ສກຂ ຫຼວງພະບາງເຊື່ອມຊຶມເອກະສານຂໍ້ແຂ່ງຂັນ 5 ເປັນເຈົ້າ

  ພະແນກສຶກສາທິການ ແລະກີລາແຂວງຫຼວງພະບາງ (ສກຂ) ໄດ້ຈັດພິທີເຊື່ອມຊຶມເອກະສານຂໍ້ແຂ່ງຂັນ 5 ເປັນເຈົ້າເມື່ອວັນທີ 3 ກໍລະກົດ ຜ່ານມາທີ່ພະແນກດັ່ງ ກ່າວ, ໂດຍການເປັນປະທານຂອງ ສະຫາຍ ຊາຍສະຫວັນ ຈັນມານິດ ເລຂາຄະນະພັກຮາກຖານຮັກສາການຫົວໜ້າພະແນກສຶກສາທິການ ແລະກີລາແຂວງ, ສະຫາຍ ວົງເພັດ ອຸດົມລິດ ປະທານກຳມະບານຮາກຖານຮອງຫົວໜ້າພະແນກສຶກສາທິການ ແລະກີລາແຂວງມີສະຫາຍຄະນະບໍລິຫານງານ ແລະສະມາຊິກກຳມະບານພາຍໃນພະແນກເຂົ້າຮ່ວມ 100 ກວ່າສະຫາຍ. ສະຫາຍ ວົງເພັດ ອຸດົມລິດ ໄດ້ສະເໜີເອກະສານບົດແນະນຳກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າຂອງສະຫະ ພັນກຳມະບານແຂວງຫຼວງພະບາງ ຊຶ່ງມີຈຸດປະສົງ ແລະຄາດໝາຍໃນການເສີມຂະຫຍາຍກຳລັງແຮງງານສັງລວມຂອງຊົນຊັ້ນກຳມະກອນ, ຊາວຜູ້ອອກແຮງງານເວົ້າລວມ, ເວົ້າສະເພາະພະນັກງານ, ສະມາຊິກກຳມະບານສ້າງເງື່ອນໄຂໃຫ້ເຂົາເຈົ້າມີສະຕິຕື່ນຕົວ, ມີຄວາມເປັນເຈົ້າການພັດທະນາຕົນເອງຢ່າງຮອບດ້ານ, ຕັ້ງໜ້າເຂົ້າ ຮ່ວມການຈັດຕັ້ງປະຕິບັດແນວທາງຂອງພັກ, ປະຕິບັດແຜນພັດທະນາເສດຖະກິດ-ສັງຄົມຂອງລັດໂດຍຜ່ານຂະບວນການແຂ່ງຂັນ 5 ເປັນເຈົ້າຂອງສະຫະພັນກຳມະ ບານ,ເຮັດໃຫ້ພະນັກງານສະມາຊິກກຳມະບານກຳໄດ້ເນື້ອໃນລວມ, ມາດຖານບັນດາບາດກ້າວໃນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າແນໃສ່ສ້າງຄວາມເປັນເອກະ ພາບໃນການຊີ້ນຳ-ນຳພາ, ການຊຸກຍູ້ຕິດຕາມ-ກວດກາ ແລະ ການປະເມີນຜົນການຈັດຕັ້ງປະຕິບັດຂໍ້ແຂ່ງ ຂັນ 5 ເປັນເຈົ້າ, ເຮັດໃຫ້ຂະບວນການແຂ່ງຂັນດັ່ງກ່າວກາຍເປັນຂະບວນການກວ້າງຂວາງຕິດພັນກັບຂະບວນການແຂ່ງຂັນຮັກຊາດ ແລະພັດທະນາຢູ່ແຕ່ລະກົມກອງໃຫ້ໄດ້ຈັດຕັ້ງປະຕິບັດຢ່າງຄົບຖ້ວນ, ນອກຈາກນີ້ຍັງໄດ້ເຜີຍແຜ່ກົດລະບຽບຂອງກອງທຶນຊ່ວຍເຫຼືອເຊິ່ງກັນ ແລະກັນອີກຕື່ມ.

   ໂອກາດນີ້ສະຫາຍ ຊາຍສະຫວັນ ຈັນມານິດ ໄດ້ກ່າວສະແດງ ຄວາມຍ້ອງຍໍຊົມເຊີຍຕໍ່ຄະນະຮັບຜິດກໍ່ຄືຄະນະບໍລິຫານງານ-ສະມາຊິກກຳມະບານທຸກສະຫາຍທີ່ໄດ້ເອົາໃຈໃສ່ສູ້ຊົນປະຕິບັດບັນດາເນື້ອໃນຂໍ້ແຂ່ງຂັນຕ່າງໆ ໂດຍສະເພາະການເຂົ້າຮ່ວມຮັບຟັງ, ຄົ້ນຄວ້າຮໍ່າຮຽນ ແລະເຊື່ອມຊຶມແນວທາງຂອງພັກ, ນະໂຍບາຍລະບຽບກົດ ໝາຍຂອງລັດ, ປະຕິບັດຕາມ ຄຳສັ່ງແຜນການຂອງການຈັດຕັ້ງ, ພ້ອມດຽວກັນນີ້, ທ່ານຍັງໄດ້ເນັ້ນໜັກໃຫ້ຄະນະສະຫະພັນກໍາມະບານ ແລະສະມາຊິກທຸກສະຫາຍຈົ່ງໄດ້ພ້ອມກັນສືບຕໍ່ເປັນເຈົ້າການໂຄສະນາສຶກສາອົບຮົມການເມືອງ-ແນວຄິດ, ປັບປຸງແບບແຜນການນຳພາ ແລະຂະຫຍາຍການຈັດຕັ້ງກຳມະບານ, ປົກປ້ອງສິດ ແລະຜົນປະໂຫຍດອັນຊອບທຳຂອງພະນັກງານສະມາຊິກກຳມະບານ, ກຳມະກອນ-ຊາວຜູ້ອອກແຮງງານ, ເຂົ້າຮ່ວມການຕິດຕາມກວດກາ, ຄຸ້ມຄອງລັດ, ຄຸ້ມຄອງເສດຖະ ກິດ, ວັດທະນະທຳ-ສັງຄົມ, ມີຄວາມສາມັກຄີ, ດຸໝັ່ນໃນການອອກແຮງງານ, ມີຄວາມຊື່ສຸດບໍລິສຸດ, ຈົ່ງຮັກພັກດີຕໍ່ພັກ, ມີຄວາມເສຍສະຫຼະ, ອົດທົນ, ຕ້ານສະກັດກັ້ນທຸກປະກົດການຫຍໍ້ທໍ້, ພ້ອມກັນຈັດຕັ້ງປະຕິບັດໜ້າທີ່ວຽກງານຂອງຕົນຮັບຜິດຊອບ ແລະຕັ້ງໜ້າພັດທະນາເສດຖະກິດຄອບຄົວໃຫ້ອຸດົມສົມບູນຂຶ້ນໄປເລື້ອຍໆ.

แชร์