ໜ່ວຍພັກຄະນະກວດກາພັກແຂວງໄຊຍະບູລີ ໄຂກອງປະຊຸມໃຫຍ່ ຄັ້ງທີ VIII

  ກອງປະຊຸມໃຫຍ່ໜ່ວຍພັກຄະນະກວດກາພັກແຂວງໄຊຍະບູລີຄັ້ງທີ VIII ໄດ້ຈັດຂຶ້ນໃນວັນທີ 7 ກໍລະກົດ 2020 ທີ່ຫ້ອງປະຊຸມຄະນະກວດກາພັກແຂວງ,ໃຫ້ກຽດ ເຂົ້າຮ່ວມກອງປະຊຸມຄັ້ງນີ້ມີ ສະຫາຍ ດວງຕາ ໄຊວຸດ ກໍາມະການປະຈໍາພັກແຂວງຫົວໜ້າຄະນະຈັດຕັ້ງແຂວງ,ມີໜ່ວຍປະຕິບັດງານຂອງແຂວງ, ແຂກຖືກເຊີນພ້ອມ ດ້ວຍສະມາຊິກພັກສົມບູນ-ສໍາຮອງເຂົ້າຮ່ວມ.

  ກອງປະຊຸມໄດ້ພ້ອມກັນຄົ້ນຄວ້າ ແລະເປັນເອກະພາບກັນຮັບຮອງເອົາບົດລາຍງານການເມືອງທັງສອງພາກໃນໄລຍະ 5 ປີຜ່ານມາທິດທາງໜ້າທີ່, ຄາດໝາຍສູ້ຊົນຂອງແຜນການ 5 ປີ (2020-2025) ແລະບົດສໍາຫຼວດການນໍາພາລວມຂອງໜ່ວຍພັກເພື່ອນໍາພາໜ່ວຍພັກກ້າວຂຶ້ນດ້ວຍທ່ວງທ່າອັນໜັກແໜ້ນຮອບດ້ານເຮັດໃຫ້ສະມາຊິກພັກພະນັກງານພາຍໃນໜ່ວຍພັກຄະນະກວດກາພັກແຂວງນັບມື້ນັບເຂັ້ມແຂງຂຶ້ນ, ສະຫາຍ ສົມຫວັງ ແກ້ວວິໄລສັກ ກຳມະການພັກແຂວງເລຂາໜ່ວຍພັກຄະນະກວດກາພັກແຂວງປະທານຄະນະກວດກາພັກແຂວງ ໄດ້ກ່າວວ່າ: ຕະຫຼອດໄລຍະ 5 ປີຜ່ານມາເຖິງວ່າມີຄວາມຫຍຸ້ງຍາກຫຼາຍດ້ານແຕ່ພາຍໃຕ້ການນໍາພາຂອງພັກ, ການຊີ້ນໍາໂດຍກົງຂອງຄະນະບໍລິຫານງານພັກແຂວງ; ເວົ້າລວມເວົ້າສະເພາະກໍ່ຄືໜ່ວຍພັກຄະນະກວດກາພັກແຂວງໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາ ຊິກພັກພະນັກງານລັດຖະກອນ, ກໍາແໜ້ນແນວທາງມະຕິຄໍາສັ່ງ, ລະບຽບກົດໝາຍ, ມູນເຊື້ອຂອງ ຊາດຂອງພັກ ໃຫ້ມີແນວຄິດອຸ່ນ ອ່ຽນທຸ່ນທ່ຽງ, ມີຈັນຍາບັນ, ຈັນຍາທໍາ ປະຕິບັດໜ້າທີ່ຮັບໃຊ້ປະຊາຊົນດ້ວຍຄວາມບໍລິສຸດໃຈໂດຍຢຶດໝັ້ນຖືສໍາຄັນການເຮັດວຽກຕາມຫຼັກການລວມສູນປະຊາທິປະໄຕ, ແບ່ງຄວາມຮັບ ຜິດຊອບພາຍໃນຄະນະ-ພະນັກງານ, ປະຕິບັດລະບອບປະຊຸມລະບອບຕິດຕາມ-ກວດກາເປັນປົກກະຕິ, ເອົາໃຈໃສ່ກໍ່ສ້າງພັກ ແລະປັບປຸງພັກໃຫ້ໄປຕາມ 5 ຫຼັກການ 3 ທິດຊີ້ນໍາ. ຄຽງຄູ່ກັນນີ້ໜ້າທີ່ວິຊາສະເພາະກໍ່ ມີຫຼາຍດ້ານທີ່ໄດ້ຮັບຜົນສໍາເລັດເປັນຕົ້ນແມ່ນວຽກງານຕິດຕາມກວດກາພາຍໃນພັກ, ກວດກາການຄຸ້ມຄອງບໍລິຫານລັດ, ສະກັດກັ້ນການຕ້ານການສໍ້ລາດບັງຫຼວງ, ຄົ້ນຄວ້າແກ້ໄຂຄໍາຮ້ອງ-ຄໍາສະເໜີຂອງພະນັກງານສະມາຊິກພັກ ແລະພົນລະເມືອງ, ສືບຕໍ່ສຸມໃສ່ຕິດຕາມກວດກາໂຄງການລົງທຶນຂອງລັດແຕ່ຫົວທີ, ກວດກາຕາມຜົນຂອງການກວດສອບ, ກວດກາການຄຸ້ມຄອງ-ນໍາໃຊ້ທີ່ດິນ ແລະ ກວດກາແກ້ໄຂທຸລະກິດໄມ້ໂດຍສະເພາະແມ່ນການຈັດຕັ້ງປະຕິບັດຄໍາສັ່ງເລກທີ 15/ນຍ ແລະອື່ນໆ.

  ປະຈຸບັນໜ່ວຍພັກຄະນະກວດກາພັກແຂວງໄຊຍະບູລີມີພະນັກງານທັງໝົດ 27 ສະຫາຍ, ຍິງ 8 ສະຫາຍ ໃນນີ້ສະມາຊິກພັກສົມບູນ 10 ສະຫາຍ, ຍິງ 6 ສະ ຫາຍ, ສໍາຮອງ 2 ສະຫາຍ, ລັດຖະກອນ 4 ສະຫາຍ, ອາສາສະໝັກ 2 ສະຫາຍ, ມີ 5 ຂະແໜງການ. ຜ່ານການຕີລາຄາແບ່ງປະເພດສະມາຊິກພັກພະນັກງານ, ຂະແໜງ,ອົງການປະເພດສະມາຊິກພັກໄດ້ປະເພດແຂງ 18 ສະຫາຍ, ຍິງ 5 ສະຫາຍ, ກາງ 1 ສະຫາຍ, ພະນັກງານໄດ້ປະເພດດີ 5 ສະຫາຍ, ປະເພດຂະແໜງການໄດ້ແຂງ ທັງ 5 ຂະ ແໜງ, ອົງການຈັດຕັ້ງຊາວໜຸ່ມ, ແມ່ຍິງ, ກໍາມະບານໄດ້ແຂງ, ປະ ເພດໜ່ວຍພັກໄດ້ປະເພດປອດໃສ, ເຂັ້ມແຂງ,ໜັກແໜ້ນ. ກອງປະຊຸມ ຍັງໄດ້ປ່ອນບັດເລືອກເອົາຄະນະ ໜ່ວຍພັກສະໄໝທີ VIII ມີຈໍານວນ 5 ສະຫາຍ, ຍິງ 1 ສະຫາຍ ເລືອກເອົາ 3 ສະຫາຍ. ກອງປະຊຸມຄັ້ງປະຖົມມະລຶກເຫັນດີເປັນເອກະສັນກັນເລືອກເອົາ ສະຫາຍ ສົມຫວັງ ແກ້ວວິໄລສັກ ເປັນເລຂາໜ່ວຍພັກ, ສະຫາຍ ສີທອນ ພັນທະວົງ ເປັນຮອງເລຂາໜ່ວຍພັກທັງເປັນປະທານກວດກາ ແລະ ສະຫາຍ ພອນສະຫວັນ ແສນທໍາ ເປັນຄະນະ. ພ້ອມນີ້ກອງປະຊຸມຍັງໄດ້ປ່ອນບັດເລືອກຕັ້ງເອົາຜູ້ແທນສົມບູນສໍາຮອງເພື່ອເຂົ້າຮ່ວມກອງປະຊຸມໃຫຍ່ອົງຄະນະພັກແຂວງໄຊຍະບູລີຄັ້ງທີ VII ທີ່ຈະໄຂຂຶ້ນໃນຕໍ່ໜ້ານີ້ຈໍານວນ 7 ສະຫາຍ, ເລືອກເອົາຜູ້ແທນສົມບູນ 5 ສະຫາຍ ແລະສໍາຮອງ 1 ສະຫາຍ.

______________

ຂຽນໂດຍ: ບຸນທີ, ໜັງສືພິມເສດຖະກິດ-ສັງຄົມ

แชร์