ໄຊສົມບູນ ເກັບລາຍຮັບໄດ້ລຶ່ນແຜນການ 4 ປີຊ້ອນ

 ກອງປະຊຸມໃຫຍ່ຜູ້ແທນຄັ້ງທີ I ຂອງຄະນະພັກຮາກຖານພະແນກການເງິນແຂວງໄຊສົມບູນໄດ້ຈັດຂຶ້ນໃນວັນທີ 9 ກໍລະກົດ ຜ່ານມາທີ່ສະໂມສອນເມືອງອະນຸວົງພາຍ ໃຕ້ການເປັນປະທານຂອງສະຫາຍ ສຸກສະຫວາດ ວົງພູມເຫຼັກ ເລຂາຄະນະພັກຮາກຖານພະແນກການເງິນແຂວງ, ເປັນກຽດເຂົ້າຮ່ວມຂອງສະຫາຍ ພອຍຄຳ ຮຸ່ງບຸນຍວງ ຮອງເລຂາຄະນະບໍລິຫານງານພັກແຂວງ, ມີສະຫາຍ ນາງ ເພັດສະໝອນ ແສງເມືອງ ຫົວໜ້າຄະນະຈັດຕັ້ງແຂວງ, ສະຫາຍ ແກ້ວຈະເລີນ ເຊ່ຍຢິ້ງຢ່າງ, ກຳ ມະການພັກ, ຮອງປະທານກວດກາພັກ-ລັດແຂວງ ພ້ອມດ້ວຍແຂກຖືກເຊີນ, ຫ້ອງການ-ການເງິນທັງ 5 ເມືອງ ແລະຜູ້ແທນສົມບູນພາຍໃນຄະນະພັກຮາກຖານເຂົ້າ ຮ່ວມ.


  ສະຫາຍ ສຸກສະຫວາດ ວົງພູມເຫຼັກ ໄດ້ຜ່ານຮ່າງບົດລາຍງານການເມືອງກ່ຽວກັບການຈັດຕັ້ງປະຕິບັດວຽກງານຮອບດ້ານໃນໄລຍະຜ່ານມາຊຶ່ງຄະນະພັກຮາກຖານພະແນກການເງິນແຂວງໄດ້ ຖືເອົາວຽກງານສຶກສາອົບຮົມການ ເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນເປັນໜ້າທີ່ສຳຄັນໂດຍຖືເອົາການດຳເນີນຊີວິດພັກ ແລະການເຄື່ອນໄຫວວຽກງານວິຊາສະເພາະໃນແຕ່ລະເດືອນເປັນບ່ອນສຶກສາອົບຮົມກໍ່ສ້າງຊ່ວຍເຫຼືອເຊິ່ງກັນ ແລະກັນ, ພ້ອມນີ້ຄະນະພັກຮາກຖານໄດ້ຊຸກຍູ້ການເສຍເງິນບຳລຸງສະຕິພັກໃຫ້ຖືກຕ້ອງຕາມລະບຽບພັກກຳນົດຊຶ່ງປະຈຸບັນມີເງິນບຳລຸງສະຕິພັກຈຳນວນ 2,91 ລ້ານກີບ, ນອກນີ້ຍັງໄດ້ສົ່ງເງິນບຳລຸງສະຕິພັກໃຫ້ຄະ ນະພັກຂັ້ນເທິງຈຳນວນ 8,67 ແສນກີບ, ຄຽງຄູ່ກັນນັ້ນການຈັດເກັບລາຍຮັບເຂົ້າງົບປະມານປະຕິບັດໄດ້ 441,79 ຕື້ກີບ ຊຶ່ງສາມາດຈັດເກັບລາຍຮັບລື່ນຄາດໝາຍ 4 ປີຊ້ອນເປັນຈຳນວນ 10,85 ຕື້ກີບ ແລະລາຍຈ່າຍງົບປະມານປະຕິບັດໄດ້ 1.192,66 ຕື້ກີບ. ຂະນະດຽວກັນວຽກງານດ້ານອື່ນໆກໍບັນລຸຜົນສຳເລັດຕາມລະດັບຄາດໝາຍ.


ນອກນີ້ຍັງໄດ້ຮັບຟັງການຜ່ານຮ່າງບົດສຳຫຼວດການນຳພາລວມຂອງຄະນະພັກຮາກຖານພະແນກການເງິນແຂວງຕື່ມອີກ, ໂອກາດນີ້ສະຫາຍນາງ ເພັດສະໝອນ ແສງເມືອງ ໄດ້ຂຶ້ນສະເໜີມາດຖານ, ເງື່ອນໄຂຜູ້ທີ່ຈະສະໝັກຮັບເລືອກຕັ້ງເປັນຄະນະພັກຮາກຖານຊຸດໃໝ່.
  ຈາກນັ້ນຜູ້ແທນສົມບູນໄດ້ໃຊ້ສິດປະຊາທິປະໄຕຂອງຕົນດຳເນີນການປ່ອນບັດເລືອກຕັ້ງເອົາຄະນະພັກຮາກຖານຊຸດໃໝ່ຢ່າງເປັນທາງການຊຶ່ງມີຜູ້ສະໝັກທັງໝົດ 8 ສະຫາຍ, ເລືອກເອົາ 5 ສະຫາຍ. ກອງປະຊຸມຄັ້ງປະຖົມມະລືກ ໄດ້ເປັນເອກະສັນຢ່າງ ປະຊາທິປະໄຕ ເລືອກເອົາສະຫາຍ ສຸກສະຫວາດ ວົງພູມເຫຼັກ ເປັນເລຂາ, ສະ ຫາຍ ປອ ທອງປະເສີດ ໄຊຍະລາດ ເປັນຮອງເລຂາທັງເປັນຜູ້ຮັບຜິດຊອບວຽກງານພັກ-ພະນັກງານ, ສະຫາຍ ພັນທອງ ວັນທາວົງ ເປັນຮອງເລຂາ ແລະປະທານກວດກາ, ສະຫາຍ ມີໄຊ ໄຊຍະແສງ ເປັນກຳມະການ, ຮັບຜິດຊອບວຽກງານອົງການຈັດຕັ້ງມະຫາຊົນ ແລະ ວຽກງານຂະບວນການ ແລະ ສະຫາຍ ສົມພອນ ທຳມະວົງສາ ເປັນກຳມະການທັງຮັບຜິດຊອບວຽກງານເສດຖະກິດ.
  ໂອກາດດັ່ງກ່າວ ສະຫາຍ ພອຍຄຳ ຮຸ່ງບຸນຍວງ ໄດ້ມີຄຳເຫັນໂອ້ລົມຕໍ່ກອງປະຊຸມຊຶ່ງສະຫາຍໄດ້ເນັ້ນໜັກໃຫ້ຄະນະພັກຮາກຖານຊຸດໃໝ່ຈົ່ງນຳເອົາມະຕິກອງປະຊຸມ ຄັ້ງນີ້ໄປຈັດຕັ້ງຜັນຂະຫຍາຍໃຫ້ມີປະສິດທິຜົນໂດຍຖືເອົາວຽກງານສຶກສາອົບຮົມການເມືອງ-ແນວຄິດ ເປັນໜ້າທີ່ໃຈກາງໄປຄຽງຄູ່ກັບການເຕົ້າໂຮມຄວາມສາມັກຄີພາຍ ໃນ ໃຫ້ເປັນປຶກແຜ່ນ, ເຮັດວຽກຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ແບ່ງງານໃຫ້ບຸກຄົນຮັບຜິດຊອບຢ່າງລະອຽດຈະແຈ້ງຕັ້ງໜ້າປັບປຸງພັກ ໃຫ້ກາຍເປັນຄະນະພັກຮາກຖານທີ່ປອດໃສ, ເຂັ້ມແຂງ ແລະໜັກແໜ້ນພ້ອມກັນຈັດຕັ້ງປະຕິບັດຂົງເຂດວຽກງານຂອງຕົນທີ່ຂັ້ນເທິງມອບໝາຍໃຫ້ດ້ວຍຜົນສຳເລັດອັນໃໝ່ ແລະໃຫຍ່ຫຼວງກວ່າເກົ່າ.

แชร์