ຢືດຖືເອົາອາຊີບການບໍລິການຄ້າຂາຍພາໃຫ້ຄອບຄົວມີຊີວິດການເປັນຢູ່ດີຂື້ນ

 ການເຮັດອາຊີບໃດໆກໍ່ຕາມຈະປະສົບຜົນສໍາເລັດໄດ້ນັ້ນແມ່ນຂຶ້ນຢູ່ກັບຄວາມຕັ້ງໃຈເຮັດໃຫ້ເຖິງທີ່ສຸດກໍ່ຈະປະສົບຜົນສໍາເລັດໄດ້ເອງດັ່ງຄອບຄົວທ່ານ ສີປະເສີດ ເສນາວັນນາ ປະຊາຊົນບ້ານສອກ ເມືອງສາມັກຄີໄຊ ແຂວງອັດຕະປື ຊຶ່ງເປັນຄອບຄົວຕົວແບບຂອງຊາວໜຸ່ມແຂວງໃນການສ້າງເສດຖະກິດຄອບຄົວດ້ວຍການຢຶດຖືອາຊີບບໍ່ລິການຄ້າຂາຍສາມາດສ້າງລາຍຮັບເຂົ້າຄອບຄົວໄດ້ດີຈົນກາຍເປັນຄອບຄົວພົ້ນທຸກທີ່ສ້າງລາຍຮັບເຂົ້າຄອບຄົວ 200 ລ້ານກວ່າກີບຕໍ່ປີ.


ທ່ານ ສີປະເສີດ ເສນາວັນນາ ໄດ້ໃຫ້ຮູ້ເມື່ອບໍ່ດົນນີ້ວ່າ: ໃນເມື່ອກ່ອນຕົນເອງໄດ້ເຮັດອາຊີບເປັນຊ່າງສ້ອມແປງກົນຈັກມາຮອດປີ 2009 ໄດ້ສ້າງຄອບຄົວ ແລະ ມີລູກ 3 ຄົນ, ເມື່ອກ່ອນຊີວິດການເປັນຢູ່ຂອງຄອບຄົວໄດ້ພົບອຸປະສັກນາໆປະການຕົນເອງ ແລະຄອບຄົວຕ້ອງໄດ້ຊອກຢູ່ຫາກິນເພື່ອຄວາມສູງລອດ, ຕໍ່ມາໄດ້ຜັນປ່ຽນຕົນເອງ, ຈາກຊ່າງສ້ອມແປງກົນຈັກມາຢຶດຖືເອົາອາຊີບບໍ່ລິການຄ້າຂາຍເປັນອາຊີບຫຼັກເຫັນວ່າຊີວິດການເປັນຢູ່ຂອງຄອບຄົວຄ້ອຍໆດີຂຶ້ນເທື່ອລະກ້າວ, ມາຮອດປີ 2015 ໄດ້ປຶກສາຄອບຄົວເກັບກຳລວບລວມທຶນຮອນທີ່ໄດ້ຈາກການປະຢັດມັດທະຍັດໃນຫຼາຍປີຜ່ານມາເຫັນວ່າສາມາດເປັນກ້ອນທຶນນ້ອຍ, ຈຶ່ງໄດ້ຕັດສິນໃຈຂະຫຍາຍຮ້ານຈາກຮ້ານຂາຍເຄື່ອງຍ່ອຍມາຂາຍເຄື່ອງສົ່ງພ້ອມທັງໄດ້ຂາຍເຄື່ອງກໍ່ສ້າງເພີ່ມຂຶ້ນອີກເຫັນວ່າສາມາດສ້າງລາຍຮັບໄດ້ດີມີຜົນກຳໄລເພີ່ມຂຶ້ນ, ຕົກມາຮອດປີ 2016 ຄອບຄົວ.    ໄດ້ຕັດສິນໃຈກູ້ຢືມເງິນຈາກທະນາຄານບວກກັບທຶນຮອນທີ່ໄດ້ສະສົມມາໄດ້ຂະຫຍາຍກິດຈະການຕັ້ງປໍ້ານໍ້າມັນເພື່ອບໍລິການຂາຍນໍ້າມັນເຫັນວ່າມີຜົນກຳໄລເພີ່ມຂຶ້ນຫຼາຍ, ປະຈຸບັນໃນຄອບຄົວມີແຮງງານສົມບູນ 5 ຄົນ, ຍິງ 2 ຄົນ, ມີລາຍຮັບສະເລ່ຍໄດ້ 30 ລ້ານກີບຕໍ່ຄົນຕໍ່ປີ ແລະລາຍຮັບອື່ນໆອີກຈໍານວນໜຶ່ງ, ເຮັດໃຫ້ປະຈຸບັນໜີ້ສິນທີ່ໄດ້ກູ້ຢືມຈາກທະນາຄານແມ່ນໄດ້ສຳລະໝົດແລ້ວ.


  ນອກຈາກບໍລິການຈຳໜ່າຍອຸປະກອນກໍ່ສ້າງ ແລະສິນຄ້າຕ່າງໆ ແລ້ວຍັງໄດ້ສືບຕໍ່ປັບປຸງຂະຫຍາຍທຸລະກິດການບໍລິການໂອນເງິນດ່ວນຊຸມຊົນນໍາອີກ, ເຮັດໃຫ້ລາຍຮັບຂອງຄອບຄົວນັບມື້ເພີ່ມຂຶ້ນ, ຈາກຜົນກໍາໄລໃນການເຮັດອາຊີບບໍລິການຄ້າຂາຍເຮັດໃຫ້ຄອບຄົວເຮືອນຖາວອນໜຶ່ງຫຼັງ, ມີລົດໃຫຍ່ 4 ຄັນ, ລົດຈັກ 2 ຄັນ, ມີທຶນສົ່ງ ເສີມລູກສືກສາຮໍ່າຮຽນນຳອີກ.


  ທ່ານ ສີປະເສີດ ເສນາວັນນາ ໄດ້ກ່າວຕື່ມວ່າ: ຈາກຜົນສຳເລັດດັ່ງກ່າວ, ເກີດຂຶ້ນໄດ້ຍ້ອນແນວທາງນະໂນບາຍອັນຖືກຕ້ອງຂອງພັກໂດຍສະເພາະແມ່ນໄດ້ຮັບຄວາມເອົາໃຈໃສ່ຢ່າງໃກ້ຊິດຕິດແທດຈາກຄະນະບໍລິຫານງານຊາວໜຸ່ມແຂວງອັດຕະປືທີ່ໄດ້ລົງແນະນຳຊຸກຍູ້ໂດຍສະເພາະວຽກງານຂະບວນການ 4 ບຸກ, ບວກກັບຄວາມເປັນເອກະພາບ, ຄວາມບາກບັ່ນພະຍາຍາມ ແລະຄວາມດຸໝັ່ນຂະຫຍັນພຽນຂອງສະມາຊິກພາຍໃນຄອບຄົວ.

_______________

ໂດຍ: ວັດທະນາ ຫຼວງອາໄພ, ໜັງສືພິມເສດຖະກິດ-ສັງຄົມ

 

แชร์