ຖໍ້າເຫີບ ປະຕູສູ່ເມືອງເກົ່າ

 ຖໍ້າເຫີບເປັນສະຖານທີ່ທ່ອງທ່ຽວອີກແຫ່ງໜຶ່ງທີ່ສວຍງາມ ແລະໜ້າທ່ຽວຊົມຂອງແຂວງຄຳມ່ວນເໝາະສຳລັບຜູ້ທີ່ມັກທ່ຽວແບບປະຈົນໄພ, ຂີ່ເຮືອຊົມຄວາມງົດງາມຂອງຫີນງອກ, ຫີນຍ້ອຍຄວາມເຢັນຂອງສາຍນໍ້າ, ຊຶ່ງເປັນປະກົດການທີ່ທຳມະຊາດສ້າງຂຶ້ນ ແລະ ເປັນທີ່ຕື່ນຕາຕື່ນໃຈຂອງນັກທ່ອງທ່ຽວທັງພາຍໃນ ແລະຕ່າງປະເທດ ທີ່ມາທ່ຽວຖໍ້າມີຄວາມຍາວທີ່ປະມານ 1,500 ແມັດ ແລະມີຄວາມສູງທີ່ປະມານ 100-150 ແມັດ ແລະມີຄວາມກວ້າງປະມານ 20-40 ແມັດ.

   ຕາມການບອກເລົ່າຂອງຊາວ ບ້ານຖໍ້າເຫີບມີປະຫວັດອັນຍາວນານທັງໃນເລື່ອງຂອງສົງຄາມ, ຕຳນານພື້ນສືບ ແລະປະຫວັດສາດອັນເກົ່າແກ່ປະສົມປະສານກັນເຊັ່ນ: ນິທານສັງສິນໄຊ, ການສ້າງເມືອງເຊື່ອງໄພຈອງເຈົ້າໄຊຍະເສດຖາ, ເມືອງຫຼັບແລຂອງຊາວມອນ-ຂະແມ, ເມືອງເຊື່ອງໄພຂອງເຈົ້າອານຸວົງ ແລະ ລວມເຖິງສົງຄາມຍີ່ ປຸ່ນ-ຝຣັ່ງໃນລາວຊຶ່ງມີຊາວລີ້ໄພໄດ້ໜີມາເຂົ້າຖໍ້າແລ້ວຍີ່ປຸ່ນນຳມາແລ້ວຄິດວ່າກະບົດຄົງຈະຢູ່ໃນຖໍ້າ ແລະ ບໍ່ມີທາງອອກເລີຍພາກັນເອົາກ້ອນຫີນມາຕັນທາງອອກຂອງຖໍ້າໄວ້ແລ້ວເກັບເອົາໝາກເຜັດແຫ້ງມາເຜົາອູດໂດຍຫວັງວ່າກະບົດຈະອອກມາຍ່ອມຈຳນົນ ຫຼືຕາຍຢູ່ໃນຖໍ້າແຕ່ວ່າຖໍ້າແຫ່ງນີ້ກັບມີທາງທີ່ສາມາດອອກໄປສູ່ອີກເມືອງໜຶ່ງທີ່ຢູ່ທາງຫຼັງກົງກັນຂ້າມຊື່ວ່າເມືອງເກົ່າອາຣັນຍາ (ບ້ານນາກະຕຶບປະຈຸບັນ) ຫຼັງຈາກທີ່ລໍຖ້າດົນກໍ່ບໍ່ມີແວວວ່າກະບົດຈະອອກມາຈຶ່ງພາກັນແຕກໜີກັບ.

 ຖໍ້າເຫີບ ຕັ້ງຢູ່ບ້ານນາກະຕຶບເມືອງຫີນບູນ ແຂວງຄຳມ່ວນ ທາງເຂົ້າແມ່ນມາຕາມທາງໄປເຂື່ອນໄຟຟ້າຫີນບູນໄລຍະທາງຈາກທາງເລກທີ 13 ເຂົ້າໄປປະມານ 16 ກິ ໂລແມັດ ຜ່ານບ້ານກະແຕັບເຂົ້າໄປເມືອງໄປຮອດທ່ານໍ້າບ້ານກະຕຶບກໍ່ຂີ່ເຮື່ອຂ້າມທ່ານໍ້າໂດຍໃຊ້ບໍລິການຈາກຊາວບ້ານມີຍັງເຫຼື່ອພຽງແຕ່ຫຼັງຄ່າເຮືອນດຽວທີ່ຢູ່ທີ່ນັ້ນເພາະເພິ່ນໄດ້ສັນຍາຈາບັນກັບພະສົງຜູ້ໄປບູລະນະວັດໄວ້ວ່າຈະຢູ່ເພື່ອຮັບໃຊ້ພະສົງ ແລະຊາວບ້ານທີ່ນັ້ນ (ພໍ່ໃຫຍ່ສູນ) ຄ່າບໍລິການ ຂ້າມເຮື່ອແມ່ນ 5.000 ກີບ/ຄົນ.

____________

ຂຽນໂດຍ: ວົງມະນີ, ໜັງສືພິມເສດຖະກິດ-ສັງຄົມ

 

แชร์