ມອບ-ຮັບໂຄງການສ້າງຮ່ອງລະບາຍນໍ້າ

ວັນທີ 2 ກໍລະກົດ ຜ່ານມາຢູ່ທີ່ປ້ອມກວດກາກີ່ວລົມ ປກສ ແຂວງໄດ້ຈັດພິທີມອບ-ຮັບໂຄງການກໍ່ສ້າງຮ່ອງລະບາຍນໍ້າອ້ອມອາຄານ, ຕັດແລວນໍ້າ, ເຈາະບໍ່ບາດານ ແລະຕິດຕັ້ງອຸປະກອນປໍ້ານໍ້າຢູ່ປ້ອມກວດກາກີ່ວລົມ ປກສ ແຂວງຫຼວງນໍ້າທາ, ໂດຍການເຂົ້າຮ່ວມຂອງ ທ່ານ ພັທ ເຊັງມອງປະດິດ ຮອງຫົວໜ້າກອງບັນຊາການ ປກສ ແຂວງ, ທ່ານ ຄຳໄຊ ແກ້ວວິໄລ ອຳນວຍການບໍລິສັດແກ້ວວິໄລກໍ່ສ້າງເຄຫາ-ຊົນລະປະທານຈຳກັດ, ມີບັນດາຕາງໜ້າຄະນະຫ້ອງ, ກອງ, ຄະນະຮັບຜິດຊອບໂຄງການກໍ່ສ້າງເຂົ້າຮ່ວມ.

  ສະຫາຍ ພັຕ ເກດສະນາ ພິມມະຈັນ ຮອງຫົວໜ້າພະແນກກໍ່ສ້າງ ແລະຊັບສິນ ປກສ ແຂວງໄດ້ກ່າວວ່າ: ໂຄງການກໍ່ສ້າງລະບາຍນໍ້າອ້ອມຂ້າງອາຄານ, ຕັດແລວຫ້ວຍນໍ້າ, ເຈາະນໍ້າບາດານ ແລະຕິດຕັ້ງອຸປະກອນປໍ້ານໍ້າຢູ່ປ້ອມກວດກາກີ່ວລົມປກສແຂວງ, ວຽກຕັດແລວຫ້ວຍນໍ້າກວ້າງ 4 ແມັດ, ຍາວ 100 ແມັດ,  ເລິກ 1,5  ແມັດ, ວຽກງານກໍ່ສ້າງຮ່ອງລະບາຍນໍ້າອ້ອມອາຄານກວ້າງ 0,8 ແມັດ, ຍາວ 86 ແມັດ, ເລິກ 0,8 ແມັດ, ວຽກເຈາະນໍ້າບາດານ ແລະ ຕິດຕັ້ງປໍ້ານໍ້າ, ໂຄງການກໍ່ສ້າງດັ່ງກ່າວ, ໄດ້ເລີ່ມລົງມືກໍ່ສ້າງມາແຕ່ວັນທີ 8 ມີຖຸນາ 2020,ໂດຍແມ່ນບໍລິສັດແກ້ວວິໄລກໍ່ສ້າງເຄຫາ-ຊົນລະປະທານຈຳກັດເປັນຜູ້ຮັບເໝົາກໍ່ສ້າງ, ລວມມູນຄ່າກໍ່ສ້າງ 90 ລ້ານກີບ, ຊຶ່ງແມ່ນງົບປະມານຂອງລັດ 100 %, ມາຮອດວັນທີ 2 ກໍລະກົດ 2020 ສຳເລັດ 100 %.

  ໂອກາດນີ້ ທ່ານ ພັທ ເຊັງ ມອງປະດິດ ກໍໄດ້ສະແດງຄໍາຍ້ອງຍໍຊົມເຊີຍຕໍ່ບັນດາຄະນະຮັບຜິດຊອບ ແລະຜູ້ຮັບເໝົາໂຄງການກໍ່ສ້າງທີ່ໄດ້ເອົາໃຈໃສ່ປະຕິບັດໂຄງການຈົນສຳເລັດ ແລະທັນກັບເວລາທີ່ໄດ້ກຳນົດໄວ້, ພ້ອມທັງຮຽກຮ້ອງໃຫ້ຄະນະຮັບຜິດຊອບກໍຄືອ້າຍນ້ອງທີ່ປະຈຳການຢູ່ປ້ອມກວດກາຈົ່ງພ້ອມກັນປົກປັກຮັກສາ ແລະ ນຳໃຊ້ໃຫ້ ເກີດປະໂຫຍດແກ່ສ່ວນລວມ.

____________

ຂ່າວ: ສົມພອນ, ໜັງສືພິມເສດຖະກິດ-ສັງຄົມ

แชร์