ນໍ້າຕົກຕາດ ວັງຮອຍ ແຫຼ່ງທ່ອງທ່ຽວທຳມະຊາດ ທີ່ສວຍງາມ

ປະເທດລາວ ເປັນປະເທດໜຶ່ງທີ່ມີແຫຼ່ງທ່ອງທ່ຽວທີ່ມີຊື່ສຽງ ຫຼາຍແຫ່ງປະກອບກັບຄວາມສວຍສົດງົດງາມ ແລະມີເອກະລັກສະເພາະ ຊຶ່ງຫຼາຍໆຄົນອາດຍັງບໍ່ຮູ້ວ່າ ຢູ່ປະເທດລາວຍັງມີຄວາມມະຫັດສະຈັນທາງທໍາມະຊາດອີກຢ່າງຫຼວງຫຼາຍໜຶ່ງໃນສະຖານທີ່ມະຫັດສະຈັນທີ່ວ່ານີ້ແມ່ນ “ນໍ້າຕົກຕາດວັງຮອຍ”ເນື່ອງຈາກທີ່ຕັ້ງຢູ່ບໍ່ໄກປານໃດຈາກນະຄອນຫຼວງທີ່ສຳຄັນທຳມະຊາດອ້ອມຂ້າງລວມທັງນໍ້າຕົກຕາດເອງແມ່ນສຸດແສນສວຍງາມ.

 “ນໍ້າຕົກຕາດ ວັງຮອຍ” ເປັນແຫຼ່ງທ່ອງທ່ຽວທາງດ້ານທຳມະຊາດອີກແຫ່ງໜຶ່ງຕັ້ງຢູ່ເຂດບ້ານນາໄຊ ເມືອງທ່າພະບາດ ແຂວງ ບໍລິຄຳໄຊ ຫ່າງຈາກເທສະບານ ເມືອງໄປຕາມທາງ 13 ໃຕ້ ຫານະຄອນຫຼວງວຽງຈັນ ປະມານ 26 ກິໂລແມັດ ແລ້ວລ້ຽວຂວາເຂົ້າຕາມ ທາງຕັດໃໝ່ໄປທາງບ້ານເກີນປະມານ 2 ກິໂລແມັດ ແລ້ວລ້ຽວຂວາ ອີກເທື່ອໜຶ່ງເຂົ້າໄປອີກປະມານ 1 ກິໂລແມັດ ກໍ່ຈະເຖີງແຫຼ່ງທ່ອງທຽວນໍ້າຕົກຕາດວັງຮອຍ ແລະແຫຼ່ງ ທ່ອງທ່ຽວແຫ່ງນີ້ເປັນນໍ້າຕົກຕາດ ທີ່ບໍ່ສູງ ແລະບໍ່ຊັນປານໃດມີສາຍນໍ້າໃສສີມໍລະກົດໄຫຼຢູ່ເທິງພະລານ ຫີນທີ່ຍາວໄປຕາມລຳນໍ້າປະມານ ກິໂລແມັດ ແລະມີໂງ່ນຫິນນ້ອຍ ໃຫຍ່ລຽງລາຍກັນຢູ່ຢ່າງສວຍງາມ ພ້ອມທັງຖືກອ້ອມຮອບດ້ວຍຕົ້ນໄມ້ໃຫຍ່ຂຽວອຸ່ມທຸ່ມຢູ່ສອງຝາກ ຝັ່ງທີ່ມີຄວາມສວຍງາມ, ອຸດົມສົມ ບູນຂອງຜືນປ່າ ແລະພືດພັນນາໆ ຊະນິດ, ນອກຈາກທ່ານຈະໄດ້ທ່ຽວ ຊົມນໍ້າຕົກຕາດວັງຮອຍແລ້ວທ່ານ ຍັງສາມາດໄປກາບນະມັດສະການ “ຮອຍພະບາດ” ຢູ່ທີ່ວັດວັງຮອຍ ຫ້ວຍຄາວທີ່ຢູ່ຫາງຈາກນໍ້າຕົກຕາດ 1 ກິໂລແມັດເທົ່ານັ້ນ.

  ນໍ້າຕົກຕາດ ວັງຮອຍ ເໝາະກັບການທ່ອງທ່ຽວແບບຄອບຄົວ ຫຼື ເປັນໝູ່ຄະນະເພື່ອມາພັກຜ່ອນກິນເຂົ້າປ່າ, ລົງຫຼິ້ນນໍ້າທີ່ໃສສະ ອາດ ແລະເຢັນນອກຈາກທຳມະຊາດທີ່ສວຍງາມແລ້ວແຫຼ່ງທ່ອງ ທ່ຽວແຫ່ງນີ້ຍັງມີຮ້ານອາຫານ, ຫ້ອງນໍ້າສະອາດ, ສະຖານທີ່ຈອດລົດກວ້າງຂວາງ ແລະສິ່ງອຳນວຍ ຄວາມສະດວກອື່ນໆໄວ້ຄອຍບໍລິ ການທຸກທ່ານທີ່ເຂົ້າມາທ່ຽວ.

 -------

ໂດຍ: ວົງມະນີ

แชร์