ເຊກອງ ເກັບຄ່າທາງ ແລະທີ່ດິນພວມໄດ້ 40,39%

   ສ່ວຍສາອາກອນປະຈໍາແຂວງເຊກອງໄດ້ສົມທົບກັບທະນາຄານການຄ້າຕ່າງປະເທດລາວມະຫາຊົນ (ທຄຕລ) ສາຂາເຊກອງເປີດຂະບວນການເສຍຄ່າທໍານຽມທາງ ແລະພາສີທີ່ດິນຜ່ານລະບົບທະນາຄານປະຈໍາປີ 2020 ຢູ່ສ່ວຍສາອາກອນປະຈໍາແຂວງຂຶ້ນໃນວັນທີ 7 ກໍລະກົດ2020 ໂດຍມີທ່ານ ຄໍາຮູ້ ອ່ອນມະນີ ຫົວໜ້າພະແນກການເງິນແຂວງ, ທ່ານ ລໍາທອງ ຍົນມະຫາໄຊ ຫົວໜ້າສ່ວຍສາອາກອນປະຈໍາແຂວງເຊກອງ; ພ້ອມນີ້ກໍມີຜູ້ຕາງໜ້າທະນາຄານການຄ້າຕ່າງປະເທດລາວມະຫາຊົນສາ ຂາເຊກອງ ແລະວິຊາການກ່ຽວຂ້ອງເຂົ້າຮ່ວມ.


  ທ່ານ ລໍາທອງ ຍົນມະຫາໄຊ ກ່າວວ່າ: ວຽກງານການພັດທະນາເສດຖະກິດ-ສັງຄົມແຫ່ງຊາດແມ່ນວຽກໜຶ່ງທີ່ສໍາຄັນ ແລະເປັນພື້ນຖານໃຫ້ແກ່ຄາດໝາຍຂອງການພັດທະນາ,ການປະຕິບັດພັນທະເຂົ້າງົບປະມານແຫ່ງລັດແມ່ນໜ້າທີ່ຂອງທຸກພາກສ່ວນນັບທັງອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ຫົວໜ່ວຍທຸລະກິດ ແລະພົນລະເມືອງລາວທຸກໆຄົນຕ້ອງມີສ່ວນຮ່ວມ. ດັ່ງນັ້ນການເປີດຂະບວນການເສຍຄ່າທໍານຽມທາງ ແລະພາສີທີ່ດິນຜ່ານລະບົບທະນາຄານປະຈໍາປີ 2020 ກໍເພື່ອ ເປັນການປຸກລະດົມກະຕຸກຊຸກຍູ້ ແລະອໍານວຍຄວາມສະດວກໃຫ້ບັນດາອົງການຈັດຕັ້ງລັດ, ພະນັກງານ-ລັດຖະກອນໄດ້ມາເສຍຄ່າທໍານຽມທາງ ແລະພາສີທີ່ດິນປະຈໍາປີ 2020 ໃຫ້ເປັນຂະບວນຟົດຟື້ນ, ອັນສໍາຄັນກໍແມ່ນການສ້າງຂະບວນການໃຫ້ເປັນແບບຢ່າງນໍາໜ້າສະແດງເຖິງສະຕິຕື່ນຕົວ, ຄວາມສະໝັກໃຈທີ່ປະກອບສ່ວນເຂົ້າງົບປະມານໃຫ້ແກ່ລັດກໍຄືການສ້າງສາພັດທະນາປະເທດຊາດ.


 ທ່ານຫົວໜ້າສ່ວຍສາອາກອນປະຈໍາ ແຂວງເຊກອງ ຍັງໄດ້ເຊີນຊວນອົງການຈັດຕັ້ງທຸກພາກສ່ວນ, ພະນັກງານລັດຖະກອນ, ຜູ້ປະກອບການ, ຫົວໜ່ວຍທຸລະກິດຕະ ຫຼອດຮອດປະຊາຊົນບັນດາເຜົ່າໃຫ້ພ້ອມກັນມາປະກອບສ່ວນມອບພັນທະເຂົ້າງົບປະມານແຫ່ງລັດດ້ວຍການແຈ້ງເສຍຄ່າທໍານຽມທາງ ແລະພາສີທີ່ດິນ,ທັງຮຽກຮ້ອງໃຫ້ຜູ້ທີ່ຮັບຜິດຊອວຽກງານນີ້ຈົ່ງພ້ອມກັນເອົາໃຈໃສ່ເຮັດໜ້າທີ່, ຮັບປະກັນໃຫ້ໄດ້ໝາກຜົນ, ປະສິດທິພາບສູງ ແລະບັນລຸຕາມຄາດໝາຍແຜນການທີ່ວາງໄວ້.

   ໂດຍໃນປີ 2020 ແຂວງເຊກອງ ໄດ້ຮັບມອບໝາຍຕົວເລກການເກັບລາຍຮັບຄ່າທໍານຽມທາງ ແລະພາສີທີ່ດິນໃຫ້ ໄດ້ທັງໝົດ 1,64 ຕື້ກີບ ຊຶ່ງຜ່ານການປະຕິບັດຮອດປະຈຸບັນເກັບໄດ້ພຽງ 662 ລ້ານກວ່າກີບເທົ່າກັບ 40,39% ຂອງແຜນ, ໃນນີ້ລາຍຮັບຈາກພາສີທີ່ດິນ 430 ລ້ານກວ່າກີບ ເທົ່າກັບ 42,17% ແລະຄ່າທໍານຽມທາງ 232 ລ້ານກວ່າ ກີບເທົ່າກັບ 37,46% ຂອງແຜນທ່ານ ລໍາທອງ ຍົນມະຫາໄຊ ກ່າວ.

______________

ຂຽນໂດຍ: ສັນຍາ,  ໜັງສືພິມເສດຖະກິດ-ສັງຄົມ

 

แชร์