ຫັນປ່ຽນຈາກການຖາງປ່າເຮັດໄຮ່ສູ່ການຜະລິດກະສິກຳເຮັດນາໃຫ້ຄອບຄົວພົ້ນທຸກ

  ຄວາມດຸໝັ່ນຂະຫຍັນພຽນ, ຄວາມອົດທົນພາກພຽນ, ຄວາມບຸກບືນການທຳມາຫາກິນແມ່ນມູນເຊື້ອອັນດີງານຂອງປະຊາຊົນລາວບັນດາເຜົ່າ ແລະ ກໍ່ແມ່ນບໍ່ແຮງ ຄວາມສຳເລັດບວກກັບມີຫົວຄິດປະດິດສ້າງໃນການຫັນປ່ຽນສະພາບໄປຕາມເງື່ອນໄຂທີ່ເຮົາມີ ແລະ ການຕັດສິນໃຈໃນການຈະລົງມືເຮັດແນ່ນອນວ່າສິ່ງທີ່ເຮົາຢາກເຮັດຢາກທຳນັ້ນກໍ່ຈະປະກົດຜົນເປັນຈິ່ງດັ່ງຄອບຄົວຂອງ ລຸງສາຍພອນ ຫຼອງຄຳໄຕ ປະຊາຊົນບ້ານລຶກດົງ, ກໍ່ແມ່ນຄອບຄົວໜຶ່ງທີ່ມີຄວາມດຸໝັ່ນຂະຫຍັນພຽນໃນການຫັນປ່ຽນຈາກການຖາງປ່າເຮັດໄຮ່ແບບເລື່ອນລອຍສູ່ການຜະລິດກະສິກຳເຮັດນາຂາຍເຂົ້າເພື່ອເປັນສິນຄ້າ.

 ລຸງ ສາຍພອນ ຫຼອງຄຳໄຕ ອາຍຸ 63 ປີ ປະຈຸບັນຢູ່ບ້ານລຶກດົງ ເມືອງຕະໂອ້ຍ ແຂວງສາລະວັນ, ຄອບຄົວຂອງເພິ່ນມີ 13 ຄົນຍິງ 6 ຄົນ, ອາຊີບຕົ້ນຕໍ່ແມ່ນເຮັດນາ, ອາຊີບສຳຮອງແມ່ນປູກພືດກະສິກຳໃນເມື່ອກ່ອນຄອບຄົວຂອງເພິ່ນແມ່ນຢຶດຖືອາຊີບເຮັດໄຮ່ຖາງປ່າແບບເລື່ອນລອຍເຮັດແບບແລ້ວບ່ອນໜຶ່ງຍ້າຍໄປອີກບ່ອນໜຶ່ງ, ເຮັດໃຫ້ຄອບຄົວພົບກັບຄວາມຫຍຸ້ງຍາກ, ເຂົ້າກິນກໍ່ຂາດໆເຂີນໆບວກກັບສະມາຊິກໃນຄອບຄົວກໍ່ມີຫຼາຍຄົນມາຮອດປີ 2002 ຕົນເອງ ແລະຄອບຄົວຈິ່ງປຶກສາຫາລືກັນຈິ່ງຕັດໃຈຫັນເອົາການເຮັດນາແບບປະຖົມປະຖານໂດຍນຳໃຊ້ແຮງງານຄົນໃນຄອບຄົວ,ເລີ່ມຕົ້ນເຮັດນາທໍາອິດແມ່ນ 2-3 ໄຮ່ນຳໃຊ້ແນວພັນເຂົ້າດອກຄຳ, ການປັກດຳແບບກ້າກີບດຽວຜົນຜະລິດໄດ້ປະມານ 5-10 ຊອບ ເນື່ອງຈາກອຸປະກອນທຳການ ຜະລິດບໍ່ທັນສະໄໝ, ຕົກມາຮອດ ປີ 2004 ພາຍຫຼັງມີໂຄງການອ໋ອກສະຟາມ ແລະອີພັດມາຊ່ວຍໃນການສະໜອງອຸປະກອນຮັບໃຊ້ໃນການຜະລິດເຮັດໃຫ້ຕົນເອງ ແລະຄອບຄົວມີຄວາມສະດວກສະບາຍໃນການທຳການຜະລິດ ແລະ ໄດ້ຂະຫຍາຍການປູກເຂົ້າຈາກ 2-3 ໄຮ່ຂະຫຍາຍເປັນ 2 ເຮັກຕາ ໃນນັ້ນຜະລິດກະສິກຳໄດ້ 2 ລະດູຄື: ລະດູນາປີ ແລະນາແຊງ,ຜົນຜະລິດນາປີສະເລ່ຍໄດ້ 2-3 ໂຕນຕໍ່ເຮັກຕາ ແລະຜົນຜະລິດນາແຊງສະເລ່ຍໄດ້ 3-4 ໂຕນຕໍ່ເຮັກຕາ ເປັນເງິນ 10-15 ລ້ານກີບຕໍ່ປີ.

  ນອກຈາກການເຮັດນາປີ ແລະນາແຊງແລ້ວຄອບຄົວຂອງ ລຸງ ສາຍພອນ ຫຼອງຄຳໄຕ ຍັງໄດ້ປູກພືດກະສິກຳເພື່ອນຳໃຊ້ຂາຍ ແລະບໍລິໂພກໃນຄອບຄົວເປັນຕົ້ນແມ່ນ: ປູກສາລີ, ໝາກແໜ່ງ, ກາເຟ, ມັນຕົ້ນ,ຢາງໂບງ ແລະອື່ນໆອີກຈຳນວນໜຶ່ງຄຽງຄູ່ກັນນັ້ນເຮັດໃຫ້ຄອບຄົວມີເງິນສະສົມ,ມີທຶນການສຶກສາໃຫ້ລູກ, ມີເຮືອນຢູ່ຖາວອນ 1 ຫຼັງ, ລົດໄຖນາ 1 ຄັນ, ລົດຈັກ 3 ຄັນ ແລະມີເຄື່ອງໃຊ້ສອຍໃນຄົວເຮືອນເຮັດໃຫ້ຄອບຄົວລຸງກາຍເປັນຄອບຄົວຕົວແບບໃນການປູກພືດ ແລະ ຫຼຸດພົ້ນອອກຈາກ ຄວາມທຸກຍາກໄປເທື່ອລະກ້າວ.

แชร์