ຈຳປາສັກ ແຕ່ງຕັ້ງຄະນະບໍລິຫານງານ ສະຫະພັນກີລາດອກປີກໄກ່ແຂວງຊຸດໃໝ່

  ແຂວງຈຳປາສັກ ປະກາດແຕ່ງຕັ້ງຄະນະບໍລິຫານງານສະຫະພັນກີລາດອກປີກໄກ່ແຂວງຊຸດໃໝ່ ຢ່າງເປັນທາງການໂດຍແມ່ນ ທ່ານ ຄໍາແດງ ພົມມະສັກ ຮອງຜູ້ອໍານວຍການລັດວິສາຫະກິດໄຟຟ້າລາວສາຂາແຂວງຈຳປາສັກ ເປັນປະທານເພື່ອສືບຕໍ່ຊີ້ນຳ-ນຳພາ ແລະພັດທະນາວົງການກີລາດອກປີກໄກ່ແຂວງຈຳປາສັກ ໃຫ້ມີທ່າກ້າວທີ່ພົ້ນເດັ່ນ, ສ້າງໄດ້ນັກກີລາ ທີ່ມີພອນສະຫວັນ ແລະຄວາມສາມາດດີເດັ່ນກຽມຕາງໜ້າແຂວງເຂົ້າຮ່ວມງານມະຫະກຳກີລາແຫ່ງຊາດຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ.

  ແຂວງຈຳປາສັກ ໄດ້ຈັດພິທີປະກາດແຕ່ງຕັ້ງຄະນະບໍລິຫານງານ ສະຫະພັນກິລາດອກປີກໄກ່ແຂວງ ຊຸດໃໝ່ເມື່ອວັນທີ 9 ກໍລະກົດ 2020 ທີ່ພະແນກສຶກສາທິການ ແລະກີລາ ແຂວງຈຳປາສັກ, ໂດຍການເຂົ້າ ຮ່ວມຂອງທ່ານ ບົວໄຂ ສຸພາອອນ ຫົວໜ້າພະແນກສຶກສາທິການ ແລະ ກີລາແຂວງຈຳປາສັກ, ມີຄະນະພັກ-ຄະນະພະແນກ, ຂະແໜງ ການທີ່ກ່ຽວຂ້ອງ ແລະຄະນະສະ ຫະພັນກີລາດອກປີກໄກ່ແຂວງ ເຂົ້າຮ່ວມ.

   ໃນພິທີໄດ້ຜ່ານບົດສະຫຼຸບການ ເຄື່ອນໄຫວວຽກງານຂອງສະຫະພັນກີລາດອກປີກໄກ່ແຂວງໃນໄລຍະຜ່ານມາ, ຈາກນັ້ນກໍໄດ້ຜ່ານຂໍ້ຕົກລົງຂອງປະທານສະມາຄົມ ກີລາ-ກາຍຍະກໍາແຂວງວ່າດ້ວຍ ການແຕ່ງຕັ້ງຄະນະບໍລິຫານງານ ສະຫະພັນກີລາດອກປີກໄກ່ແຂວງ ຊຸດໃໝ່ ຈໍານວນ 10 ທ່ານ, ໃນນັ້ນໄດ້ແຕ່ງຕັ້ງທ່ານ ຄໍາແດງ ພົມມະສັກ ຮອງຜູ້ອໍານວຍການລັດວິສາຫະກິດໄຟຟ້າລາວສາຂາແຂວງຈຳປາສັກ ເປັນປະທານ, ທ່ານ ບຸນເຫຼື່ອມ ມ້າວຄໍາຜິວ ນັກທຸລະກິດ ແລະທ່ານ ຄໍາສອນ ເກດມາລາ ຫ້ອງວ່າການແຂວງເປັນຮອງປະທານ.

ຕອນທ້າຍພິທີ, ທ່ານ ບົວໄຂ ສຸພາອ່ອນ ຫົວໜ້າພະແນກສຶກສາທິການ ແລະກີລາແຂວງຈຳປາສັກກໍໄດ້ມີຄໍາເຫັນໂອ້ລົມ ຊຶ່ງທ່ານໄດ້ແນະນໍາໃຫ້ຄະນະບໍລິຫານງານສະຫະພັນກີລາດອກປີກໄກ່ແຂວງຊຸດ ໃໝ່ພາຍຫຼັງທີ່ໄດ້ຮັບການແຕ່ງຕັ້ງຈົ່ງເອົາໃຈໃສ່ເຄື່ອນໄຫວວຽກງານ ໂດຍສະເພາະແມ່ນການກະກຽມ ປັບປຸງພື້ນຖານໂຄງລ່າງ, ສະໜາມການແຂ່ງຂັນ ແລະດໍາເນີນການແຂ່ງຂັນເພື່ອເຮັດໃຫ້ກີລາດອກປີກໄກ່ພາຍໃນແຂວງມີການພັດທະນາດີຂຶ້ນເລື້ອຍໆທັງເປັນການປະກອບສ່ວນສ້າງຜົນງານ, ສ້າງຂະບວນການຕ້ອນຮັບກອງປະຊຸມ ໃຫຍ່ຄັ້ງທີ VIII ຂອງຜູ້ແທນອົງ ຄະນະພັກແຂວງໃຫ້ມີບັນຍາກາດຟົດຟື້ນ ແລະມີເນື້ອໃນຄວາມໝາຍ ເລິກເຊິ່ງ.

-----------

ໂດຍ: ບຸນນິກ

แชร์