ເຊກອງ ກວດຢືດໄມ້ລັກລອບຂຸດຄົ້ນ ແລະເຄື່ອນຍ້າຍ 4 ພັນກວ່າແມັດກ້ອນ

 ເຊກອງ ແມ່ນອີກແຂວງໜຶ່ງທີ່ເອົາໃຈໃສ່ຈັດຕັ້ງປະຕິບັດຄໍາສັ່ງເລກທີ 15/ນຍ ໂດຍໃນ 4 ປີຜ່ານມາສາມາດກວດພົບການລັກລອບຂຸດຄົ້ນ ແລະເຄື່ອນຍ້າຍໄມ້ທັງໝົດ 4.011 ແມັດກ້ອນ, ຢຶດຈັກຕັດໄມ້ (ຈັກສະຕິນ) 100 ເຄື່ອງ.

  ວັນທີ 8 ກໍລະກົດ 2020 ພະແນກກະສິກຳ ແລະປ່າໄມ້ແຂວງໄດ້ຈັດກອງປະຊຸມຊຸກຍູ້ສ້າງຕັ້ງຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ ແລະສັດປ່າຂັ້ນແຂວງໂດຍມີ ທ່ານ ນາງ ຫຼອມຄຳ ແສງຈັນອຸດົມ ຮອງຫົວໜ້າກົມກວດກາປ່າໄມ້, ທ່ານ ສົມຫວັງ ຂຳມະວົງ ຫົວໜ້າພະແນກກະສິກຳ ແລະ ປ່າໄມ້ແຂວງ, ຫົວໜ້າ-ຮອງຫົວໜ້າກວດກາປ່າໄມ້ຂັ້ນແຂວງ-ເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ສີສຸພັນ ສຸວັນນະຫົງ ຫົວໜ້າກອງກວດກາປ່າໄມ້ແຂວງເຊກອງລາຍງານຕໍ່ກອງປະຊຸມໃຫ້ຮູ້ວ່າ: ໂດຍນັບແຕ່ປີ 2016-2019 ກອງກວດກາປ່າໄມ້ແຂວງໄດ້ລົງເຄື່ອນໄຫວເຜີຍແຜ່ມະຕິຂອງພັກ, ບັນດານິຕິກໍາ,ຄໍາແນະນໍາ ແລະກົດໝາຍຕ່າງໆ ໂດຍສະເພາະແມ່ນຄໍາສັ່ງເລກທີ 15/ນຍ, ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍສັດນໍ້າ ແລະສັດປ່າຢູ່ຕາມບ້ານເປົ່າໝາຍໃນ 4 ຕົວເມືອງໄດ້ທັງໝົດ34 ຄັ້ງ, ມີຜູ້ເຂົ້າຮ່ວມທັງໝົດ 2.203 ຄົນ,ຍິງ 942 ຄົນ.

  ສໍາລັບການຕິດຕາມກວດກາການປະຕິບັດຄໍາສັ່ງເລກທີ 15/ນຍ, ທາງກອງກວດກາປ່າໄມ້ແຂວງໄດ້ເອົາໃຈໃສ່ລາດຕະເວນເຂດຫຼໍ່ແຫຼມຈຸດມີຄວາມສ່ຽງ ແລະ ປະຈຳຈຸດກວດກາຕ່າງໆຈຳນວນ 73 ຄັ້ງ, ກັກຢຶດໄມ້ທ່ອນ, ໄມ້ແປຮູບທີ່ຜະລິດ ແລະ ເຄື່ອນຍ້າຍຜິດກົດໝາຍຈຳນວນ 4.011 ແມັດກ້ອນ; ຢຶດຈັກຕັດໄມ້ (ຈັກສະຕິນ) 100 ເຄື່ອງ; ຢຶດໝໍ້ຊ໋ອດໄດ້ 45 ເຄື່ອງ; ເກັບກູ້ແຮ້ວ ແລະທຳລາຍແຮ້ວ 844 ຫຼັງ.

  ພ້ອມດຽວກັນນີ້ຍັງໄດ້ປະສານສົມທົບກັບພາກສ່ວນກ່ຽວຂ້ອງລົງກວດກາການຊື້-ຂາຍສັດນໍ້າ-ສັດປ່າ, ເຄື່ອງປ່າຂອງດົງທີ່ຫວງຫ້າມຢູ່ຕະຫຼາດເທສະບານແຂວງ ແລະເມືອງດາກຈຶງຈໍານວນ 25 ຄັ້ງ, ສາມາດກັກຢຶດສັດນໍ້າ-ສັດປ່າໄດ້ທັງໝົດ  91,7 ກິໂລແມັດ, ເຄື່ອງປ່າຂອງດົງຊະນິດຢ່າງແປກຈຳນວນ 50 ໂຕນ, ຊຶ່ງໄດ້ດໍາເນີນຄະດີທັງໝົດ 36 ຄະດີ, ໃນນັ້ນມີຄະດີກ່ຽວກັບໄມ້ 33 ຄະດີ, ຄະດີເຄື່ອງປ່າຂອງດົງ 3 ຄະດີ ແລະປັບໃໝຕໍ່ການກະທຳຜິດເປັນຈຳນວນເງິນ 580 ລ້ານກວ່າກີບ.

_____________

ຂຽນໂດຍ: ສັນຍາ, ໜັງສືພິມເສດຖະກິດ-ສັງຄົມ

แชร์