ແນວໂຮມຕົວແບບໃນການຜະລິດເປັນສິນຄ້າຂອງເມືອງທ່າແຕງ

  ປະຈຸບັນປະຊາຊົນໄດ້ຫັນສູ່ການປູກ-ການລ້ຽງເພື່ອເປັນສິນຄ້າສ້າງລາຍຮັບເຂົ້າສູ່ຄອບຄົວ, ຊຶ່ງໃນນັ້ນກາເຟກໍເປັນອີກໜຶ່ງແຜນງານໃນການຜະລິດກະສິກໍາເປັນສິນຄ້າຂອງກະຊວງກະສິກໍາ ແລະປ່າໄມ້ວາງອອກ, ຊຶ່ງເປັນພືດເສດຖະກິດທີ່ພັກ ແລະລັດຖະບານລາວໄດ້ມີນະໂຍບາຍສົ່ງເສີມການຜະລິດເພື່ອສົ່ງອອກ, ເວົ້າສະເພາະກໍແມ່ນເມືອງທ່າແຕງ ແຂວງເຊກອງ ຊຶ່ງເປັນເຂດທີ່ເໝາະແກ່ການຜະລິດກະສິກໍາປູກພືດປະເພດຕ່າງໆ, ເພາະສະນັ້ນຄອບຄົວ ທ່ານ ແກ້ວນ້ອຍ ຊົນວິໄລ ບ້ານໂກງຕາຢູນ ເມືອງທ່າແຕງແຂວງເຊກອງ ກໍເປັນອີກຄອບຄົວໜຶ່ງທີ່ມີຄວາມສະດຸ້ງຕື່ນຕົວໄວຫັນອາຊີບຈາກການເຮັດໄຮ່ໃນເມື່ອກ່ອນມາເປັນອາຊີບຄົງທີ່ເຮັດສວນ, ລ້ຽງງົວ ແລະປູກກາເຟ.

  ທ່ານລາຍງານໃນກອງປະຊຸມໃຫຍ່ຄັ້ງທີ 4 ຂອງແນວລາວສ້າງຊາດເມືອງທ່າແຕງທີ່ໄຂຂຶ້ນໃນທ້າຍເດືອນມິຖຸນາ 2020 ນີ້ວ່າ: ປະຈຸບັນຕົນເອງມີໜ້າທີ່ຮັບຜິດຊອບເປັນປະທານແນວໂຮມບ້ານໂກງຕາຢູນ ເມືອງທ່າແຕງ ແຂວງເຊກອງ, ມີອາຍຸ 64 ປີ, ມີຈໍານວນພົນທັງໝົດໃນຄອບຄົວ 9 ຄົນ, ຍິງ 5 ຄົນ, ມີແຮງງານສົມບູນ 5 ຄົນ, ຍິງ 3 ຄົນ, ແຕ່ກ່ອນຄອບຄົວຂອງທ່ານເປັນຄອບຄົວທີ່ທຸກຍາກ, ຂາດເຂີນ, ທາງດ້ານເຄື່ອງນຸ່ງຫົ່ມ, ເຄື່ອງໃຊ້ຂອງສອຍ, ເນື່ອງຈາກວ່າຄອບຄົວໄດ້ເຮັດໄຮ່, ສະ ນັ້ນຈຶ່ງໄດ້ຫັນອາຊີບໃໝ່ດ້ວຍການເຮັດສວນ, ລ້ຽງງົວ, ລ້ຽງໝູ ແລະປູກກາເຟເປັນອາຊີບ, ແຕ່ກໍຍັງຂາດເຂີນທາງດ້ານເຂົ້າກິນຢູ່; ທ່ານຈຶ່ງໄດ້ປຶກສາຄອບຄົວໃນຕົ້ນປີ 1975 ໄດ້ຖາງໄຮ່, ເຮັດສວນປູກາເຟປະມານ 1 ເຮັກຕາ, ສາມາດເກັບກ່ຽວຜົນຜະລິດໄດ້ 1 ໂຕນຕໍ່ປີ, ປີຕໍ່ມາຈິ່ງຂະຫຍາຍຕື່ມອີກປະມານ 1,5 ເຮັກຕາ, ຜົນເກັບ ກ່ຽວປະມານ 1,5 ໂຕນຕໍ່ປີ, ຜົນເກັບກ່ຽວແຕ່ລະປີເຫັນວ່າເພີ່ມຂຶ້ນຈຶ່ງພໍແກ້ໄຂຊີວິດການເປັນຢູ່ໃນຄອບຄົວເທື່ອລະກ້າວ, ສະນັ້ນມາເຖິງປີ 1981 ເປັນໄລຍະທໍາອິດທີ່ຄອບຄົວທ່ານມີການບຸກເບີກເນື້ອທີ່ປູກກາເຟເພີ່ມຕື່ມ, ຊຶ່ງມີທັງໝົດ 4 ເຮັກຕາ ພ້ອມລ້ຽງສັດ, ປູກພືດປະເພດຕ່າງໆເຮັດໃຫ້ຄອບຄົວສາມາດກຸ້ມຢູ່ກຸ້ມກິນ, ຈົນໄດ້ຈໍາໜ່າຍເປັນສິນຄ້າຂາຍອອກທັງພາຍໃນເມືອງ ແລະແຂວງ, ຊຶ່ງສະເລ່ຍຈາກການຂາຍກາເຟ, ສັດລ້ຽງ ແລະພືດຜັກຕ່າງໆປີໜຶ່ງໄດ້ປະມານ 120 ລ້ານກີບຕໍ່ປີ.

  ເພື່ອຜະລິດໃຫ້ມີຄຸນນະພາບພຽງພໍກັບຄວາມຕ້ອງການ ແລະຂາຍເປັນສິນຄ້າ,ໄດ້ນໍາເອົາແນວທາງການພັດທະນາເສດຖະກິດ-ສັງຄົມຂອງພັກ-ລັດທີ່ຖືກຕ້ອງ, ສອດ ຄ່ອງ ແລະແທດເໝາະກັບສະພາບຄວາມເປັນຈິງຂອງທ້ອງຖິ່ນ, ຈຶ່ງໄດ້ຫັນແນວທາງການຜະລິດຈາກທໍາມະຊາດກ້າວເຂົ້າສູ່ການຫັນເປັນອຸດສາຫະກໍາທັນສະໄໝດ້ວຍການປ່ຽນແນວພັນໃໝ່ເຂົ້າມາເສີມພ້ອມທັງໃສ່ຝຸ່ນ, ເສຍຫຍ້າຂ້າຫຸ່ນບໍ່ໃຫ້ຮົກເຮື້ອ, ຈົນມາເຖິງ ປີ 1983 ຈຶ່ງຂະຫຍາຍເນື້ອທີ່ເພີ່ມອີກ 1 ເຮັກຕາ ສາມາດມີລາຍຮັບຈາກການເຮັດສວນປູກກາເຟປີລະ 8 ໂຕນ ສະເລ່ຍເປັນເງິນ 96 ລ້ານກີບຕໍ່ປີ,ປະຈຸບັນມີເນື້ອທີ່ສວນກາເຟທີ່ໃຫ້ໝາກຈໍານວນ 7 ເຮັກຕາ ແລະເນື່ອທີ່ສວນກາເຟຍັງບໍ່ທັນໃຫ້ໝາກ 1 ເຮັກຕາ, ນັບແຕ່ປີ 1981-2019 ຄອບຄົວຂອງທ່ານມີລາຍຮັບຈາກການຜະລິດກາເຟ, ລ້ຽງສັດ ແລະປູກພືກຜັກຕ່າງໆທັງໝົດ  216 ລ້ານກີບ, ປະຈຸບັນຄອບຄົວສາມາດລົບລ້າງຄວາມທຸກຍາກໄດ້ແລ້ວ,ມີເຮືອນຢູ່ຖາວອນ 3 ຫຼັງ,ໃນນັ້ນເຮືອນໄມ້ 1 ຫຼັງ ແອ້ມດ້ວຍແປ້ນ, ມຸງສັງກະສີ ແລະອີກສອງຫຼັງເປັນເຮືອນເຄິ່ງປູນເຄິ່ງໄມ້, ມີລົດ 7 ຄັນ ໃນນັ້ນລົດຕັອກໆ 1 ຄັນ, ລົດຮຸນໄດ 1 ຄັນ, ລົດຈັກ 5 ຄັນ ແລະມີທຶນການສຶກສາໃຫ້ລູກແຕ່ລະປີປະມານ 15 ລ້ານກີບ.

_______________

ຂຽນໂດຍ: ລັດຕະນະພອນ, ໜັງສືພິມເສດຖະກິດ-ສັງຄົມ

แชร์