ອານິສົງການສ້າງພັດທະສີມາ

  ພັດທະສີມາ ຫຼືສີມມາຈາກ ຄຳວ່າ ສີມາ ຊຶ່ງເປັນພາສາບາລີໝາຍເຖິງເຂດແດນ ຫຼືອານາເຂດທີ່ພະສົງກຳນົດໄວ້ເພື່ອໃຊ້ເປັນບ່ອນປະຊຸມ ຫຼືກິດຈະກໍາຕ່າງໆ ຂອງພະ ສົງ, ຊຶ່ງຜູ້ທີ່ມີຈິດສັດທາຮ່ວມສ້າງພັດທະສີມານີ້ໄວ້ໃນພະພຸດທະສາສະໜາຍ່ອມໄດ້ບຸນກຸສົນຫຼາຍທັງໃນຊາດນີ້ ແລະຊາດໜ້າ.

  ພັດທະສີມາ ເປັນສະຖານທີ່ໆພະສົງຈະຕ້ອງໃຊ້ເພື່ອການທຳສັງຄະກັມສຳຄັນຫຼາຍຢ່າງເຊັ່ນ:ການອຸປະສົມບົດແກ່ກຸລະບຸດ,ການສູດ ອັບພານກັມ, ການສູດຍັດຕິທຸຕິຍະກັມວາຈາ, ການສູດຍັດຕິຈະຕຸດຖະກັມວາຈາ, ການສູດພະປາຕິໂມກ, ການກຣານກະຖິນ ແລະການປະວາຣນາກັມເປັນຕົ້ນ, ເນື່ອງຈາກ ພັດທະສີມາທີ່ສ້າງຂຶ້ນທຸກວັນນີ້ ຄະນະສົງສາມາດໃຊ້ໃຫ້ເປັນປະໂຫຍດຫຼາຍຢ່າງເຊັ່ນ: ໃຊ້ເປັນທີ່ ປະຊຸມສົງທີ່ສະແດງທໍາທີ່ສູດມົນ ທຳວັດເຊົ້າຄໍ່າ ແລະໃຊ້ເປັນທີ່ພັກ ຊົ່ວຄາວຂອງພະອາຄັນຕຸກະເປັນຕົ້ນF ຕາມວິໄນແລ້ວ ສີມາ ຫຼື ພັດທະສີມາ ມີຢູ່ 2 ປະເພດໃຫຍ່ໆຄື: ພັດທະສີມາ ແລະອະພັດທະສີມ. ສໍາລັບພັດທະສີມານີ້ແບ່ງອອກເປັນ 4 ປະເພດ ໄດ້ແກ່: 1) ຂັນທະສີມາຄືສີມາຂະໜາດນ້ອຍທີ່ສົງ ກໍານົດຜູກສະເພາະໂຮງອຸໂບສົດທີ່ຢູ່ໃນມະຫາສີມາ ໂດຍມີວັດຖຸປະສົງເປັນເຄື່ອງຂັ້ນແດນ (ສີມັນ ຕຣິກ) ລະຫວ່າງມະຫາສີມາກັບຂັນທະສີມາ ເພື່ອບໍ່ໃຫ້ສີມາທັງ 2 ຄາບກ່ຽວກັນ; 2) ມະຫາສີມາ ຄື ສີມາທີ່ທ່ານກໍານົດຜູກທົ່ວບໍລິເວນວັດ; 3) ສີມາ 2 ຊັ້ນ ໝາຍເຖິງມະຫາສີມາກັບຂັນທະສີມາໃນ ວັດດຽວກັນ; 4) ນະທີປາຣສີມາ ຄືສີມາທີ່ສົມມຸດກວມຝັ່ງນໍ້າທັງ 2 ໂດຍເປີດແມ່ນໍ້າໄວ້ກາງສີມາຊະນິດນີ້ຊົງພະພຸດທານຸຍາດໃຫ້ສົມ ມຸດໄດ້ສະເພາະໃນເຂດທີ່ມີເຮືອໄປ ມາຢູ່ສະເໝີ, ສ່ວນອະພັດທະສີມາແມ່ນເຂດ ຫຼືແດນທີ່ພະສົງບໍ່ໄດ້ກໍານົດເອົາເອງຊຶ່ງທາງຣາຊການເຈົ້າໜ້າທີ່ບ້ານເມືອງກໍານົດໄວ້ໃນສະໄໝກ່ອນພະສົງໃຊ້ເປັນເຂດປະຊຸມສົງເພື່ອທຳສັງຄະກັມຊົ່ວຄາວແຕ່ສົງບໍ່ມີກຳມະສິດເອົາເປັນຂອງສົງຢ່າງຖາວອນເນື່ອງຈາກບໍ່ຮູ້ວ່າທາງຣາຊການຈະຍຶດຄືນເມື່ອໃດສະໄໝນີ້ຈຶ່ງບໍ່ນິຍົມໃຊ້ອະພັດທະສີມາ.

  ດັ່ງນັ້ນຜູ້ທີ່ມີຈິດສັດທາຮ່ວມສ້າງພັດທະສີມາໄວ້ໃນພະພຸດທະສາສະໜາເພື່ອຖວາຍເປັນພຸດບູຊາ ຄືການບູຊາຄຸນຂອງພະພຸດເຈົ້າ ແລະເປັນການສືບຕໍ່ອາຍຸພະພຸດທະສາສະໜາໃຫ້ພະສົງໄດ້ທໍາສັງຄະກັມນັ້ນ ຈຶ່ງນັບວ່າໄດ້ບຸນກຸສົນຫຼາຍທັງໃນຊາດນີ້ ແລະຊາດໜ້າ;ສໍາລັບໃນຊາດນີ້ຍ່ອມໄດ້ຄວາມ ປື້ມປິຕິຢ່າງສູງເມື່ອຊາບວ່າພະສົງໄດ້ໃຊ້ພັດທະສີມາທີ່ຕົນສ້າງຖວາຍ ກຽດຕິຄຸນຂອງຜູ້ຖວາຍຍ່ອມໄປກວ້າງໄກຜູ້ຖວາຍຍ່ອມໄດ້ສະດັບຮັບຟັງພະທໍາເທສະໜາເພິ່ມພູນສີນສະມາທິປັນຍາທຳໃຫ້ຈິດໃຈສະອາດສະວ່າງສະງົບສຸກຫຼາຍ ຂຶ້ນແມ່ນທຳກາລກິຣິຍາ (ຕາຍ) ຍ່ອມມີອາລົມຢຶດໝັ້ນໃນກຸສົນກັມແລະໃນຊາດໜ້າຖ້າຜູ້ໃດຖວາຍພັດທະສີມາຫາກເຂົາຍັງມີກິເລດຢູ່ເມື່ອເຖິງແກ່ກັມລົງເຂົາຍ່ອມໄປເກີດໃນສຸຂະຕິໂລກສະຫວັນພຽບພ້ອມດ້ວຍສິ່ງຂອງອັນປະເສີດຊຶ່ງເປັນຝ່າຍໂລກີຍະສົມບັດ ແລະຈະໄດ້ບັນລຸຄຸນນະທໍາຕ່າງໆເຊັ່ນ: ຊານອະພິນຍາອະຣິຍະມັກຂ໌ອະຣິຍະຜົນ ແລະຈະທຳໃຫແຈ້ງຊຶ່ງພະນິພານ.

_____________

ໜັງສືພິມເສດຸະກິດ-ສັງຄົມ

แชร์