ຮອງນາຍົກຊີ້ນຳ ຖວທ ເອົາໃຈໃສ່ 7 ບັນຫາ

  ໃນໜຶ່ງປີຜ່ານມາເຖິງແມ່ນຂະແໜງ ຖວທ ຈະມີຫຼາຍຜົນງານທີ່ເປັນການຢັ້ງຢືນເຖິງຄວາມຄວາມຮັບຜິດຊອບສູງ, ຄວາມເອົາໃຈໃສ່, ເຮັດຫຼ້ອນໜ້າທີ່ການເມືອງທີ່ພັກ-ລັດ ແລະ ປະຊາຊົນມອບໝາຍໃຫ້ແຕ່ກໍປາສະຈາກບໍ່ໄດ້ຈຸດອ່ອນ ແລະ ຂໍ້ຄົງຄ້າງຈຳນວນໜຶ່ງຊຶ່ງທ່ານຮອງນາຍົກໄດ້ຊີ້ນຳ 7 ບັນຫາໃຫ້ ຖວທ ຈົ່ງພ້ອມກັນເອົາໃຈໃສ່ຫາວິທີການ ແລະມາດຕະການໃນການແກ້ໄຂໃຫ້ນັບມື້ດີຂຶ້ນ.

  ໃນໂອກາດເຂົ້າຮ່ວມໂອ້ລົມກອງປະຊຸມວຽກງານຖະແຫຼງຂ່າວວັດທະນະທຳ ແລະທ່ອງທ່ຽວ (ຖວທ) ປີ 2019 ທີ່ຈັດຂຶ້ນເມື່ອວັນທີ 12 ກຸມພາຜ່ານມາຢູ່ນະຄອນຫຼວງວຽງຈັນ ທີ່ດຳເນີນພາຍໃຕ້ການເປັນປະທານຂອງ ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ແລະໝົດພະແນກ ຖວທ ທົ່ວປະເທດເຂົ້າຮ່ວມ ທ່ານ ສອນໄຊ ສີພັນດອນຮອງນາຍົກລັດຖະມົນຕີໄດ້ມີບາງຄໍາເຫັນພ້ອມທັງຕັ້ງບັນຫາເຈາະຈີ້ມແລກປ່ຽນຕໍ່ກັບຈຸດສຸມໃນການພັດທະນາວຽກງານຖະແຫຼງຂ່າວ, ວັດທະນະທຳ ແລະທ່ອງທ່ຽວໃນຕໍ່ໜ້າອັນທຳອິດແມ່ນດ້ານການເມືອງແນວຄິດ: ຊຶ່ງເປັນບັນຫາສໍາຄັນ, ກ່ອນອື່ນໝົດແມ່ນຄະນະນໍາທຸກຂັ້ນຕ້ອງມີແນວຄິດເປັນເອກະພາບຕໍ່ກັບແນວທາງນະໂຍບາຍຂອງພັກ-ລັດ, ມີຄວາມເຊື້ອໝັ້ນຕໍ່ການນໍາພາຂອງພັກ-ລັດ ແລະມີຄວາມເປັນເອກະພາບພາຍ ໃນຢ່າງແທ້ຈິງໃນການດໍາເນີນວຽກງານຕ່າງໆ 2 ໃຫ້ກໍາໄດ້ແນວທາງນະໂຍບາຍຂອງພັກ-ລັດຢ່າງເລິກເຊິ່ງ: ໝາຍວ່າຢາກໃຫ້ເອົາໃຈໃສ່ຄົ້ນຄວ້າແນວທາງນະໂຍບາຍ, ມະຕິຄໍາສັ່ງ, ລະບຽບການຕ່າງໆຂອງພັກ-ລັດຢ່າງເລິກເຊິ່ງ,ຢ່າພຽງອ່ານຜ່ານແບບເຜີນໆທີ່ຂາດການຄົ້ນຄວ້າຜັນຂະຫຍາຍ, ໂດຍສະເພາະແມ່ນບັນດາມະຕິທີ່ອອກມາໃໝ່ໆຂອງກອງປະຊຸມພັກ, ຂອງສະພາ ແລະຂອງລັດຖະບານເປັນຕົ້ນແມ່ນມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ X .

   3 ດ້ານກົງຈັກການຈັດຕັ້ງ ແລະບຸກຄະລາກອນ: ຂໍໃຫ້ພ້ອມກັນຄົ້ນຄວ້າເປັນເອກະພາບ ແລະພ້ອມກັນກ້າຕັດສິນໃຈ, ກ້າປະຕິບັດຢ່າງແທ້ຈິງ, ກວດກາເບິ່ງຄືນບ່ອນໃດພະນັກງານເຫຼືອບໍ່ພໍ,ພະນັກງານບໍ່ມີຄຸນະພາບ,ເຮັດວຽກແປະໆບາງໆກໍຕ້ອງແກ້ໃຫ້ໄວຄຽງຄູ່ກັນນັ້ນກໍຕ້ອງໄດ້ເອົາໃຈໃສ່ໃນການກໍ່ສ້າງພະນັກ ງານຢ່າງມີຈຸດສຸມຕາມຄວາມຕ້ອງການຂອງວຽກງານຕົວຈິງ, ຍັງຂາດບຸກຄະລາກອນດ້ານໃດແມ່ນໃຫ້ເລັ່ງໃສ່ສ້າງດ້ານນັ້ນ, ເພື່ອມາບັນຈຸເຂົ້າເຮັດວຽກນັ້ນ.

  4 ດ້ານນິຕິກໍາ: ແມ່ນວຽກງານໜຶ່ງທີ່ມີຄວາມຈໍາເປັນທີ່ຂາດບໍ່ໄດ້, ການຄຸ້ມ ຄອງລັດ, ຄຸ້ມຄອງສັງຄົມໃນປະຈຸບັນຕ້ອງໄດ້ຫັນໄປສູ່ການຄຸ້ມຄອງດ້ວຍລະ ບຽບກົດໝາຍ, ພວກເຮົາບໍ່ສາມາດຈະຄຸ້ມຄອງກັນດ້ວຍຮູບການປະເພນີ, ດ້ວຍຄວາມຊິນເຄີຍຄືແຕ່ເກົ່າໄດ້ແລ້ວ, ເພາະສັງຄົມມີການປ່ຽນແປງ, ພຶດຕິກໍາຂອງ ຄົນມີການປ່ຽນແປງ.

   5 ດ້ານຖະແຫຼງຂ່າວ: ຂໍໃຫ້ເອົາໃຈໃສ່ຈັດຕັ້ງປະຕິບັດຕາມມະຕິຂອງສະພາທີ່ໄດ້ຮັບຮອງຄື: ສູ້ຊົນຫັນຈາກລະບົບອະນາລ໋ອກມາເປັນລະບົບດີຈີຕອລທີ່ທັນສະໄໝໃນທົ່ວປະເທດ ແລະຂະຫຍາຍຕາໜ່າງໂທລະໂຄ່ງໃຫ້ໄດ້ຕື່ມ 350  ບ້ານ, ນີ້ແມ່ນຄາດໝາຍໃຫຍ່ຈະຕ້ອງໄດ້ພ້ອມກັນສູ້ຊົນໃຫ້ສໍາເລັດ ແລະຕ້ອງຫັນໄປຊົມໃຊ້ສື່ແບບໃໝ່ໃຫ້ຫຼາຍ. ພ້ອມນັ້ນ, ດ້ານເນື້ອໃນ, ຄວາມວ່ອງໄວກໍເຮັດໄດ້ດີແລ້ວແຕ່ຢາກໃຫ້ເອົາໃຈໃສເພີ່ມເຕີມໂດຍສະເພາະຂ່າວຢາກໃຫ້ພະຍາ ມຍາມຫຼຸດຜ່ອນຂ່າວພິທີການທີ່ບໍ່ຈໍາເປັນລົງ, ຫັນມາຜະລິດຂ່າວທີ່ຕິດພັນກັບການສ້າງສາພັດທະນາ, ການຜະລິດທີ່ຕິດພັນກັບການດໍາລົງຊີວິດ, ວຽກດີຄົນເດັ່ນທີ່ເປັນບົດຮຽນໃຫ້ແກ່ສັງຄົມ, ຄຽງຄູ່ກັນນັ້ນກໍຕ້ອງໃຫ້ມີຂ່າວຕໍານິວິຈານໃນສິ່ງທີ່ບໍ່ຖືກຕ້ອງໄປພ້ອມໆກັນ.

  6 ວຽກງານວັດທະນະທຳ: ໃນປີ 2019 ນີ້ຕ້ອງສຸມໃສ່ການສ້າງຄອບຄົວວັດທະນະທໍາໃຫ້ໄດ້ຕື່ມ 30 ພັນຄອບຄົວ, ສ້າງບ້ານວັດທະນະທໍາໃຫ້ໄດ້ຕື່ມ 250 ບ້ານຕາມຄາດໝາຍທີ່ກໍານົດໄວ້ແຕ່ການສ້າງນັ້ນຂໍໃຫ້ເນັ້ນດ້ານມາດຖານຄຸນນະພາບຕື່ມ ແລະໃຫ້ເປັນເຈົ້າການໃນການຕິດຕາມຊຸກຍູ້ການສະເໜີເອົາທົ່ງໄຫຫີນແຂວງຊຽງຂວາງເຂົ້າເປັນມໍລະດົກໂລກ ແລະຮີບຮ້ອນປະສານສົມທົບກັບພາກສ່ວນກ່ຽວຂ້ອງຕ່າງໆໃນການດໍາເນີນເອກະສານນໍາສະເໜີເອົາພູຫີນໜາມໜໍ່ ແຂວງຄໍາມ່ວນ, ລວມທັງຟ້ອນລໍາວົງລາວ ແລະສີ້ນລາຍນາກລາວເຂົ້າເປັນມໍລະດົກໂລກໃຫ້ທ່ວງທັນຕາມແຜນການ ແລະສືບຕໍ່ປົກປັກຮັກສາເສີມຂະ ຫຍາຍສິລະປະວັດທະນະທໍາອັນດີງາມຂອງຊາດລາວເຮົາໃຫ້ດີ ແລະຕ້ອງເລັ່ງແກ້ໄຂປາກົດການຫຍໍ້ທໍ້ຕ່າງໆທີ່ຢູ່ໃນຄວາມຮັບຜິດຊອບຂອງຕົນໃຫ້ໄດ້ ແລະ ໃຫ້ໄວເພື່ອອັດຕັນຫາງສຽງສັງຄົມຕ່າງໆນາໆນັ້ນ.

   7 ວຽກງານທ່ອງທ່ຽວ: ເປັນວຽກງານໜຶ່ງທີ່ລັດຖະບານ ສປປ ລາວ ໄດ້ຖືເອົາວຽກງານການທ່ອງທ່ຽວເປັນຂະແໜງເສດຖະກິດສຳຄັນໜຶ່ງ ແລະເປັນກໍາ ລັງແຮງຍູ້ດັນ, ຂັບເຄື່ອນການຂະຫຍາຍຕົວເສດຖະກິດຂອງປະເທດ, ດັ່ງນັ້ນຈິ່ງໄດ້ອະນຸມັດໃຫ້ຈັດປີທ່ອງທ່ຽວລາວ 2018 ທີ່ຜ່ານມາ ແລະປີນີ້ກໍໄດ້ເຫັນດີ ແລະຕົກລົງໃຫ້ເປີດປີທ່ອງທ່ຽວລາວ-ຈີນໃຫ້ເອົາໃຈໃສ່ຈັດຕັ້ງປະຕິບັດໃຫ້ດີ,ໃຫ້ມີຜົນສໍາເລັດ,ໂດຍຈະຕ້ອງໄດ້ປະສານສົມທົບວາງແຜນໃຫ້ລະອຽດໂດຍໄວນອກ ຈາກ 8 ກິດຈະກໍາທີ່ໄດ້ກໍານົດນັ້ນແລ້ວ, ຂໍໃຫ້ມີການສົມທົບລະຫວ່າງສູນກາງ ແລະທ້ອງຖິ່ນຄົ້ນຄວ້າຈະຈັດກິດຈະກໍາໃດເພີ່ມຢູ່ບັນດາແຂວງ, ນະຄອນຫຼວງທີ່ເຫັນວ່າເໝາະສົມ ແລະຈະມີປະສິດທິພາບ, ປະສິດທິຜົນດີເຮັດໃຫ້ປີທ່ອງທ່ຽວລາວ-ຈີນ 2019 ມີບັນຍາກາດອັນຟົດຟື້ນ.

ນສພ-ເສດຖະກິດ-ສັງຄົມ

แชร์