໃນ 6 ເດືອນຕົ້ນປີ 2020 ທົ່ວເມືອງ ສາມາດສ້າງບ້ານວັດທະນະທຳໄດ້ 2 ບ້ານຄື: ບ້ານໂພນໝັ້ນ ແລະ ບ້ານສົບເຕິງ, ສ້າງຄອບຄົວວັດທະນະທໍາໃໝ່ໄດ້ 67 ຄອບຄົວ, ນອກນີ້ຍັງໄດ້ຊຸກຍູ້ຮ້ານກິນດື່ມ, ຮ້ານບັນເທີງ, ເຮືອນພັກ ແລະ ລົງຕິດຕາມກວດກາການຈັດງານ ບຸນປະເພນີ, ການສະແດງສີລະປະວັນນະຄະດີ ແລະກິດຈະກໍາຕ່າງໆ ພາຍໃນເມືອງ, ປະຈຸບັນທົ່ວເມືອງ ໄຊຈໍາພອນ ມີບ້ານວັດທະນະທໍາ ທັງໝົດ 14 ບ້ານ ແລະຄອບຄົວ ວັດທະນະທໍາ 1.272 ຄອບຄົວ ເທົ່າກັບ 64,24%.

 ສໍາລັບທິດທາງ 6 ເດືອນທ້າຍ ປີ 2020 ນີ້, ເມືອງໄຊຈໍາພອນຈະສືບຕໍ່ເກັບກໍາສະຖິຕິຄອບຄົວວັດທະນະທໍາທົ່ວເມືອງ ແລະຕິດຕາມກວດກາແຜນການ ໂດຍຕິດພັນກັບວຽກງານຮາກຖານ, ກະກຽມເອກກະສານປະກາດບ້ານ ໂພນງາມ ເປັນບ້ານແບບຢ່າງທາງ ດ້ານວັດທະນະທໍາ, ລົງປະເມີນບ້ານພຽງດີ, ຍໍ້າອ້ອມ ແລະບ້ານ ນໍ້າປັນເພື່ອອອກເອກະສານປະກາດເປັນບ້ານວັດທະນະທໍາໃໝ່.

----------

ໜັງສືພິມເສດຖະກິດ-ສັງຄົມ

แชร์