ເຊັນສັນຍາໂຄງການສ້າງທາງເທສະບານເມືອງສີງ

  ວັນທີ 8 ກໍລະກົດ 2020 ທີ່ຫ້ອງປະຊຸມຫ້ອງການໂຍທາທິການ ແລະຂົນສົ່ງເມືອງສິງ ແຂວງຫຼວງນໍ້າທາໄດ້ຈັດພິທີເຊັນສັນຍາໂຄງການກໍ່ສ້າງເສັ້ນທາງເທສະບານເມືອງ, ເຂົ້າຮ່ວມມີທ່ານ ຄໍາຜາຍ ສຸລີຂັນ ປະທານກວດກາພັກ-ລັດເມືອງ,

 ທ່ານ ສົມລິດ ພອນປະເສີດ ຮອງເຈົ້າເມືອງໆສິງຜູ້ຊີ້ນໍາຂົງເຂດເສດຖະກິດ,ທ່ານ ສິນທະລາ ຊົມພູວິເສດ ຄະນະປະຈຳພັກເມືອງຫົວໜ້າຫ້ອງການໂຍທາທິການ ແລະຂົນສົ່ງເມືອງສິງ, ທ່ານ ບຸນມີ ວິຫວັນແອ້ມ ຮອງອຳນວຍການບໍລິສັດແອວເອສກໍ່ສ້າງຂົວທາງ ແລະຊົນລະປະທານ, ມີກຳມະການພັກເມືອງ, ຫົວໜ້າຫ້ອງການ-ຮອງຫົວໜ້າຫ້ອງການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ຂັນທອງ ໄຊສົມພູ ຮອງຫົວໜ້າຫ້ອງການໂຍທາທິການ ແລະຂົນສົ່ງເມືອງສິງໄດ້ຜ່ານໂຄງການກໍ່ສ້າງເສັ້ນທາງປູຢາງ 2 ຊັ້ນ ຊຶ່ງໂຄງການຈະໄດ້ປູດ້ວຍເປຕົງ ແລະທາງປູຢາງ 2 ຊັ້ນເສັ້ນທາງເລກທີ 1796 ແຕ່ສາມແຍກໂຮງຂ້າສັດບ້ານຊຽງຍືນ-ສີ່ແຍກທະນາຄານການຄ້າຕ່າງປະເທດມີໜ້າທາງກວ້າງ 7 ແມັດ,ຍາວ 2,25 ກິໂລແມັດ ມູນຄ່າການກໍ່ສ້າງ 4 ຕື້ກີບ ແລະໂຄງການກໍ່ເສັ້ນທາງປູເປຕົງເສີມເຫຼັກທາງເລກທີ 1798 ແຕ່ສີ່ແຍກຮ້ານອັດເອກະສານວິໄລພອນ-ສີ່ແຍກຫ້ອງວ່າການ ເມືອງມີໜ້າທາງກວ້າງ 9 ແມັດ, ຍາວ 195 ແມັດ ມູນຄ່າ 700 ລ້ານກີບ 2 ໂຄງການແມ່ນນໍາໃຊ້ເງິນເກີນແຜນແຂວງຫຼວງນໍ້າທາປີ 2019 ທັງ 2 ໂດຍໄດ້ເລີ່ມລົງມືກໍ່ສ້າງນັບແຕ່ມື້ລົງລາຍເຊັນເປັນຕົ້ນໄປຫາ 25 ທັນວາ 2020 ໃຫ້ສໍາເລັດ.

  ໂອກາດນີ້ ທ່ານ ຂັນທອງ ໄຊສົມພູ ຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງສິງ ແລະ ທ່ານ ບຸນມີ ວິຫວັນແອ້ມຮອງອຳນວຍການບໍລິສັດແອວເອສກໍ່ ສ້າງຂົວທາງ ແລະຊົນລະປະທານໄດ້ເຊັນສັນຍາການກໍ່ສ້າງຮ່ວມກັນໂດຍຊ້ອງໜ້າຜູ້ເຂົ້າຮ່ວມເພື່ອເປັນສັກຂີພິຍານ.

______________

ຂຽນໂດຍ: ສົມພອນ, ໜັງສືພິມເສດຖະກິດ-ສັງຄົມ

แชร์