ຕາດຫ້ວຍແກ້ວ ສະຖານທີ່ທ່ອງທ່ຽວ ທໍາມະຊາດເມືອງລອງ

  ຕາດຫ້ວຍແກ້ວກໍ່ແມ່ນອີກສະຖານທີ່ທ່ອງທ່ຽວທາງທໍາມະ ຊາດຂອງເມືອງລອງ ແລະ ເປັນແຫຼ່ງ ທ່ອງທ່ຽວທີ່ສາມາດດຶງດູດນັກທ່ອງທ່ຽວຈາກຕ່າງປະເທດ ແລະ ພາຍໃນປະເທດໃຫ້ເຂົ້າມາທ່ຽວຊົມເປັນຈໍານວນຫຼວງຫຼາຍໃນແຕ່ລະປີ ແລະ ເປັນນໍ້າຕົກຕາດແຫ່ງໜຶ່ງທີ່ມີຄວາມສວຍງາມທີ່ສຸດຂອງເມືອງລອງ, ຕັ້ງຢູ່ທາງທິດໃຕ້ຂອງບ້ານປ່າຄາ ໄລຍະທາງຫ່າງຈາກເທສະບານ ແຂວງຫຼວງນໍ້າທາ 112 ກິໂລແມັດ ແລະຫ່າງຈາກເທສະບານເມືອງ 6 ກິໂລແມັດ ປະຈຸບັນມີເສັ້ນທາງລົດ ເຂົ້າເຖິງ 4 ກິໂລແມັດ ແລະເສັ້ນ ທາງຍ່າງ 2 ກິໂລແມັດ, ຕາດຫ້ວຍ ແກ້ວປະກອບມີ 4 ຊັ້ນຄຶ: ຊັ້ນທີ 1 ສູງປະມານ 10 ແມັດ, ຊັ້ນທີ 2 ມີ ຊັ້ນຄືຊັ້ນທຳອິດສູງ  2,5  ແມັດ, ຊັ້ນ ທີ 2 ສູງ 7 ແມັດ, ຊັ້ນທີ 3 ສູງ 15 ແມັດ ແລະຊັ້ງທີ 4 ສູງ 11 ແມັດ.

  ຕາມການບອກເລົ່າຂອງຊາວ ບ້ານໃຫ້ຮູ້ວ່າ: ແຕ່ກ່ອນມີພະຍາຄົນໜຶ່ງສ້າງພະທາດຢູ່ໄກ້ຄຽງບໍລິເວນດັ່ງກ່າວ ໂດຍບັນຈຸແກ້ວໃສ່ໃນທາດ ແລະ ເອີ້ນກັນວ່າຕາດນ້ຳພະແກ້ວ, ແຕ່ປະຈຸບັນໄດ້ປ່ຽນຊື່ຈາກຕາດນ້ຳພະແກ້ວມາເປັນຕາດນໍ້າຫ້ວຍແກ້ວ ຈົນເຖິງທຸກວັນນີ້, ຕາດນໍ້າຫ້ວຍແກ້ວຍັງມີຄວາມອຸດົມສົມບຸນໄປດ້ວຍຊັບພະຍາກອນທຳມະຊາດມີສັດປ່ານາໆ ຊະນິດຍ້ອນວ່ານ້ຳຕົກຕາດນໍ້າຫ້ວຍແກ້ວຢູ່ຫ່າງໄກ;  ສິ່ງອຳນວຍຄວາມສະດວກຕ່າງໆ ບໍ່ທັນໄດ້ຮັບການກໍ່ສ້າງ, ເຮັດໃຫ້ນັກທ່ອງທ່ຽວບໍ່ຄ່ອຍເຂົ້າໄປທ່ອງທ່ຽວຫຼາຍໃນໄລຍະ ຜ່ານມານັກທ່ອງທ່ຽວຈຳນວນໜຶ່ງ ໂດຍສະເພາະແມ່ນນັກທ່ອງທ່ຽວ ຈາກຝຣັ່ງໄດ້ຊື້ລາຍການທົວຈາກໜ່ວຍງານນຳທ່ຽວເພື່ອໄປທ່ຽວ ບ້ານຊົນເຜົ່າ ແລະ ອອກມາໃສ່ນ້ຳ ຕົກຕາດນໍ້າຫ້ວຍແກ້ວ..

  ແຕ່ເຖິງຢ່າງໃດກໍຕາມສຳລັບ ທ່ານໃດທີ່ສົນໃຈກໍສາມາດໄປທ່ຽວ ໄປຊົມກັນໄດ້ ຫຼື ບັນດານັກທ່ອງທ່ຽວທັງພາຍໃນ ແລະ ຕ່າງປະເທດທ່ານໃດທີ່ໄດ້ມີໂອກາດເດີນທາງໄປ ແຂວງພາກເໜືອ ໂດຍສະເພາະ ແຂວງຫຼວງນໍ້າທາກໍຄືເມືອງລອງ ກໍຢ່າພາດໄປທ່ຽວໄປຊົມກໍແລ້ວກັນ ແລະ ເຊື່ອແນ່ວ່າຈະສາມາດຜ່ອນຄາຍຄວາມຕຶງຄຽດຂອງທ່ານໄດ້ບໍ່ຫຼາຍກໍໜ້ອຍແນ່ນອນ.

แชร์