ຈຳປາສັກຊັບຊ້ອນພະນັກງານການນຳຫຼາຍຕຳແໜ່ງ

  ອໍານາດການປົກຄອງແຂວງຈໍາປາສັກໄດ້ມີການຊັບຊ້ອນ ແລະແຕ່ງຕັ້ງພະນັກງານຂັ້ນການນໍາແຂວງຫຼາຍຕໍາແໜງເພື່ອຈັ້ດຕັ້ງປະຕິບັດສອດຄ່ອງກັບແຜນພັດທະນາເສດຖະກິດ-ສັງຄົມຂອງແຂວງໃຫ້ໄປໃນທິດທາງທີ່ກໍານົດໄວ້ ແລະເພື່ອສືບຕໍ່ພັດທະນາສ້າງສາວຽກງານທີ່ຍັງຄົງຄ້າງໃຫ້ລົງຕົວກວ່າເກົ່າ.

 ໃນວັນທີ  9 ກໍລະກົດຜ່ານມານີ້ໄດ້ມີພີທີປະກາດການຍົກຍ້າຍ ແລະພະນັກງານການນໍາຂັ້ນແຂວງຈໍາປາສັກຂຶ້ນທີ່ຫ້ອງວ່າການປົກຄອງແຂວງ, ໂດຍໃຫ້ກຽດເຂົ້າຮ່ວມຂອງທ່ານ ເມກສະຫວັນ ພົມພິທັກ ປະທານສະພາປະຊາຊົນແຂວງຈໍາປາສັກ, ມີບັນດາທ່ານແຂກຜູ້ໃຫຍ່ພາຍໃນແຂວງເຂົ້າຮ່ວມ.

  ການຍົກຍ້າຍ ແລະແຕ່ງຕັ້ງພະນັກງານການນໍາແຂວງຈໍາປາສັກໃນຄັ້ງນີ້ປະກອບມີຄື: ຍົກຍ້າຍ ແລະແຕ່ງຕັ້ງທ່ານ ສະນັ່ນ ສີພາພົມມະຈັນ ຫົວໜ້າຫ້ອງວ່າການປົກຄອງແຂວງເປັນຫົວໜ້າຄະນະຈັດຕັ້ງແຂວງ, ຍົກຍ້າຍ ແລະແຕ່ງຕັ້ງ ທ່ານ ສົມສີ ມະນີນິນ ຫົວໜ້າຄະນະຈັດຕັ້ງແຂວງຫົວໜ້າຄະນະໂຄສະນາອົບຮົມແຂວງ, ຍົກຍ້າຍ ແລະ ແຕ່ງຕັ້ງ ທ່ານ ຄໍາຕັນ ຊົມພັນດອນຫົວໜ້າໂຄສະນາອົບຮົມແຂວງເປັນຮອງປະທານກວດກາພັກແຂວງ, ຍົກຍ້ານ ແລະແຕ່ງຕັ້ງທ່ານ ປອ. ວັນນະໄຊ ຊາດຕະກຸນຫົວໜ້າພະແນກສາທາລະນະສຸກເປັນຫົວໜ້າຫ້ອງວ່າການປົກຄອງແຂວງ, ແຕ່ງຕັ້ງທ່ານ ດຣ. ວຽງສີ ສຸພັກດີ ຮອງຫົວໜ້າພະແນກເປັນຫົວໜ້າພະແນກສາ ທາລະນະສຸກ, ຍົກຍ້າຍ ແລະ ແຕ່ງຕັ້ງ ທ່ານ ກອງແກ້ວ ປັນຍາພອນ ຫົວໜ້າພະແນກໄປສະນີໂທລະຄົມມະນາຄົມ ແລະ ການສື່ສານເປັນຮອງຫົວໜ້າຄະນະຮັບຜິດ ຊອບ ອານຸສາວະລີແຂວງ ແລະແຕ່ງຕັ້ງທ່ານ ວິໄລ ແກ້ວມະນີໄລ ຮອງຫົວໜ້າພະແນກ ປທສ ແຂວງ ເປັນຫົວໜ້າພະແນກ ປທສ ແຂວງ.

  ໃນພິທີທ່ານ ເມກສະຫວັນ ພົມພິທັກ ກ່າວວ່າ: ຈຸດປະສົງໃນການຍົກຍ້າຍ ແລະແຕ່ງຕັ້ງພະນັກງານການນໍາແຂງຈໍາປາສັກໃນຊຸດນີ້ກໍ່ແມ່ນເພື່ອສຶບຕໍ່ນໍາພາ-ຊີ້ນໍາຈັດ ຕັ້ງປະຕິບັດວຽກງານທີ່ຍັງຄົງຄ້າງ, ໂດຍສະເພາະແມ່ນແຜນພັດທະນາເສດຖະກິດສັງຄົມ 5 ປີຄັ້ງທີ 8 ຂອງແຂວງໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້ ແລະບັນດາໜ້າວຽກຕ່າງໆທີ່ເປັນຍຸດທະສາດໃນການພັດທະນາແຂວງໃຫ້ມີຄວາມສີວິໄລກ້າວໜ້າ.

____________

ຂຽນໂດຍ: ໂພທິຣາຊ, ພາບ ແລະຂ່າວ: ໜັງສືພິມເສດຖະກິດ-ສັງຄົມ

• 13/07/2020