ວຕ ເຜີຍແຜ່ມະຕິ ຂອງຄະນະບໍລິຫານງານສູນກາງພັກ

 ວັນທີ 8 ກໍລະກົດ 2020 ກະຊວງວິທະຍາສາດ ແລະເຕັກໂນໂລຊີ (ວຕ) ເຜີຍແຜ່ມະຕິກອງປະຊຸມຄົບຄະນະຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X ໃຫ້ກຽດປາຖະກະຖາໂດຍສະຫາຍ ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງວິທະຍາສາດ ແລະເຕັກໂນໂລຊີ, ມີຮອງລັດຖະມົນຕີ, ສະມາຊິກພັກ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ສະຫາຍ ບໍ່ວຽງຄຳ ວົງດາລາ ໄດ້ຍົກໃຫ້ເຫັນກ່ຽວກັບການຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7, 8, 9 ສະໄໝທີ X ຕິດພັນກັບຄວາມຄືບໜ້າການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ເງິນຕາປະຈໍາໄຕມາດ 1 ປີ 2020 ແລະທິດທາງໃນຕໍ່ໜ້າ; ການກະ ກຽມເນື້ອໃນກອງປະຊຸມໃຫຍ່ຄັ້ງທີ XI ຂອງພັກແລະທິດປັບປຸງກົງຈັກລັດຖະບານ. ພ້ອມທັງ, ຍັງຍົກໃຫ້ເຫັນເຖິງສະພາບຄວາມຫຍຸ້ງຍາກທາງດ້ານເສດຖະກິດ-ສັງ ຄົມຂອງປະເທດທີ່ຜ່ານມາ ແລະຜົນສະທ້ອນໃນສະເພາະໜ້າ ແລະຍາວນານ, ການປັບປຸງປະສິດທິພາບການດຳເນີນທຸລະກິດຂອງລັດວິສາຫະກິດຈຳນວນໜຶ່ງເພື່ອກະ ຕຸ້ນ ແລະຍູ້ແຮງການເຕີບໂຕຂອງເສດຖະກິດເປັນຕົ້ນປັບປຸງສະພາບແວດລ້ອມການລົງທຶນ,ການແກ້ໄຂໜີ້ສິນ,ແກ້ໄຂການຮົ່ວໄຫຼຂອງງົບປະມານ, ການຈຳກັດລາຍຈ່າຍບໍລິຫານ ແລະບັນຫາອື່ນໆ

  ທັງນີ້ເພື່ອເຮັດໃຫ້ຄະນະພັກ-ຄະນະນຳ, ສະມາຊິກພັກກໍຄືພະນັກງານ-ລັດຖະກອນພາຍໃນກະຊວງໄດ້ຮັບຮູ້ເຂົ້າໃຈ, ກຳແໜ້ນ, ເຊື່ອມຊຶມ ແລະເປັນເອກະພາບສູງຕໍ່ບັນດາເນື້ອໃນທີ່ສຳຄັນຂອງມະຕິກອງປະຊຸມຄົບຄະນະຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X ເພື່ອຫັນເອົາມະຕິດັ່ງກ່າວເປັນທິດທາງ ແລະ ເປັນແຜນປະຕິບັດງານລະອຽດຮອບດ້ານເຂົ້າໃນຂະແໜງການຕົນໃຫ້ຟົດຟື້ນ, ແຂງແຮງ, ຕໍ່ເນື່ອງ ແລະເຂົ້າສູ່ລວງເລິກ.

________________

ຂຽນໂດຍ: ຟ້າ , ໜັງສືພິມເສດຖະກິດ-ສັງຄົມ

แชร์