ໂຄງການເກັບກູ້ລະເບີດ ຍົກລະດັບພະນັກງານບັນຈຸໃສ່ຕໍາແໜ່ງ 3 ຂັ້ນ

  ໂຄງການເກັບກູ້ລະເບີດແຫ່ງ ສປປ ລາວ ປະຈໍາແຂວງສະຫວັນນະເຂດຈັດຝຶກອົບຮົມ ແລະສອບເສັງຄັດເລືອກຍົກລະດັບເອົາພະນັກງານເກັບກູບັນຈຸໃສ່ຕໍາແໜ່ງງານ 3 ຂັ້ນໃນ 5 ເມືອງມີ: ເມືອງພະລານໄຊ, ເມືອງພີນ, ເມືອງວິລະບູລີ, ເມືອງເຊໂປນ ແລະເມືອງນອງໃຫ້ມີຄວາມກ້າວໜ້າທາງດ້ານເຕັກນິກ.

  ວັນທີ 5 ກໍລະກົດ ທີ່ຫ້ອງການເກັບກູລະເບີດ UXO lao ເມືອງເຊໂປນ ແຂວງສະຫວັນນະເຂດ ໄດ້ເປີດການສອບເສັງຄັດເລືອກຍົກລະດັບເອົາພະນັກງານເກັບກູ້ ບັນຈຸໃສ່ຕຳແໜ່ງງານ 3 ຂັ້ນ ໂດຍການເປັນປະທານຂອງ ທ່ານ ພຸດທາ ພິມວົງສາ ຫົວໜ້າຫ້ອງການເກັບກູ້ລະເບີດ ແຂວງສະຫວັນນະເຂດ, ເຂົ້າຮ່ວມມີບັນດາທ່ານພູເຂົາ ແກ້ວມີໄຊ ຫົວໜ້າຄະນະກໍາມະການຄຸ້ມຄອງເກັບກູ້ລະເບີດແຂວງສະຫວັນນະເຂດ (NRA), ທ່ານ ລັອບບີ້ ດີຮອນ ຜູ້ຊ່ຽວຊານຈາກບໍລິສັດທີ່ປຶກສາເກັບກູ້ລະ ເບີດເຕຕຣາເທັກ Tetra Tech ສະຫະລັດອາເມລິກາ, ທ່ານ ສາລີ ແສງສຸລິຍາ ຮອງຫົວໜ້າຫ້ອງການ ຄກລ ສຂ, ທ່ານ ແສງດາວີໄຊຍະຈັກ ຈາກພະແນກແຮງ ງານ ແລະສະຫວັດຕິການສັງຄົມ ແລະນັກສໍາມະນາກອນເຂົ້າຮ່ວມ.

  ທ່ານ ພຸດທາ ພິມວົງສາ ໄດ້ກ່າວວ່າ: ໃນວັນທີ 25 ມິຖຸນາ ຜ່ານມາແມ່ນໄດ້ຝຶກອົບຮົມເພື່ອເປັນການທົບທວນບົດຮຽນໃນການປະຕິບັດວຽກງານຄືນ ແລະຍົກລະດັບພະນັກງານໃຫ້ມີຄວາມກ້າວໜ້າທາງດ້ານເຕັກນິກວິຊາສະເພາະຄວາມຮູ້ຄວາມສາມາດແລ້ວບັນຈຸເຂົ້າຕໍາແໜ່ງສາຍງານທັງໝົດມີ 88 ທ່ານ ສໍາລັບບົດຮຽນທີ່ນໍາເຂົ້າ ມາໃນການທົດສອບລວມມີ 5 ວິຊາຄື: ພິສູດລະເບີດບໍ່ທັນແຕກ,ວິຊາຄະນິດສາດ, ມາດຕະຖານການປະຕິບັດງານ SOP1, ມາດຕະຖານການປະຕິບັດງານ SOP2, ວິຊາປະກອບບົດລາຍງານຜົນສໍາເລັດວຽກງານເກັບກູ້,

ສະນັ້ນມາຮອດວັນທີ 5 ກໍລະກົດ ໄດ້ສຳເລັດພິທີຝຶກອົບຮົມພ້ອມທັງແຕ່ງຕັ້ງພະນັກງານບັນຈຸໃສ່ຕຳແໜ່ງ 3 ຂັ້ນດັ່ງນີ້: ໄດ້ແຕ່ງຕັ້ງຂຶ້ນເປັນຮອງຫົວໜ້າທີມມີຈໍານວນ 31 ຄົນ, ຄັດເລືອກບັນຈຸເຂົ້າມີ 6 ຕໍາແໜ່ງ, ຂຶ້ນເປັນຫົວໜ້າທີມ38 ຄົນ ຄັດເລືອກບັນຈຸເຂົ້າມີ 6 ຕໍາແໜ່ງ, ຂຶ້ນເປັນຜູ້ຊ່ວຍຊ່ຽວຊານ 19 ຄົນ ຄັດເລືອກບັນຈຸເຂົ້າມີ 3 ຕໍາແໜ່ງສໍາລັບການຈັດຕັ້ງປະຕິບັດໄດ້ແບງອອກເປັນ 5 ຂັ້ນຕອນ, ແຕ່ງຕັ້ງຄະນະກໍາມະການ, ຮັບພະນັກງານເຂົ້າຮ່ວມ, ຈັດຝຶກອົບຮົມ,ດໍາເນີນການສອບເສັງປ້ອງກັນການຮົ່ວໄຫຼບົດສອບໃສ່ລະຫັດແທນລາຍຊື່ນັກສອບເສັງ, ອະນຸກໍາມະການໃຫ້ຄະແນນ ແລະສະຫຼຸບລາຍງານຜົນສໍາເລັດໃຫ້ ຄກລ ແຫ່ງ ສປປ ລາວ, ຄະນະກໍາມະການຄຸ້ມຄອງເກັບກູ້ລະເບີດແຂວງສະຫວັນນະເຂດ (NRA), ພະແນກແຮງງານ ແລະສະຫວັດຕິການສັງຄົມ ແຂວງສະຫວັນນະເຂດຮັບຮູ້.

_____________

ຂຽນໂດຍ: ແພງຕາ, ໜັງສືພິມເສດຖະກິດ-ສັງຄົມ

 

แชร์