ນະຄອນຫຼວງພະບາງປະກາດ 72 ບ້ານ ຢຸດຕິຖ່າຍຊະຊາຍ

   ຫ້ອງການສາທາລະນະສຸກ ນະຄອນຫຼວງພະບາງ ໄດ້ຈັດພິທີປະກາດຢັ້ງຢືນບ້ານຢຸດຕິການຖ່າຍຊະຊາຍ (ODF) ຈໍານວນ 72 ບ້ານ ຂຶ້ນໃນວັນທີ 10 ກໍລະກົດ 2020 ຢູ່ຫ້ອງປະຊຸມໃຫຍ່ນະຄອນຫຼວງພະບາງໂດຍເປັນປະທານຮ່ວມຂອງທ່ານ ດຣ ບຸນທຽມ ສີພາດາ ຮອງຫົວໜ້າພະແນກສາທາລະນະສຸກແຂວງຫຼວງພະບາງ, ມີທ່ານ ບຸນລຽງ ແກ້ວມະນີ ຮອງເລຂາພັກນະຄອນຫຼວງພະບາງ, ມີຫົວໜ້າຫ້ອງການສາທານະຄອນ, ຫົວໜ້າກຸ່ມບ້ານ, ນາຍບ້ານແຕ່ລະບ້ານພ້ອມດ້ວຍແຂກຖືກເຊີນເຂົ້າຮ່ວມ.

   ທ່ານ ດຣ ນາງ ຄຳພູ ຈັນທະວົງ ຫົວໜ້າຫ້ອງການສາທາລະນະສຸກນະຄອນຫຼວງພະບາງໄດ້ຂຶ້ນຜ່ານບົດລາຍງານວຽກງານຢຸດຕິການຖ່າຍຊະຊາຍຂອງນະຄອນ ຫຼວງພະບາງໃຫ້ຮູ້ວ່າ: ນະຄອນຫຼວງພະບາງເປັນນະຄອນທີ່ຕັ້ງຢູ່ໃຈກາງເທສະບານຂອງແຂວງ, ມີເນື້ອທີ່ທັງໝົດ 774,06 ກິໂລຕາແມັດ, ມີທັງໝົດ 115 ບ້ານ, ຈັດເປັນ 15 ກຸ່ມບ້ານ, ມີຄອບຄົວທັງໝົດ 16,3 ພັນຄອບຄົວ, ພົນລະເມືອງ 96,8 ພັນຄົນ, ຍິງ 45,7 ພັນຄົນ, ອັດຕາເພີ່ມຂອງປະຊາກອນສະເລ່ຍ 1,1% ແລະເພື່ອແນໃສ່ເຮັດໃຫ້ສຸຂະພາບຂອງພໍ່ແມ່ປະຊາຊົນໄດ້ມີສຸຂະພາບດີທຸກຖ້ວນໜ້າທາງດ້ານຮ່າງກາຍ ແລະຈິດໃຈ ແລະໃຫ້ບັນລຸເປົ້າໝາຍການພັດທະນາແບບຍືນຍົງ (SDGs) ທີ່ຕິດພັນກັບວຽກງານສາທາລະນະສຸກໂດຍຖືເອົາຍຸດທະສາດການປະຕິຮູບວຽກງານສາທາລະນະສຸກ.

  ແຕ່ລະດ້ານມາຜັນຂະຫຍາຍ ແລະຈັດຕັ້ງປະຕິບັດໃຫ້ປະກົດຜົນເປັນຈິງໂດຍສຸມໃສ່ 5 ດ້ານທີ່ເປັນບຸລິມະສິດສະນັ້ນ ໜຶ່ງໃນ115 ບ້ານ ທີ່ໄດ້ປະກາດຢັ້ງຢືນເປັນບ້ານຢຸດຕິການຖ່າຍຊະຊາຍ (ODF) ຈໍານວນ 72 ບ້ານ, ມີ 13 ກຸ່ມບ້ານ, ໃນນັ້ນກຸ່ມຊຽງທອງມີ 7 ບ້ານ; ກຸ່ມວັດທາດ 7 ບ້ານ; ກຸ່ມມະໂນ 8 ບ້ານ; ກຸ່ມວິຊຸນ 6 ບ້ານ; ກຸ່ມເມືອງງາ 7 ບ້ານ, ກຸ່ມພູໝອກ 7 ບ້ານ; ກຸ່ມສັງຄະໂລກ 3 ບ້ານ; ກຸ່ມຜາໂຄມ 8 ບ້ານ; ກຸ່ມພູເຫຼັກ ຈະເລີຍ 3 ບ້ານ; ກຸ່ມຊຽງມວກ 2 ບ້ານ, ກຸ່ມປາກເຊືອງ4 ບ້ານ; ກຸ່ມພູຊວງ 5 ບ້ານ ແລະກຸ່ມເມືອງຂາຍ 5 ບ້ານການປະກາດຄັ້ງນີ້ຈະເປັນກຸ່ມບ້ານແບບຢ່າງໃຫ້ບັນດາບ້ານທີ່ຍັງບໍ່ທັນໄດ້ຮັບ ໃບຢັ້ງຢືນເພື່ອພ້ອມກັນປະ ຕິບັດ.

  ສໍາລັບນະຄອນຫຼວງພະບາງໃນປີ 2020 ນີ້ຕາມແຜນຈະຕ້ອງສ້າງບ້ານລົບລ້າງການຖ່າຍຊະຊາຍໃຫ້ໄດ້ 107 ບ້ານ ແລະໃນປີໜ້າໃຫ້ໄດ້ອີກ 8 ບ້ານ ເພື່ອໃຫ້ບັນລຸຕາມແຜນລຶບລ້າງການຖ່າຍຊະຊາຍໃຫ້ສໍາເລັດໃນປີ 2021 ແລະປະກາດເປັນນະຄອນລຶບລ້າງການຖ່າຍຊະຊາຍຈາກນັ້ນກໍໄດ້ມີພິທີມອບຮັບໃບຢັ້ງຢືນໃຫ້ 72 ບ້ານ ໂດຍແມ່ນປະທານເປັນກຽດມອບໃຫ້ແຕ່ລະບ້ານ ແລະຕອນທ້າຍພິທີຍັງໄດ້ຮັບຟັງຄໍາໂອ້ລົມຈາກທ່ານປະທານກອງປະຊຸມຕື່ມອີກ.

____________

ຂຽນໂດຍ: ສີສຸວັນ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์