6 ເດືອນຕົ້ນປີ ອັດຕາເຕີບໂຕ ຈີດີພີ ຂອງແຂວງຄຳມ່ວນຢູ່ໃນລະດັບ 4,45%

  ຫົວໜ້າພະແນກແຜນການ ແລະການລົງທຶນແຂວງຄຳມ່ວນ ທ່ານ ເດດສັກດາ ມະນີຄຳ ລາຍງານໃຫ້ຮູ້ວ່າ: 6 ເດືອນຕົ້ນປີ 2020 ອັດຕາການເຕີບໂຕຂອງ GDP ແຂວງຄຳມ່ວນຂະຫຍາຍຕົວຢູ່ໃນລະດັບ 4,45% ຫຼຸດແຜນການ 2,31% (ສະພາຮັບຮອງ 6,76%), ລວມຍອດມູນຄ່າຜະລິດຕະພັນພາຍໃນ GDP ບັນລຸໄດ້ 8.476 ຕື້ກີບ (ສະພາຮັບຮອງ 9.028 ຕື້ກີບ) ໃນນັ້ນຂະແໜງກະສິກຳຄາດວ່າຈະຂະຫຍາຍຕົວ 4,66% ກວມເອົາ 18,18% ຂອງ GDP, ຂະແໜງອຸດສາ ຫະກຳ 5,95% ກວມເອົາ 46,92% ແລະຂະແໜງບໍລິການ 4,69% ກວມເອົາ 31,25%, ສະເລ່ຍລາຍຮັບຕໍ່ຫົວຄົນບັນລຸ 2.204 ໂດລາສະຫະລັດ, ຂົງ ເຂດການລົງທຶນພາກຕ່າງໆ ໃນທົ່ວແຂວງປະຕິບັດໄດ້ 830 ຕື້ກີບ, ກວມເອົາ 9,80% ຂອງລວມຍອດຜະລິດຕະພັນພາຍໃນ 6 ເດືອນ 2020.

  ໃນນັ້ນການລົງທຶນຂອງລັດ 249 ຕື້ກີບ ກວມເອົາ 2,95% ຂອງ GDP, ເອກະຊົນພາຍໃນ ແລະຕ່າງປະເທດ 426 ຕື້ກີບ ກວມເອົາ 5,03% ແລະລະບົບສິນເຊື່ອທະນາຄານ 154 ຕື້ກີບ ກວມ 1,82%. ສ່ວນທາງດ້ານການສົ່ງອອກສິນຄ້າປະຕິບັດໄດ້ 117 ລ້ານໂດລາສະຫະລັດ ເທົ່າກັບ 33% ຂອງແຜນການປີທຽບໃສ່ໄລຍະດຽວກັນຂອງປີຜ່ານມາຫຼຸດລົງ 3,62% ສ່ວນປະເພດສິນຄ້າທີ່ສົ່ງອອກຫຼາຍກວ່າໝູ່ແມ່ນປູນຊີມັງ, ແຮ່ເຫຼັກ ແລະຢາງພາລາແທ່ງ, ທາງດ້ານມູນຄ່າການນຳເຂົ້າບັນລຸ 82 ລ້ານໂດລາສະຫະລັດ ເທົ່າກັບ 39,02% ຂອງແຜນການເພີ່ມຂຶ້ນ 52,45% ເມື່ອທຽບໃສ່ໄລຍະດຽວກັນຂອງປີຜ່ານມາ, ປະເພດສິນຄ້າທີ່ນໍາເຂົ້າສ່ວນໃຫຍ່ແມ່ນເຄື່ອງໄຟຟ້າ, ວັດສະດຸກໍ່ສ້າງແລະສິນຄ້າອຸດສາຫະກຳ.


_______________

ຂຽນໂດຍ: ກອງຄຳ, ໜັງສືພິມເສດຖະກິດ-ສັງຄົມ

แชร์