ນາຍົກ ຊຸກຍູ້ການຜະລິດເປັນສິນຄ້າຢູ່ໄຊທານີ

 ທ່ານ ທອງລຸນ ສີສຸລິດ ນາຍົກລັດ ຖະມົນຕີພ້ອມຄະນະໄດ້ລົງເຄື່ອນໄຫວຊຸກຍູ້ຂະບວນການຜະລິດເປັນສິນຄ້າຢູ່ເມືອງໄຊທານີ ນະຄອນຫຼວງວຽງຈັນ (ນວ) ຖືກຕ້ອນຮັບຈາກທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ທ່ານ ຄໍາປະດິດ ເຂັມມານິດ ເຈົ້າເມືອງໄຊທານີ ຕະຫຼອດຮອດຊາວກະສິກອນ.
  ການລົງເຄື່ອນໄຫວຄັ້ງນີ້ໄດ້ລົງເບິ່ງວິທີການປູກຜັກກຸ່ມຜະລິດກະສິກໍາອິນຊີບ້ານທົ່ງມັ່ງເຊິ່ງທ່ານ ນາງ ຄໍາມອນ ຫຼວງລາດ ປະທານກຸ່ມຜະລິດກະສິກໍາອິນຊີທົ່ງມັ່ງໄດ້ລາຍງານໃຫ້ຮູ້ກ່ຽວກັບຂໍ້ສະດວກຂໍ້ຫຍຸ້ງຍາກ ແລະ ສິ່ງທ້າທາຍວ່າ: ປະຈຸບັນກຸ່ມຜະລິດກະສິກໍາອິນຊີທົ່ງມັ່ງໄດ້ມີການຂະຫຍາຍຕົວນັບມື້ເພີ່ມຂຶ້ນມີສະມາຊິກທັງໝົດ 48 ຄອບຄົວ ມີເຮືອນຮົ່ມທັງໝົດ 116ຫຼັງຜົນຜະລິດບໍ່ພຽງພໍຕໍ່ຄວາມຕ້ອງການຂອງຕະຫຼາດໄປຄຽງຄູ່ກັນນັ້ນກຸ່ມຍັງພົບຄວາມຫຍຸ້ງຍາກເປັນຕົ້ນການເຂົ້າເຖິງແຫຼງທຶນຂາດພື້ນທີ່ທໍາການຜະລິດຍາມແລ້ງນໍ້າບໍ່ພຽງພໍຄ່າໄຟຟ້າທໍາການຜະລິດຄິດໄລ່ເປັນອັດຕາທຸລະກິດຄວາມຮູ້ດ້ານວິຊາການຍັງຢູ່ໃນຂີດຈໍາກັດນອກນັ້ນຍັງມີດອກເບ້ຍເງິນກູ້ສູງ ແລະອື່ນໆ ພ້ອມນັ້ນຄະນະດັ່ງກ່າວຍັງໄດ້ໄປຢ້ຽມຢາມບໍລິສັດບໍລິສັດລາວໂຄຄາ-ໂຄລາ ບ໊ອຕຕລິງ ຈໍາກັດ ໂດຍ ທ່ານ ລີແອນໂດ ມາຕີນ ຄາຊາເຣຕ້າ ຜູ້ຈັດ ການທົ່ວໄປບໍລິສັດດັ່ງກ່າວໄດ້ລາຍງານຫຍໍ້ກ່ຽວກັບສະພາບຄວາມເປັນມາວ່າ: ນັບແຕ່ປີ 2012 ບໍລິສັດລາວ ໂຄຄາ-ໂຄລາ ບ໊ອຕຕລິງ ຈໍາກັດ ໄດ້ນໍາ ຜະລິດຕະພັນນໍ້າໂຄກນໍ້າຫວານໂຄຄາໂຄລາເຂົ້າມາຈໍາໜ່າຍຢູ່ ສປປ ລາວ ມາຮອດປີ 2014 ໄດ້ສ້າງຕັ້ງໂຮງງານຜະລິດມາຮອດປີ 2015 ໄດ້ເລີ່ມການຜະລິດຢູ່ປະເທດລາວຊຶ່ງສາມາດຜະລິດໄດ້ 22 ພັນແພັກຕໍ່ມື້ ໂດຍມີສາງຈໍາໜ່າຍຢູ່ແຂວງສະຫວັນນະເຂດ ຫຼວງພະບາງ ຈໍາປາສັກ ແລະ ນວ ມີຕົວແທນຈໍາໜ່າຍ 24 ຫົວໜ່ວຍທົ່ວປະເທດນອກນີ້ຍັງໄດ້ລົງຢ້ຽມຢາມໂຮງງານຜະລິດອາຫານສັດພູຄໍາຂອງບໍລິສັດຊີພີລາວ ຈໍາກັດ ຖືກຕ້ອນຮັບຈາກທ່ານ ທໍານອງ ພົນທອງມາກ ຜູ້ອໍານວຍການບໍລິສັດຊີພີລາວຈໍາກັດ ແລະຢ້ຽມຢາມໂຮງງານອຸດສາຫະກໍາທໍ່ໂຕໂຢລາວຖືກຕ້ອງຮັບຈາກທ່ານ ລັງກອນ ໄຊຍະວົງ ປະທານໂຮງງານອຸດສາຫະກໍາທໍ່ໂຕໂຢລາວ.
  ໂອກາດນີ້ທ່ານນາຍົກລັດຖະມົນຕີໃຫ້ໄດ້ມີຄໍາເຫັນເຊິ່ງໄດ້ຍ້ອງຍໍຊົມເຊີຍຜົນສໍາເລັດເປົ້າໝາຍທີ່ກຸ່ມ ແລະຫົວໜ່ວຍການຜະລິດທີ່ພະຍາຍາມຊຸກຍູ້ສົ່ງເສີມໃຫ້ປະຊາ ຊົນມີລາຍໄດ້ພ້ອມນັ້ນຍັງໄດ້ເນັ້ນໃຫ້ບໍລິສັດ ຊີພີລາວ ຈໍາກັດ ສືບຕໍ່ຊຸກຍູ້ສົ່ງເສີມສະໜອງແນວພັນເຕັກນິກວິຊາການໃຫ້ປະຊາຊົນປູກລ້ຽງຖືກຕ້ອງຕາມຫຼັກວິຊາການ ແນໃສ່ຊຸກຍູ້ສົ່ງເສີມໃຫ້ປະຊາຊົນມີວຽກເຮັດງານທໍາຫຼາຍຂຶ້ນສ່ວນກຸ່ມຜະລິດກະສິກໍາອິນຊີທົ່ງມັ່ງແມ່ນມອບໃຫ້ ນວ ແລະອົງການປົກຄອງ ເມືອງໄຊທານີລົງເລິກຊອກຫາດິນເປົ່າຫວ່າງທີ່ລັດຄຸ້ມຄອງໃຫ້ກຸ່ມໄດ້ທໍາການຜະລິດເພື່ອຫຼຸດຜ່ອນຕົ້ນທຶນ ແລະສະໜອງພືດຜັກໃຫ້ພຽງພໍຕໍ່ຄວາມຕ້ອງການຂອງຕະຫຼາດພ້ອມນັ້ນຍັງໄດ້ມອບເງິນຊຸກຍູ້ກຸ່ມຈໍານວນ 20 ລ້ານກີບ ກະຊວງພະລັງງານ ແລະ ບໍ່ແຮ່ກະຊວງໂຍທາທິການ ແລະ ຂົນສົ່ງ ແລະ ນວ ພາກສ່ວນລະ 10 ລ້ານກີບ ເພື່ອປະກອບສ່ວນສະ ໜອງທຶນເຂົ້າໃນການຜະລິດຕື່ມອີກ.
 ຕອນບ່າຍວັນດຽວກັນທີ່ຫ້ອງວ່າການປົກຄອງ ນວ ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມຄະນະໄດ້ສືບຕໍ່ຊີ້ນໍາວຽກງານຢູ່ນະຄອນຫຼວງວຽງຈັນຊຶ່ງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ໄດ້ລາຍງານບາງບັນຫາພົ້ນເດັ່ນ ນວ ເປັນຕົ້ນການຈັດຕັ້ງປະຕິບັດມະຕິຂອງສູນກາງພັກກ່ຽວກັບການກະກຽມ ແລະດໍາເນີນກອງປະຊຸມໃຫຍ່ 3 ຂັ້ນການຈັດຕັ້ງປະຕິບັດມະຕິຄໍາສັ່ງ ແລະແຈ້ງການຂອງລັດຖະບານສະພາບ ແລະ ຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມໄລຍະ 6 ເດືອນຜ່ານມາ ແລະ ແຜນວຽກຈຸດສຸມ ແລະມາດຕະການຈັດຕັ້ງປະຕິບັດທ້າຍປີ 2020 ນອກນັ້ນຍັງໄດ້ສະເໜີວ່າ: ປະຈຸບັນກົມການເມືອງສູນກາງພັກໄດ້ອອກມະຕິເລກທີ 107 ວ່າດ້ວຍການພັດທະນາ ນວ ໄລຍະໃໝ່ໃຫ້ຊ່ວຍຊີ້ນໍາຜັນຂະຫຍາຍໂດຍໄວເປັນຕົ້ນຂະແໜງການຕ່າງໆຂອງລັດຖະບານໃຫ້ເຂົ້າຮ່ວມພາລະ ກິດພັດທະນາເມືອງຫຼວງໃນໄລຍະໃໝ່ສະເໜີໃຫ້ລັດຖະບານຮອງຮັບຮ່າງຂໍ້ຕົກລົງວ່າດ້ວຍການຄວບຄຸມສຽງເນືອງນັນໃນ ນວ ປະຈຸບັນຍັງບໍ່ທັນໄດ້ຮັບຮອງເທື່ອ ແລະສະເໜີຂໍທິດຊີ້ນໍາຈາກລັດຖະບານກ່ຽວກັບການອອກຂໍ້ຕົກລົງວ່າດ້ວຍປະເມີນລາຄາທີ່ດິນທົ່ວ ນວ ຂໍທິດຊີ້ນໍາ-ຮ່ວມມືຈາກລັດຖະບານຄະນະພັກກະຊວງອົງການໃນການເປັນຜູ້ຊ່ວຍທາງດ້ານຍຸດທະສາດຂອງຂະແໜງການຕົນຢູ່ ນວ ຊຶ່ງເນື້ອໃນສໍາຄັນກໍກ່ຽວພັນກັບມະຕິ 107 ຂອງກົມການເມືອງສູນກາງພັກ.
   ຈາກນັ້ນທ່ານນາຍົກລັດຖະມົນຕີໄດ້ໃຫ້ທິດຊີ້ນໍາຊຶ່ງໄດ້ຊີ້ນໍາໃຫ້ອົງການປົກຄອງ ນວ ແລະພະແນກການກ່ຽວຂ້ອງຫັນເອົາວິກິດຈາກການລະບາດເຊື້ອພະຍາດໂຄວິດ- 19 ເປັນໂອກາດຊຸກຍູ້ປະຊາຊົນຜະລິດກຸ້ມຕົນເອງເພິ່ງຕົນເອງ ແລະຜະລິດເປັນສິນຄ້າສ້າງລາຍຮັບເຂົ້າສູ່ຄອບຄົວໃຫ້ປັບປຸງແບບແຜນການເຮັດວຽກການບໍລິຫານດ້ານເສດຖະກິດ-ສັງຄົມ ທາງດ້ານວັດທະນະທໍາໃຫ້ມີລະບຽບການ ແລະມາດຕະການປ້ອງກັນແກ້ໄຂເຂັ້ມງວດໃຫ້ສືບຕໍ່ຮັກສາຄວາມມີສະຖຽນລະພາບທາງດ້ານການເມືອງຄວາມໝັ້ນຄົງຄວາມເປັນລະບຽບຮຽບຮ້ອຍທາງສັງຄົມໃຫ້ຖືເປັນບັນຫາສໍາຄັນສືບຕໍ່ຫຼຸດຜ່ອນບັນດາປາກົດການຫຍໍ້ທໍ້ທີ່ເກີດຂຶ້ນໃນສັງຄົມເປັນຕົ້ນບັນຫາຢາເສບຕິດອຸ ບັດເຫດຕາມທ້ອງຖະໜົນສືບຕໍ່ຊຸກຍູ້ດ້ານວິຊາການປູກຝັງ ແລະລ້ຽງສັດ ແລະອື່ນໆ.

แชร์