ຊໍາຊຸງຄາດວ່າກຳໄລໄຕມາດ 2 ເພີ່ມຂຶ້ນ 23%

ຊໍາຊຸງຄາດວ່າ ກຳໄລໃນໄຕມາດ 2 ເພີ່ມຂຶ້ນ 23% ຮັບອຸປະສົງຊິບອັດສະລິຍະມີໜ່ວຍຄວາມຈຳ ແລະໜ້າຈໍເພີ່ມຂຶ້ນຊຸກຍູ້ລາຍໄດ້ຫຼັງຈາກພິດໂຄວິດ-19 ເຮັດໃຫ້ຍອດຂາຍຫຼຸດລົງ.

 ຕາມຂ່າວຕ່າງປະເທດລາຍງານວ່າ ຊໍາຊຸງ ອະເລັກໂຕນິກຜູ້ຜະລິດສະມາດໂຟນ ແລະຊິບໜ່ວຍຄວາມຈຳລາຍໃຫຍ່ຂອງ ສ.ເກົາຫຼີ ຄາດຄະເນໃນວັນທີ 7 ກໍລະກົດທີ່ຜ່ານມາວ່າ ກຳໄລຈາກການດຳເນີນງານໃນ ໄຕມາດ 2 ປີ 2020 ຈະເພີ່ມຂຶ້ນ 23% ໂດຍໄດ້ແຮງຊຸກຍູ້ຈາກຄວາມ ຕ້ອງການຊິບອັດສະລິຍະ ຊຶ່ງມີໜ່ວຍຄວາມຈຳ ແລະໜ້າຈໍທີ່ເພີ່ມຂຶ້ນ ເຖິງແມ່ນວ່າ ຍອດຂາຍສະມາໂຟນໄດ້ຮັບຜົນກະທົບຈາກການແຜ່ລະບາດຂອງເຊື້ອໂຄວິດ-19 ກໍຕາມ, ທັງນີ້ ຊຳຊຸງຄາດວ່າກຳໄລຈາກ ການດຳເນີນງານໃນໄຕມາດ 2 ຈະຢູ່ທີ່ 8,1 ພັນຕື້ວອນ (6,8 ຕື້ໂດລາ ສະຫະລັດ) ເພີ່ມຂຶ້ນຈາກໄລຍະເວລາດຽວກັນຂອງປີທີ່ຜ່ານມາ ຊຶ່ງຢູ່ ທີ່ 6,6 ພັນຕື້ວອນ ໂດຍຕົວເລກການຄາດຄະເນກຳໄລດັ່ງກ່າວກົງກັນຂ້າມກັບນັກວິເຄາະຄາດວ່າຈະປັບຕົວຫຼຸດລົງ.

  ຢ່່າງໃດກໍຕາມຊໍາຊຸງຄາດວ່າ ຍອດຂາຍໂດຍລວມໃນໄຕມາດ 2 ຈະຫຼຸດລົງ 7,3% ເມື່ອທຽບເປັນລາຍປີ ໂດຍຊໍາຊຸງມີສ່ວນແບ່ງໃນຕະຫຼາດໂລກສູງເຖິງ 20% ໃນໄຕມາດ 1 ປີນີ້ ແຊງໜ້າຫົວເຫວີຍຂອງ ສປ ຈີນ ທີ່ມີສ່ວນແບ່ງຕະຫຼາດ 17% ແລະຫຼາຍກວ່າແອັບເປິ້ນທີ່ມີສ່ວນ ແບ່ງຕະຫຼາດ 14%.

--------

ໜັງສືພິມເສດຖະກິດ-ສັງຄົມ

แชร์