ຄວາມແຕກຕ່າງລະຫວ່າງພະພຸດທະເຈົ້າ ແລະພະອໍຣະຫັນ

 ພະພຸດທະເຈົ້າເປັນຜູ້ທີ່ຕັດສະຣູ້ອະຣິຍະສັດສີ່ຄື: ຮູ້ເລື່ອງຄວາມທຸກສາເຫດແຫ່ງການເກີດທຸກຮູ້ຄວາມພົ້ນທຸກ ແລະຫົນທາງ ຫຼືແນວທາງປະຕິບັດເພື່ອພົ້ນຈາກຄວາມທຸກພະອົງເປັນຜູ້ບໍລິສຸດຄົນທໍາອິດໃນໂລກ ແລະສອນວິທີປະຕິບັດໃຫ້ຜູ້ອື່ນບໍລິສຸດຕາມ, ສ່ວນພະອໍຣະຫັນເປັນພຽງລູກສິດທີ່ຮູ້ຕາມ ແລະປະຕິບັດຕາມພະພຸດທະເຈົ້າ.

  ອີງຕາມຂໍ້ມູນທັມມະໃຫ້ຮູ້ວ່າ: “ພະພຸດທະເຈົ້າ” ເປັນຜູ້ທີ່ຕັດ ສະຣູ້ ອະຣິຍະສັດສີ່ຄື: ຮູ້ເລື່ອງຄວາມທຸກສາເຫດແຫ່ງການເກີດທຸກຮູ້ຄວາມພົ້ນທຸກ ແລະຫົນທາງ ຫຼື ແນວທາງປະຕິບັດເພື່ອພົ້ນຈາກຄວາມທຸກພະອົງເປັນຜູ້ບໍລິສຸດຄົນທໍາອິດໃນໂລກ ແລະສອນວິທີປະຕິບັດໃຫ້ຜູ້ອື່ນບໍລິສຸດຕາມ, ພະອົງໄຂຄວາມລັບຂອງໂລກຂອງຈັກກະ ວານໄຂຄວາມບໍ່ຮູ້ເລື່ອງກົດແຫ່ງກໍາ ຫຼື ກົດແຫ່ງການກະທໍາ ແລະຊີ້ຊ່ອງທາງໃຫ້ມະນຸດຮູ້ວ່າ: ສິ່ງໃດຄວນທໍາທີ່ຈະນໍາຕົນໄປສູ່ຄວາມສຸກ ແລະສິ່ງໃດບໍ່ຄວນກະທໍາທີ່ຈະນໍາຕົນໄປສູ່ຄວາມທຸກເວົ້າແບບຫຍໍ້ໆວ່າ “ປູກພືດເຊັ່ນໃດຍ່ອມໄດ້ຮັບຜົນເຊັ່ນນັ້ນຖ້າຄົນຄິດ ຄົດໂກງແລ້ວລົງມືໂກງຍ່ອມໄດ້ ຮັບຜົນຂອງຄວາມທຸດຈະຣິດນັ້ນໂດຍບໍ່ຕ້ອງມີໃຜຮູ້ໃຜເຫັນແຕ່ໃນຈິດໃຈຂອງຜູ້ເຮັດນັ້ນເປັນຜູ້ຮູ້ຜູ້ເຫັນ ແລະມັນກໍຈະປະກົດຜົນດ້ວຍຕົວຂອງມັນເອງໂດຍບໍ່ຕ້ອງມີໃຜລົງໂທດ” ດັ່ງນີ້ເປັນຕົ້ນ.

 ຖ້າຖາມວ່າ “ເປັນຫຍັງຄົນຈຶ່ງກາບໄຫ້ວພະພຸດທະເຈົ້າ” ກໍເພາະເພີ່ນເປັນແບບຢ່າງອັນດີງາມທີ່ບໍ່ມີມະນຸດຄົນໃດປຽບປານ, ເປັນຜູ້ກອບກູ້ໂລກສ້າງສັນຕິສຸກໃຫ້ເກີດ ແກ່ໂລກ ແລະ ເປັນຄູຜູ້ບອກສອນໃຫ້ທຸກຄົນປະຕິບັດເພື່ອຈະໄດ້ຫຼຸດພົ້ນຈາກຄວາມທຸກການວົນວຽນຕາຍເກີດໃນແຕ່ລະພົບຊຶ່ງມີຫຼາຍພົບໃນຫຼາຍມິຕິທີ່ມີຄວາມທຸກ ແລະຄວາມສຸກແຕກຕ່າງກັນໄປເຊັ່ນ: ນະຮົກ, ສັດເດຍລະສານ, ມະນຸດ, ສະຫວັນ, ພຣົມເປັນຕົ້ນ.

  ພະອໍຣະຫັນທັງຫຼາຍເປັນພຽງລູກສິດທີ່ຮູ້ຕາມ ແລະປະຕິບັດຕາມ ແລະໄດ້ຜົນຕາມການອົບຮົມຂອງຜູ້ເປັນຄູ, ພະພຸດທະເຈົ້າມີປັນຍາຍານ ຫຼື ຄວາມຮູ້ບໍ່ມີທີ່ສິ້ນສຸດ ຫຼາຍເຖິງບໍ່ມີຫຍັງໃນໂລກໃນຈັກ ກະວານ, ໃນປະລະມະນູໃດທີ່ເພິ່ນ ບໍ່ຮູ້, ເພີ່ນສາມາດຮູ້ການເກີດຂຶ້ນຂອງຈັກກະວານ ແລະຊາຕາຊີວິດຂອງແຕ່ລະຄົນໃນອະດີດເຖິງອະນາຄົດຢ່າງບໍ່ມີທີ່ສິ້ນສຸດ.

  ສ່ວນພະອໍລະຫັນທີ່ເປັນລູກສິດນັ້ນອາດຈະສາມາດດັບກິເລດ ແລະມີຈິດໃຈບໍລິສຸດຄືກັບພະພຸດທະເຈົ້າແຕ່ບໍ່ມີປັນຍາຍານ ແລະອິດທິປາຕິຫານຄືກັນກັບເພິ່ນເຊັ່ນອາດສາມາດລະລຶກຊາດຂອງຕົນເອງໄດ້ແຕ່ໄດ້ພຽງສິບຊາດ ຫຼືຮ້ອຍຊາດເທົ່ານັ້ນອາດອ່ານໃຈຄົນໄດ້ແຕ່ບໍ່ຮູ້ອະດີດຕະຊາດຂອງຜູ້ອື່ນວ່າເປັນແນວໃດເປັນຕົ້ນ, ນອກຈາກນີ້ຄວາມສາມາດດ້ານອື່ນໆກໍຈໍາກັດເຊັ່ນປະຕິບັດຕົນເອງຈົນສາມາດບັນລຸທຳໄດ້ແຕ່ບໍ່ຮູ້ຈະຖ່າຍທອດຄວາມຮູ້ໃຫ້ຜູ້ອື່ນໄດ້ຢ່າງໃດເປັນຕົ້ນ, ເວົ້າໂດຍຫຍໍ້ກະຄືວ່າ: ພະພຸດ ທະເຈົ້າມີຄວາມຮູ້ປະຕິຫານບໍ່ມີຂີດຈໍາກັດແຕ່ພະອໍລະຫັນມີຄວາມຮູ້ ແລະປະຕິຫານຈໍາກັດອີງຕາມບາລະມີຂອງຕົ້ນວ່າຈະມີຄວາມສາມາດໃນດ້ານໃດ ແລະມີອິດທິປະ ຕິຫານໃນດ້ານໃດອາດຈະມີເປັນຂອງແຕ່ລະຄົນ.

 

แชร์