ຊຸກຍູ້ຕິດຕາມໂຄງການຊົນລະປະທານເອົານໍ້າຂຶ້ນເພື່ອຕ້ານແລ້ງ

  ໃນວັນທີ 9 ກໍລະກົດ 2020 ທ່ານ ແຫວນເພັດ ລັດດາວົງ ເຈົ້າເມືອງໆຄົງເຊໂດນ ແຂວງສາລະວັນ ພ້ອມຄະນະໄດ້ລົງຊຸກຍູ້ຕິດຕາມໂຄງການຊົນລະປະທານເອົານໍ້າຂຶ້ນເພື່ອຕ້ານໄພແລ້ງຢູ່ຈຸດຕ່າງໆທີ່ມີເງື່ອນໄຂໂດຍສະເພາະກໍແມ່ນບ້ານທີ່ມີໂຄງການຊົນລະປະທານເປັນບ້ານທີ່ຕັ້ງຢູ່ແຄມນໍ້າເຊໂດນຄື: ບ້ານຕານປ່ຽວ ແລະ ບ້ານຄໍາທອງ ແມ່ນຕ້ອງໄດ້ເອົານໍ້າຂຶ້ນເພື່ອໃຫ້ປະຊາຊົນໄດ້ມີນໍ້າເພື່ອທໍາການຜະລິດເຂົ້າໃນລະດູຝົນ.

   ທ່ານ ສອນໄຊ ໄຊຍະລາດ ຮອງຫົວໜ້າຫ້ອງການກະສິກໍາ ແລະປ່າໄມ້ເມືອງຄົງເຊໂດນໄດ້ລາຍງານໃຫ້ຮູ້ວ່າໃນທົ່ວເມືອງແມ່ນມີໂຄງການຊົນລະປະທານ 34 ໂຄງ ການແຕ່ປະຕິບັດໄດ້ຕົວຈິງແມ່ນ 32 ໂຄງການໃນເນື້ອທີ່ຕ້ານແລ້ງແມ່ນ 4 ພັນກວ່າເຮັກຕາ, ນອກນັ້ນຍັງມີຝາຍນໍ້າລົ້ນ ແລະ ໜອງ, ຫ້ວຍຮ່ອງ, ຄອງບຶງທີ່ສາມາດຕອບສະໜອງນໍ້າໃຫ້ແກ່ປະຊາຊົນໄດ້ທໍາການຜະລິດຊຶ່ງໄດ້ມີເນື້ອທີ່ 2 ຮ້ອຍກວ່າເຮັກຕາ ການໃຊ້ໂຄງການຊົນລະປະທານເຂົ້າໃນການຜະລິດເຂົ້າໃນລະດູຝົນນີ້ກໍຍ້ອນດິນຟ້າອາກາດບໍ່ເອື້ອອໍານວຍ, ຟ້າຝົນບໍ່ຕົກຕາມລະດູການຈິ່ງຕ້ອງໄດ້ໃຊ້ໂຄງການຊົນລະປະທານສູບນໍ້າຂຶ້ນມາເພື່ອໃຫ້ປະຊາຊົນໄດ້ທໍາການຜະລິດເຂົ້ານາປີໃຫ້ທ່ວງທັນກັບລະດູການ ແລະໃຫ້ໄດ້ປະສິດທິພາບສູງ.

แชร์