ຖໍ້າຜາກ້າ ສະຖານທີ່ທ່ອງທ່ຽວສວຍງາມ

   ຖໍ້າຜາກ້າ ເປັນແຫຼ່ງທ່ອງທ່ຽວໜຶ່ງທີ່ມີຄວາມສວຍງາມເປັນແຫຼ່ງທ່ອງທ່ຽວທາງທໍາມະຊາດຂອງແຂວງວຽງຈັນ ຕັ້ງຢູ່ທີ່ບ້ານ ນໍ້າເຟືອງ ເມືອງແມດ ແຂວງວຽງຈັນ ຫ່າງຈາກເທສະບານຂອງເມືອງປະມານ 30 ກວ່າກິໂລແມັດ, ການທີ່ຈະເດີນທາງເຂົ້າໄປໃນສະຖານທີ່ແຫ່ງນີ້ແມ່ນຕ້ອງໄດ້ອາໄສການເດີນເຮືອເປັນຫຼັກຊຶ່ງໃຊ້ເວລາປະ ມານເກືອບ 2 ຊົ່ວໂມງຈຶ່ງຮອດ.

 ຖໍ້າຜາກ້າເປັນຜາຫີນອອ່ນຄ້າຍໆຫີນປູນປະກອບມີ 3 ໜ່ວຍພູ ຕິດຕໍ່ກັນໂດຍແບ່ງອອກເປັນ 3 ຖໍ້າຫຼັກໆເຊັ່ນ: ຖໍ້າຜາກ້າເປັນຖໍ້າຊັ້ນທຳອິດເລີ່ມຈາກປາກຖໍ້າເຂົ້າໄປຫາໜ່ວຍພູໜ່ວຍທີ 1, ສຳລັບ ໜ່ວຍພູໜ່ວຍທີ 2 ຈະມີຖໍ້າທີ່ສູງຂຶ້ນໄປອີກ ຊຶ່ງມີຊື່ວ່າ: ຖໍ້າກິງ ແລະຖໍ້າຊັ້ນທີ 3 ເປັນຊັ້ນສຸດທ້າຍຊຶ່ງເປັນຈຸດສູງທີ່ສຸດທີ່ໃຊ້ເປັນຈຸດຊົມວິວມີຊື່ວ່າ: ຖໍ້າພະລືສີມີສາຍ ນໍ້າເຟືອງໄຫຼລອດກ້ອງຖໍ້າຊຶ່ງມີຄວາມຍາວປະມານ 5 ກວ່າກິໂລແມັດ,ພາຍໃນຖໍ້າປະກອບໄປດ້ວຍຄວາມງົດງາມຂອງຫີນຜາ, ນົມ ຜາ, ຫີນຍ້ອຍທີ່ເກີດຂຶ້ນຈາກທຳມະຊາດຊຶ່ງໄດ້ສະສົມມາຫຼາຍປີກາຍເປັນປະຕິມາກຳອັນໜ້າອັດສະຈັນທີ່ຫາຊົມໄດ້ຍາກ ແລະກໍເປັນສິ່ງທີ່ກຸ້ມຄ່າຫຼາຍເມື່ອທ່ານໄດ້ມາຮອດມາ ເຖິງຈຸດນີ້.

   ຖໍ້າຜາກ້າຍັງມີມົນສະເໜທີ່ເປັນເອກະລັກສະເພາະ ແລະຄວາມງາມຂອງທຳມະຊາດແຫ່ງພຶກສານາໆ ພັນຢ່າງບໍ່ມີວັນຈາງຫາຍເຊັ່ນ: ຄວາມງາມຂອງທໍາມະຊາດມີຄວາມເຢັນຢູ່ຕະຫຼອດປີບວກກັບຄວາມງາມຂອງຕົ້ນໄມ້ໃບຫຍ້າພຶກສາຊາດນາໆພັນທີ່ຄົງຄວາມງາມຂຽວອຸ່ມທຸ່ມຢູ່ຕະຫຼອດປີໃນອ້ອມຮອບຖໍ້າແຫ່ງດັ່ງກ່າວ.

________________

ໂດຍ: ວົງມະນີ

แชร์