ປີ 2019 ນີ້ລັດຈະໃຊ້ງົບກ່ວາ 600 ກວ່າຕື້ກີບ ບູລະນະທາງຫລວງ 18 ເສັ້ນ

  ໃນປີ 2018 ຜ່ານມາການກໍ່ສ້າງ-ສ້ອມແປງຂົວ-ທາງ ຂອງກະຊວງໂຍທາທິການ ແລະ ຂົນສົ່ງມີຜົນສໍາເລັດຫຼາຍດ້ານບໍ່ວ່າຈະເປັນໂຄງການກໍ່ສ້າງເສັ້ນທາງຕ່າງໆໃນຂອບເຂດທົ່ວປະເທດ ແລະ ວຽກສ້ອມແປງທາງຫຼວງແຫ່ງຊາດແບບກໍານົດເວລາທີ່ມີຄວາມຄືບໜ້າເປັນທີ່ໜ້າພໍໃຈ.

   ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ກ່າວວ່າ: ໃນປີ 2018 ຜ່ານມາ, ກະຊວງໂຍທາທິການ ແລະ ຂົນສົ່ງ ໄດ້ຖືເອົາການພັດທະນາພື້ນຖານໂຄງລ່າງເປັນຕົ້ນແມ່ນວຽກງານຂົວ-ທາງນອກຈາກຈະສຸມໃສ່ໃນການປັບປຸງລາຄາຫົວໜ່ວຍການກໍ່ສ້າງສ້ອມແປງຂົວ-ທາງທີ່ເປັນວຽກຈຸດສຸມຂອງກະຊວງແລ້ວ ການຄຸ້ມຄອງບັນດາໂຄງການກໍ່ສ້າງພື້ນຖານໂຄງລ່າງ ເຊິ່ງປະກອບມີທາງ ແລະ ຂົວ ກໍແມ່ນວຽກງານໜຶ່ງທີ່ກະຊວງໄດ້ເອົາໃຈໃສ່ຈັດຕັ້ງປະຕິບັດເຊິ່ງສະແດງອອກໃນຜົນສໍາເລັດໃນປີຜ່ານມາເຊັ່ນ: ໂຄງການກໍ່ສ້າງທາງບ້ານຮວກ-ເມືອງຄອບ-ປາກຄອບ-ຄອນຕື້ນ, ໂຄງການກໍ່ສ້າງຂົວເຊກອງ, ໂຄງການປັບປຸງຂະຫຍາຍເສັ້ນທາງເລກທີ 21 ແຕ່ຜາເມືອງ-ທາງ 1 D ບ້ານທ່າສີ ແຂວງບໍລິຄໍາໄຊ, ໂຄງການກໍ່ສ້າງທາງ 16 A ປາກຊ່ອງ-ຫຼັກ 52 ແຂວງອັດຕະປື, ໂຄງການກໍ່ສ້າງທາງເບີ 4 ແຕ່ພູຫົວຊ້າງ-ບ້ານອ່າວໃຕ້ ເມືອງ ອານຸວົງ ແຂວງໄຊສົມບູນ ແລະ ໂຄງການກໍ່ສ້າງທາງ 16 B ເຊກອງ-ດາກຈຶງ ຊ່ວງ 96,6 ກິໂລແມັດ.

  ນອກຈາກນີ້, ຍັງມີຫຼາຍໂຄງການທີ່ພວມຈັດຕັ້ງປະຕິບັດວຽກຢ່າງຕັ້ງໜ້າ ແລະ ມີຄວາມຄືບໜ້າເຊັ່ນ: ໂຄງການກໍ່ສ້າງທາງປູຢາງ 2 ຊັ້ນ ເສັ້ນທາງເລກ 6 A+6 B ຫາງລ້ອງ-ສົບເບົາ-ປ່າຮ່າງ (ADB12) ສະເພາະທາງ 6 B ແມ່ນສໍາເລັດແລ້ວ 100% ທາງ 6 A ປະຕິບັດໄດ້ 98% ແລະຊ່ວງວຽງໄຊ-ນໍ້່າໂສ ຍປະຕິບັດໄດ້ 53,14%, ໂຄງການຄຸ້ມຄອງ ແລະ ສ້ອມແປງຂະແໜງຂົວທາງ 61,61%, ໂຄງການກໍ່ສ້າງທາງ 3 ແຍກນາຊາງ-ທົ່ງທູ ແລະ ເທດສະບານ ເມືອງຊໍາໃຕ້ ປະຕິບັດໄດ້ 98,08%, ໂຄງການກໍ່ສ້າງທາງທ່າເຫຼົ້າ-ຊໍາໃຕ້ ປະຕິບັດໄດ້ 96,17%, ໂຄງການທາງຊົນນະບົດ KFW (RIP VI) ມີທັງໝົດ 3 ສັນຍາຄື: ສັນຍາທີ 1 ທາງເບີ 3.6910 ແຕ່ແຍກ 15B-ບ້ານອາສົກ ປະຕິບັດໄດ້ 48%, ສັນຍາທີ 2 ທາງເບີ 5.7226 ແຕ່ແຍກ 15B-ບ້ານຕຸ້ມລີຂາວ ປະຕິບັດໄດ້ 100% ແລະ ສັນຍາທີ 3 ທາງເບີ 5.7264 ແຕ່ບ້ານກັງ-ບ້ານຈໍລະວຽງ ປະຕິບັດໄດ້ 100%; ນອກນີ້, ຍັງສາມາດປະຢັດເງິນໄປກໍ່ສ້າງທາງເພີ່ມອີກ 4 ສັນຍາຍາວ 16,3 ກິໂລແມັດ;ປັດຈຸບັນ,ວຽກເພີ່ມດັ່ງກ່າວຄືບໜ້າ 69% ສະເລ່ຍແລ້ວປະຕິບັດໄດ້ 83% ໂຄງການກໍ່ສ້າງທາງຫົງສາ-ຊຽ ງແມນ ຊ່ວງທີ 1 ປະຕິບັດໄດ້ 86% ແລະ ຊ່ວງທີປະຕິບັດໄດ້ 91,58%, ໂຄງການກໍ່ສ້າງຂົວ 2 ແຫ່ງຕາມທາງເລກ 9 ໂດຍທຶນ ຊ່ວຍເຫຼືອລ້າຈາກລັດ ຖະບານຍີປຸ່ນປະຕິບັດໄດ້ 75,13% ໂຄງການກໍ່ສ້າງທາງ 16 B ດາກຈຶງ-ຫວຽດນາມຊ່ວງ 21 ກິໂລແມັດປະຕິບັດໄດ້ 81,47% ແລະ ໂຄງການອື່ນໆອີກຈໍານວນໜຶ່ງ.

 ນອກຈາກວຽກງານດັ່ງກ່າວແລ້ວກະຊວງໂຍທາທິການ ແລະ ຂົນສົ່ງຍັງໄດ້ເອົາໃຈໃສ່ສ້ອມແປງທາງຫຼວງແຫ່ງຊາດແບບເປັນກໍານົດ ໃນປີ 2018 ເຊິ່ງມີທັງ ໝົດ 130 ສັນຍາຂຶ້ນກັບ 25 ໂຄງການລວມມູນຄ່າກໍ່ສ້າງທັງໝົດ 596,99 ຕື້ກີບ, ກໍານົດເວລາໃນການຈັດຕັ້ງປະຕິບັດສັນຍາ 5 ເດືອນຮອດທ້າຍເດື ອນທັນວາ ສະເລ່ຍຄວາມຄືບໜ້າທັງໝົດໄດ້ 97,19% ນອກຈາກນີ້ໃນການສ້ອມແປງທາງຫຼວງຍັງມີໜ້າວຽກສ້ອມແປງດ້ວຍແຮງປະຊາຊົນເຊິ່ງໃນໄລຍະຜ່ານມາການຈັດຕັ້ງປະຕິບັດວຽກບູລະນະຮັກສາທາງຫຼວງຕາມປົກກະຕິດ້ວຍແຮງປະຊາຊົນເຫັນວ່າຍັງບໍ່ສາມາດຈັດຕັ້ງປະຕິບັດໄດ້ດີ ແລະ ບໍ່ມີປະສິດທິພາບເທົ່າທີ່ຄວນ, ການຕິດຕາມການປະຕິບັດສັນຍາຂອງຫ້ອງການໂຍທາທິການ ແລະ ຂົນສົ່ງເມືອງຍັງບໍ່ໄດ້ເຮັດຢ່າງເປັນປະຈໍາ ແລະ ທົ່ວເຖິງ, ປະຊາຊົນຜູ້ຮັບຜິດຊອບແຕ່ລະຕອນທາງບໍ່ສາມາດປະຕິບັດໄດ້ໝົດທຸກໜ້າວຽກທີ່ກໍານົດໄວ້ໃນສັນຍາ, ມີພຽງໜ້າວຽກຖາງຫຍ້າບໍລິເວນສອງຂ້າງທາງທີ່ຖືກຈັດຕັ້ງປະຕິ ບັດ.

  ການຈັດຕັ້ງປະຕິບັດວຽກບູລະນະຮັກສາທາງຫຼວງຕາມປົກກະຕິດ້ວຍແຮງປະຊາຊົນ 4 ສັນຍາທີ່ທົດລອງຢູ່ແຂວງ ຜົ້ງສາລີ, ຫຼວງພະບາງ, ວຽງຈັນ ແລະ ແຂວງຈໍາປາສັກແມ່ນຍັງບໍ່ທັນມີປະສິດທິຜົນຍ້ອນການເປ່ເພຂອງທາງເກີນຄວາມສາມາດຂອງຜູ້ຮັບຜິດຊອບ, ຂາດການຕິດຕາມການປະຕິບັດສັນຍາຈາກ ເຈົ້າຂອງໂຄງການຢ່າງເປັນປົກກະຕິເຖິງແນວໃດກໍຕາມການສະໜອງງົບປະມານຂອງກອງທຶນທາງໃຫ້ແກ່ວຽກບູລະນະຮັກສາທາງຫຼວງຕາມປົກກະຕິດ້ວຍແຮງງານປະຊາຊົນຍັງຊັກຊ້າເຮັດໃຫ້ປະຊາຊົນຜູ້ຮັບຜິດຊອບບໍ່ສາມາດຈັດຕັ້ງປະຕິບັດໄດ້ຕໍ່ເນື່ອງ.

  ໃນຕໍ່ໜ້າກະຊວງໂຍທາທິການ ແລະຂົນສົ່ງຈະເອົາໃຈໃສ່ຄຸ້ມຄອງຈັດຕັ້ງປະຕິບັດບັນດາໂຄງການກໍ່ສ້າງຂົວທາງໃນປັດຈຸບັນ ແລະພິເສດບັນດາໂຄງການທີ່ໃກ້ຈະສໍາເລັດເຊັ່ນ: ໂຄງການກໍ່ສ້າງທາງສາມແຍກນາຊາງ-ທົ່ງທູ້ ແລະ ເທດສະບານເມືອງຊໍາໃຕ້, ໂຄງການກໍ່ສ້າງທາງທ່າເຫຼົ້າ-ຊໍາໃຕ້, ໂຄງການທາງຊົນນະບົດ KFW (RIP VI), ໂຄງການກໍ່ສ້າງທາງຫົງສາ-ຊຽງແມນ, ໂຄງການກໍ່ສ້າງທາງ 16 B ດາກຈຶງ-ຫວຽດນາມຊ່ວງ 21 ກິໂລແມັດ ແລະອື່ນໆ, ນອກນີ້ຍັງຈະປະຕິບັດວຽກບູລະນະສ້ອມແປງຕາໜ່າງເສັ້ນທາງທົ່ວປະເທດເພື່ອຮັບປະກັນໃຫ້ການສັນຈອນບໍ່ຕິດຂາດໂດຍສືບຕໍ່ປະຕິບັດການບູລະນະທາງຫຼວງແຫ່ງຊາດ ຈໍານວນ 18 ເສັ້ນໃຫ້ສໍາເລັດ ແລະຈັດຕັ້ງປະຕິບັດ 26 ໂຄງການ 120 ສັນຍາ ທີ່ມີມູນຄ່າສ້ອມແປງ 605,09 ຕື້ກີບ ໃຫ້ສໍາເລັດຕາມແຜນປີ 2019 ນີ້.

ນສພ-ເສດຖະກິດ-ສັງຄົມ

แชร์