ຮອງນາຍົກ ລົງຊຸກຍູ້ເສດຖະກິດ-ສັງຄົມ ແລະການເງິນຢູ່ຈຳປາສັກ

 ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນພ້ອມດ້ວຍຄະນະໄດ້ເຄື່ອນໄຫວຊຸກຍູ້ວຽກງານການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແລະແຜນຈັດເກັບລາຍຮັບເຂົ້າງົບປະມານແຫ່ງລັດປີ 2020 ໃນ 6 ເດືອນຕົ້ນປີ ແລະທິດທາງວຽກງານຈຸດສຸມ 6 ເດືອນທ້າຍປີຢູ່ແຂວງຈຳປາສັກໃນວັນທີ 8 ກໍລະກົດຜ່ານມາໂດຍການຕ້ອນຮັບຂອງທ່ານ ປອ ວິໄລ ວົງບຸດດາຄໍາ ເຈົ້າແຂວງຈໍາປາສັກ,ມີຮອງເຈົ້າແຂວງ,ຫົວໜ້າຫົວວ່າການ,ຫົວໜ້າພະແນກການເງິນແຂວງ, ຫົວໜ້າພະແນກສາທາລະນະສຸກແຂວງ, ທ່ານເຈົ້າເມືອງ, ບັນດາພະແນກການ ແລະພະນັກງານຫຼັກແຫຼ່ງຂອງຂະແໜງການເງິນເຂົ້າຮ່ວມ.


   ໂອກາດດັ່ງກ່າວ, ທ່ານຮອງນາຍົກລັດຖະມົນຕີລັດຖະມົນຕີກະຊວງການເງິນພ້ອມດ້ວຍຄະນະ; ໄດ້ພົບປະປຶກສາຫາບາງບັນຫາທີ່ສຳຄັນທີ່ຕິດພັນກັບວຽກງານຂອງຂະແໜງການເງິນໂດຍສະເພາະການຈັດເກັບລາຍຮັບ, ຈາກນັ້ນໄດ້ລົງຕິດຕາມກ່ຽວກັບການຈັດຕັ້ງເຝົ້າລະວັງຄວບຄຸມ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ສູນຊ່ວຍເຫຼືອຜູ້ດ້ອຍໂອກາດທາງສັງຄົມແຂວງຈຳປາສັກ (ສູນກັກກັນຫຼັກ 21 ເມືອງປະທຸມພອນ),ພ້ອມທັງໄດ້ຮັບຟັງການລາຍງານໂດຍສັງເຂບຈາກທ່ານ ສີອຸຍ ສີລາລັດ ຫົວໜ້າສູນ, ຊຶ່ງເບື້ອງຕົ້ນເປັນສູນຊ່ວຍເຫຼືອຜູ້ດ້ອຍໂອກາດທາງສັງຄົມແຂວງຈຳປາສັກ, ແຕ່ປະຈຸບັນຖືກນຳມາກັກກັ້ນແຮງງານລາວທີ່ເຄື່ອນຍ້າຍມາແຕ່ເຮັດວຽກຕ່າງປະເທດ. ສູນດັ່ງກ່າວມີອາຄານ10 ຫຼັງໃນນັ້ນ, ມີອາຄານ7 ຫຼັງຮັບໃຊ້ສຳລັບແຮງງານກຸ່ມເປົ້າໝາຍ, ມີຈຳນວນຫ້ອງທັງໝົດ 20 ຫ້ອງ, ຊຶ່ງນັບແຕ່ວັນທີ 27 ເມສາ 2020 ຮອດປະຈຸບັນມີແຮງງານທີ່ເຄື່ອນຍ້ານມາຈາກປະເທດໄທສະສົມທັງໝົດ 1.126 ຄົນ, ຍິງ 692 ຄົນ, ເມືອຮອດກຳນົດ 14 ວັນຕາມມາດຕະການຄອບຄຸມພະຍາດໂຄວິດ-19 ໄດ້ສົ່ງຄືນກັບບ້ານເພື່ອດຳລົງຊີວິດຕາມປົກກະຕິ. ຈາກນັ້ນທ່ານ ສົມດີ ດວງດີ ພ້ອມຄະນະໄດ້ຢ້ຽມຢາມ ແລະກວດກາຄວາມຄືບໜ້າ ໂຄງການພັດທະນາເຂດເສດຖະກິດວັງເຕົ່າ-ໂພນທອງ ແລະກວດກາເບິ່ງສະພາບອາຄານດ່ານສາກົນວັງເຕົ່າຕື່ມອີກ, ໂດຍການຕ້ອນຮັບຂອງທ່ານ ມະໄລທອງ ກົມມະສິດ ຮອງເຈົ້າແຂວງໆຈຳປາສັກ ຜູ້ຊີ້ນໍາວຽກງານເສດຖະກິດຂັ້ນແຂວງພ້ອມດ້ວຍການນໍາຂະແໜງການຕ່າງໆ.


  ໃນຕອນບ່າຍວັນດຽວກັນ, ທ່ານຮອງນາຍົກລັດຖະມົນຕີລັດຖະມົນຕີກະຊວງການເງິນພ້ອມດ້ວຍຄະນະໄດ້ຮ່ວມເຮັດວຽກກັບຫ້ອງວ່າການປົກຄອງແຂວງ ແລະໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະທິດທາງວຽກງານຈຸດສຸມ 6 ເດືອນທ້າຍ ປີ 2020, ເຖິງວ່າມີການລະບາດຂອງພະຍາດໂຄວິດ-19 ທີ່ສົ່ງຜົນກະທົບຕໍ່ ເສດຖະກິດ ແລະສັງຄົມຢ່າງໜັກໜ່ວງ, ແຕ່ພາຍໃຕ້ການນໍາພາ-ຊີ້ນໍາຢ່າງໃກ້ຊິດ ແລະການຊ່ວຍເຫຼືອຢ່າງທັນການຈາກສູນກາງພັກ-ລັດຖະບານ, ແຂວງຈຳປາສັກ ຍັງສືບຕໍ່ມີສະຖຽນລະພາບທາງດ້ານການເມືອງໜັກແໜ້ນມີຄວາມສະຫງົບ ແລະເປັນລະບຽບຮຽບຮ້ອຍທາງສັງຄົມຊີວິດການເປັນຢູ່ຂອງປະຊາຊົນໄດ້ຮັບການປັບປຸງ ແລະ ຍົກສູງດີຂຶ້ນເປັນກ້າວໆ, ສະເພາະ 6 ເດືອນຕົ້ນປີ 2020 ມູນຄ່າ ລວມຍອດຜະລິດຕະພັນພາຍໃນ (GDP) ປະຕິບັດໄດ້ 9.390 ຕື້ກີບ (ແຜນ 20.101 ຕື້ກີບ) ທຽບໃສ່ແຜນປີປະຕິບັດໄດ້ 46,72%, ສະເລ່ຍຕໍ່ຫົວຄົນໄດ້ 1.410 ໂດລາຕໍ່ຄົນຫຼືເທົ່າກັບ 12,62 ລ້ານກີບຕໍ່ຄົນ; ໂຄງປະກອບເສດຖະກິດກະສິກໍາ-ປ່າໄມ້ກວມ 29,12%, ອຸດ ສາຫະກໍາ14,3% ແລະບໍລິການກວມ 56,58% ຂອງ GDP. ຄາດ ຄະເນວ່າມູນຄ່າ GDP ປີ 2020 ຈະປະຕິບັດໄດ້ຕາມແຜນການຖ້າຫາກການລະບາດຂອງພະຍາດໂຄວິດ-19 ຢູ່ສືບຕໍ່ຜ່ອນຄາຍລົງ.
  ສ່ວນການຈັດເກັບລາຍຮັບເຂົ້າງົບປະມານທ່ານ ສົມບູນ ເຮືອງວົງສາ ຫົວໜ້າພະແນກການເງິນແຂວງຈໍາປາສັກໃຫ້ຮູ້ວ່າ: ແຜນຈັດເກັບລາຍຮັບງົບປະມານປີ 2020 ຈໍານວນ 1.557 ຕື້ກີບ(ສູນກາງ 742,20 ຕື້ກີບ ແລະພູດທ້ອງຖິ່ນ 815,51 ຕື້ກີບ), ມາຮອດວັນທີ 30 ມິຖຸນາ ທົ່ວແຂວງສາມາດຈັດເກັບໄດ້ 607,91 ຕື້ກີບ ທຽບໃສ່ໄລຍະດຽວຫຼຸດລົງ 13,27%, ທຽບໃສ່ແຜນປີໄດ້ 39,20%, ໃນນີ້ລາຍຮັບພູດສູນກາງໄດ້ 370,47 ຕື້ກີບ ເທົາກັບ 49,86% ແລະລາຍຮັບພູດຂອງ ແຂວງໄດ້ 237,44 ຕື້ກີບ ເທົ່າກັບ 29,11%; ສໍາລັບລາຍຈ່າຍ (ລວມສຶກສາ, ສາທາ) ປະຕິບັດໄດ້ 230,24 ຕື້ກີບ, ທຽບໃສ່ໄລຍະດຽວຫຼຸດລົງ 31,32%, ທຽບໃສ່ແຜນປີປະຕິບັດໄດ້ 30,49%.
  ໂອກາດດັ່ງກ່າວ, ທ່ານຮອງນາຍົກລັດຖະມົນຕີລັດຖະມົນຕີກະຊວງການເງິນ, ໄດ້ເນັ້ນໃຫ້ຄະນະພັກຄະນະນຳຂອງແຂວງໂດຍສະເພາະພະແນກການເງິນຂອງແຂວງຊີ້ນຳແຜນງານການຈັດເກັບລາຍຮັບເຂົ້າງົບປະມານ, ການພັດທະນາ ຂອງແຂວງໃຫ້ຕໍ່ເນື່ອງ, ການກວດກາລາຍຮັບໃຫ້ຖືກຕ້ອງຕາມຄວາມເປັນຈິງ, ເຂັ້ມງວດການນຳເຂົ້າສິນຄ້າຕ່າງໆ ແລະສືບຕໍ່ຊອກທ່າແຮງທີ່ບົ່ມຊ້ອນໃນແຕ່ລະຂົງເຂດໃນທ້ອງຖິ່ນ, ເພື່ອເພີ່ມການຈັດ ເກັບລາຍຮັບເຂົ້າງົບປະມານໃຫ້ບັນລຸຕາມລະດັບຄາດໝາຍທີ່ວາງໄວ້.

แชร์